Oti na kacabote ni bomu keirau gole kei Na lai vaqarai dua nona itokani. Dua na ka neirau rarawa ni keirau rogoca ni sa mate. Oti e vica na siga e yaco tale na vakacaca, e vakavodoki au o Ta i nona basikeli keirau qai dro vakayawa.

 Dua na ka na vakacaca ni iKarua ni iValu Levu e Itali, au se nanuma vinaka tale ga na veika a yaco kina. Ia dua na ka e vakaukauataki au noqu maliwai ira na tamata era kilai Jiova, ra qai lomani koya vakalevu.

iLoloma Vinaka na ka Dina

 Ena vulaibatabata ni 1936 niu se buketetaki voli, a cakacaka tiko o Ta ena sala ni sitima kei na dua na turaga o Vincenzo Artusi. E se bera ni papitaiso o Vincenzo, ia e taleitaka vakalevu na ka dina ena iVolatabu. Dua na siga rau samaka tiko kei Ta na sala ni sitima, mani talanoataka tiko o koya na veika sa vulica.

 E vakadeitaka sara ga i kea o Ta ni qori na ka dina. E mani vinakata o koya kei na so tale era tiko ena tauni o Faenza mera vulica eso tale na ka. Gauna vata ya, era tusaqati vakaca na tacida ena nodra veiliutaki na Fascist. E sega ni rawa kina nira soqoni, ena rawa tale ga ni vesu e dua ke tiko vua na ivola vakaivolatabu. Eso tale ga na tacida era sa vesu. Sa dau qai gole o Ta kei ira eso tale ena so na vale e lomanivanua mera lai wilika na iVolatabu, qai vulica na ivola vakaivolatabu e tu vei ira. Ena veiyakavi e dau vakavulici keitou vakavuvale o Ta ena iVolatabu.

iLoloma Vinaka na Nodra iVakaraitaki Vinaka Eso

 Ena 1943, era sere e levu na tacida nira vesu ena vuku ni nodra cakacaka. Dua vei ira qori na tacida goneyalewa o Maria Pizzato, e tiko ena vualiku kei Itali. Ni dau lesu tiko i nona vale, e dau moce bogi dua vei keitou. E vukei ira vakalevu na mataveitacini mera taura nodra ivola, e dau veitaratara tale ga ina valenivolavola ni tabana e Suwitisiladi e qarava na cakacaka e Itali ena gauna ya. E rairai malumalumu o Maria, ia e marama yaloqaqa. Oti na ivalu, e dau gole vakalevu mai Faenza, keitou marautaka tale ga na gauna kece e lako mai kina.

 Dua tale au se nanuma vinaka tu na tacida yalewa o Albina Cuminetti, e dua na yada itabaqase. Niu se itabagone, e dau tiko ena vale e caka kina na soqoni. Ena itekitekivu ni veiyabaki ni 1920, sa painia tu e Itali. E dau tukuna vei au e levu na italanoa veiuqeti me baleta na cakacaka ena gauna ya!

 E dau maroroya tu o Albina eso na noda ivola, kei na iyaya makawa. Dua na siga, au raica vua e dua na pini e tiko kina na ivakatakilakila ni kauveilatai kei na isala vakatui era dau dara na Gonevuli ni iVolatabu ena gauna ya (na yaca era kilai kina na iVakadinadina i Jiova ena gauna oya). E lasa vei au niu kila ni yavutaki ena sokalou lasu na kauveilatai. Ia e qai tukuna vei au o Albina e dua na ka au na sega vakadua ni guilecava, e cavuta na Sakaraia 4:10: “Kua ni beca na siga e tekivu kina na ka lalai!”

 Au vuli sara ga ena ka e cavuta qori. Dina ni se lailai nodra kila na ka dina na gonevuli ni iVolatabu ena gauna ya, ia meu kua ni beci ira. Gauna tale ga ya e sega ni levu na ivola e vakadewataki ena vosa vakaItali, e taura gona na gauna me matata vei ira na veisau vou. Io, o Jiova e mareqeta na nodra sasaga, e dodonu me va tale ga ya na noqu rai.

 E veisivi toka neirau yabaki ni bula kei Albina, ia au dau taleitaka na veitalanoa kei koya. E levu na ituvaki dredre e sotava o koya, o Maria kei na so tale na tacida gugumatua, ia e uqeti au vakalevu na nodra ivakaraitaki ni yalodina. Au vakavinavinakataka ni rawa niu veimaliwai kei ira.

iLoloma Vinaka na Veiqaravi e Peceli

 Ena vulaikatakata ni 1955, au gole i Roma a caka i kea na soqo e kena usutu, “Triumphant Kingdom” (Matanitu Qaqa). Oti au gade sara i Peceli kei na so tale na vulagi mai na duidui vanua. Au veinanuyaka, ‘Au via veiqaravi sara ga i ke!’

 Ena ika18 ni Tiseba 1955, au papitaiso. Gauna ya au se vuli tiko, ia au sa vinakata meu veiqaravi vakatabakidua. Ena 1956, a caka na soqo ena siti o Genoa, qai kacivaki kina ni vinakati na bolecakacaka e Peceli. Ia e kaya na mata mai na valenivolavola ni tabana ni sega ni vinakati kina o ira na tacida yalewa.

 Oti au vakamacalataka na noqu isausau vei Piero Gatti, a e dua na ivakatawa ni tabacakacaka gugumatua. E kaya sara vei au: “Au na vakatututaka mo painia lavotaki.”

 Toso na gauna, au ciqoma e dua na ivola mai na valenivolavola ni tabana. Au nanuma sara ga meu na lai painia, ia au sa sureti meu lai veiqaravi e Peceli!

 Ena Janueri 1958, au gole e Peceli. Gauna ya e sega ni sivia na le 12 na lewenivuvale e Peceli. Au lesi meu veivuke vei rau na daunivakadewa ena valenivolavola ni tabana. E levu sara na ka me caka, au sega tale ga ni kila vinaka na vakadewa. Ia ena veitokoni i Jiova, au marautaka na noqu ilesilesi.

 Oti e dua vakacaca na yabaki, e tuvanaki tale na vakadewa au qai lesi meu painia. E sega ni rawarawa qori baleta niu sa taleitaka noqu veiqaravi e Peceli. Ia toso na gauna, au raica noqu ilesilesi qo me dua tale na iloloma talei mai vei Jiova.

iLoloma Vinaka na iTokani Era Gugumatua ena Cakacaka Vakavunau

 Ena imatai ni Seviteba 1959, au painia lavotaki ena siti o Cremona. E noqu itokani painia o Doris Meyer, e gole mai Denmark. E qase vei au ena vica ga na yabaki, ia e dua na painia matua au vuli tale ga ena nona ivakaraitaki. E dau sasaga o Doris qai yaloqaqa. E vinakati dina vei keirau na itovo qori me rawa ni keirau vunau ena yalava, ni o keirau ga na iVakadinadina i Jiova ena siti qo.

 A liu vei keirau i Cremona o Doris, e tuvanaka tale ga me caka na soqoni ena dua na vale e redetaki. Era qai kila qori na bete ni Katolika, qai dua na ka nodra cudru. Era mani vakasalataki ira na lewenilotu mera qarauni keirau.

 Dua na siga, keirau vakaroti me keirau gole ina siteseni ni ovisa. Era sega ni vesuki keirau, ia era kaya me lesu tale o Doris i nona vanua baleta ni vulagi . E mani lesu tale i Denmark, qai qaravi Jiova tiko ga ena yalodina.

 Sega ni dede, e lesi yani i Cremona o Brunilde Marchi, e dua na tacida goneyalewa. E dau yalomalua qai taleitaka na cakacaka vakavunau. Keirau tauyavutaka e levu na vuli iVolatabu, eso era toso vinaka sara vakayalo.

 Dua na ka noqu vakavinavinakataki Jiova ni rawa niu vakaitavi tale ga ena kena tauyavu na cakacaka vakavunau e Cremona. Nikua, sa lima na ivavakoso ena siti qori!

Na iLoloma au Sega ni Namaka

 Oti ga e dua vakacaca na yabaki noqu tiko e Cremona, ratou qiri mai na valenivolavola ni tabana. Ratou kaya ni vinakati na vakadewa ena vakavakarau ni soqo siga ono e kena usutu “United Worshipers,” e caka ena Julai 1961. Au mani lesu tale i Peceli. Dua na ka na levu ni noqu marau! Ena imatai ni Feperueri, 1961 au sa tiko e Peceli.

 E levu na gauna keimami cakacaka kina e veisiga, ia e ka dokai ni keimami vakaitavi ena vakadewataki ni ivola vakaivolatabu. E totolo ga na toso ni gauna, sa donuya sara yani na siga ni soqo.

 E kacivaki ena soqo ni vakarau vakadewataki na New World Translation of the Christian Greek Scriptures ena vosa vakaItali. Au vakasamataka, ‘Qo e dua na cakacaka levu.’ Io e donu na ka au nanuma. E mani toso tale na noqu veiqaravi e Peceli. Kila na cava, sa oti qo e 60 na yabaki au se tiko ga kina me yacova mai qo!

Eso Tale na iLoloma Talei Mai Vei Jiova

 Dua tale ga na iloloma talei au vakamareqeta mai vei Jiova, ya na noqu bula vakadawai. Sega ni kena ibalebale ya niu na sega ni vakawati, ia au dau leqataka ga na kequ ituvaki. Au dau talaucaka qori vei Jiova ena masu, ni o koya duadua ga e kilai au vinaka. Au kerei koya tale ga me vukei au meu vakatulewataka vakavinaka na ka meu cakava.

 E yaga vakalevu vei au na tikinivolatabu me vaka na Maciu 19:11, 12, kei na 1 Korinica 7:8, 38. Au vakavinavinakataki Jiova ni vukei au me donu tiko ga noqu rai, e solia tale ga vei au na lomavakacegu. Au sega vakadua ni veivutunitaka na vakatulewa au cakava, ya noqu vakayagataka noqu bula vakadawai meu solia kina vei Jiova noqu vinaka kece.

 Ena veiyabaki sa sivi, au vakadinadinataka e levu na veiveisau e caka ena Tabana ni Vakadewa, ni sa toso sara tiko na isoqosoqo i Jiova ena vakayagataki ni iyaya vakalivaliva vou kei na so tale na “wainisucu ni veimatanitu.” (Aisea 60:16) Na veiveisau qori e vaqaqacotaka noda duavata vakamataveitacini e vuravura raraba. Kena ivakaraitaki, ena 1985 e tabaki vata ga ena dua na gauna na Vale ni Vakatawa vakavalagi kei na vosa vakaItali. Nikua, sa tu ena jw.org na veiulutaga kei na vidio ena levu na vosa. E levu na gauna sa dau laurai vata sara ga mai kei na vosa vakavalagi. E macala ni vinakata o Jiova mera duavata nona tamata, me soli tale ga vei ira na kakana vakayalo ena kena gauna donu.

 E kauaitaki au vakalevu o Jiova. E raica meu marautaka na vuavuaivinaka ni noqu cakacaka vakaitalatala niu painia lavotaki. E vukei au tale ga meu veiqaravi e Peceli, au veitokani kina kei ira eso e duidui nodra yabaki kei na nodra isususu. Au vakalougatataki tale ga niu raica nona papitaiso o Na ni sa yabaki 68. Au vakanamata tu niu na raici koya tale kei ira na vo ni noqu vuvale nira na vakaturi mai ena ibulubulu nanumi.—Joni 5:28, 29.

 Au nanamaki tu na ka ena cakava o Jiova vei ira nona dauveiqaravi ena gauna se bera mai, ni sa na “vakavoutaka na ka kece.” (Vakatakila 21:5) Au vakadeitaka ni o Jiova ena solia tiko ga vei keda na “iloloma vinaka kece kei na isolisoli uasivi kece.”—Jemesa 1:17.