Keitou tiko ena dua na yasayasa lailai e Freetown e Sierra Leone. Dua na siga niu se qai vula 18 ena Okosita 1967, e katakata sivia na yagoqu. Na siga e tarava niu qai yadra sa malumalumu na yavaqu. Au lai laurai ena dua na valenibula e, na vanua keitou tiko kina. E qai laurai ni tauvi au na polio e dua na mate e vakavuna na paralase vei ira na gone yabaki lima lako sobu. E sega ni vukea na yavaqu noqu dau vakaukauayago kei ira na kenadau (physiotherapy). Toso na gauna, sa sega niu taubale se tu cake rawa. Levu na gauna e tukuna o tamaqu niu sega ni luvena dina baleta niu lokiloki. Au sega ni cakava rawa e levu na ka ni vakaiyalayala ga noqu veitosoyaki, au beci au tale ga.

 Au tiko vata kei Na kei na levu tale na wekaqu era dravudravua. Au sega ni vakila na loloma vakatama mai vei Ta. Eso era nanuma ni vu mai na vakatevoro na kequ ituvaki. Eso tale era uqeti Na me kauti au ena vale era dau qaravi kina na gone lokiloki nira nanuma niu vakaosoosotaki koya. Ia e sega ni via rogoci ira, e cakacaka ga vakaukaua me qaravi au.

 Au sa veiqasiyaki ga ni sega ni rawa niu tucake se taubale. Qori e vakavuna meu mavoa vakalevu. Au dau dara na isulu vavaku, e vakaivava tale ga na ligaqu me rawa ni taqomaka na yagoqu kei na ligaqu. Toso na gauna, sa dua noqu ivava kau vinaka e taqomaka na ligaqu. Keu via gole ina dua na vanua, au na biuta na ligaqu ena ivava kau qai toso vata tiko i liu kei na kequ bi. Ena lili wavoki toka na yavaqu ena dua na yasana qai loki toka na dakuqu. Qori na ka au cakava meu toso rawa kina. E lai vakavuna me mosi na ligaqu kei na tabaqu. E ka ni sasaga toka vei au na kequ ituvaki, dredre kina meu biuta na neitou vale. E sega ni rawa niu lai vuli se qito kei na so tale na gone. Au dau leqataka noqu bula ke mani mate o Na.

 Au masuta na Kalou me vukei au, meu kua tale ga ni dravudravua. Au nanuma keu toro voleka vua qai qaravi koya vinaka ena sauma na noqu masu. Dua na siga ena 1981, dina niu vakila tu na mosi au sasaga ina dua na valenilotu e toka ga neitou gaunisala. Era vakaraici au na tamata, dua na ka noqu tikotiko vakaca. Na italatala mada ga e sega ni bau kidavaki au, qai cudruvi Na niu dabe tu ena idabedabe sa saumi oti. Au mani vakatulewataka meu kua ni gole tale ena valenilotu ya.

 Ena 1984 niu yabaki 18, au gole ena rumu e cake ni neitou vale meu lai dabe e yasa ni katubaleka. Au dau raica vinaka e kea na ka e yaco tu e tuba. Ia au nanuma meu gole i tuba ena dua na vanua e dau lala tu. Niu yaco yani au sotavi rau sara e rua na tagane rau vunau tiko e veivale. Rau vakamacalataka vei au na veika totoka e se bera mai, ya ni na vinaka tale na kequ ituvaki. Rau wilika na Aisea 33:24 kei na Vakatakila 21:3, 4. Rau solia sara vei au na brochure, Marau me Tawamudu! Rau kaya tale ga ni rau na lesu mai qai vakavulici au ena levu tale na ka.

 Ni rau sikovi au mai ena ikarua ni gauna, rau kaya ni rau na kauti Pauline mai e dua na daukaulotu me tomana na neitou veitalanoa. E mani gole mai o Pauline, na neirau veivolekati e vaka ga e tinaqu dina. E uqeti au o Na meu vulica na iVolatabu kei Pauline ni dau vakaraitaka vei au na loloma dina, vosovoso, yalovinaka, qai dauveikauaitaki. E vakavulici au ena wiliwili. E vakayagataka na ivola Noqu iVola ni iTalanoa Mai na iVolatabu, me rawa niu kilai koya na Tama dauloloma au diva tu.

 Au marautaka na veika au vulica ena iVolatabu. Dua na siga au kerei Pauline meu gole ena nodra soqoni na iVakadinadina i Jiova, e kilai me Vulivola ni iVavakoso. a E dau caka ena nona vale e dua na iVakadinadina i Jiova e toka voleka ena vanua au tiko kina. E mani vakadonuya o Pauline. Ena Tusiti e tarava, e gole mai vale e waraki au meu sili qai vakaisulu me rawa ni keirau gole vata ena soqoni. E kaya sara e dua vei au me sauma o Pauline na neirau taxi, au mani kaya vua, “Au na qasi i kea ena noqu ivava kau.”

 Ni keirau varau biubiu, e vakaraici au toka mai o tinaqu kei ira na tiko veitikivi nira lomaleqataki au. Ni keirau lako tiko era kailavaka mai eso vei Pauline, “Kua ni o vakaukauataki koya!”

 E tarogi au o Pauline: “Jay, iko via lako?” Qo sara ga na gauna meu vakaraitaka kina noqu nuitaki Jiova. (Vosa Vakaibalebale 3:5, 6) Au kaya vua: “Io, qo na ka au vakatulewataka.” Era wadravi au toka ga mai, ia niu voleka yani e matamata e veisau na irairai ni matadra ra qai kaila ena marau niu sa curu i tuba.

 Au marautaka sara ga na soqoni! E veiuqeti dina! Era kidavaki au kece na mataveitacini, qai sega ni dua e raici au sobu. Au vakila niu nuidei. Tekivu sara ga mai keri au sa gole wasoma ena soqoni. Sega ni dede au vinakata meu gole ena soqoni e caka ena Vale ni Soqoni ni iVakadinadina i Jiova. Au dravudravua qai rua ga na vinivo e tu vei au kei na dua na pea ivava, ia au nuidei nira sega vakadua ni yawaki au na mataveitacini. Au vakila niu lomani vakalevu.

 Na Vale ni Soqoni e tiko ena dua na ruku ni ulunivanua. Me rawa niu gole kina, au na qasi mai vale i gaunisala oti au na tarova na taxi me kauti au. Niu yaco yani era na keveti au eso na mataveitacini ina Vale ni Soqoni.

 Au vakila na vinaka i Jiova, au vinakata sara ga meu vakarurugi vua. Au mani vakadeitaka meu tiko wasoma ena soqoni. (Same 34:8) Ni draki ucauca, e dau suasua qai soso na noqu isulu. Au dau lai veisau ga ena vale ni soqoni, ia e yaga dina!

 E volai na kequ italanoa ena ivolaniyabaki vakavalagi na 1985 Yearbook of Jehovah’s Witnesses. E qai wilika na kequ italanoa ena Yearbook o Josette e dua na iVakadinadina i Jiova e Suwitisiladi. E tarai koya na ka e wilika qai vinakata me vakauta mai e dua na wheelchair e vaka na basikeli, qai tiko ena kena taya e dua na ka e taqomaka na soso (mudguard), kei na kena cina. E vukea vakalevu sara ga noqu veitosoyaki, au sega tale ga niu beci au kina. Era dau qoroya na gonelalai noqu wheelchair ra qai taleitaka niu vodoka wavoki toka. Sa sega niu qai qasi tale tiko se meu raici niu lolovira.

 E totolo noqu toso vakayalo niu sa bula rawarawa toka, e savasava tale ga noqu ivakarau ni bula. E vukei au vakalevu ena cakacaka vakavunau na noqu wheelchair, au mani papitaiso ena ika9 ni Okosita 1986. Au sega vakadua ni tadra ni na veisautaka noqu ivakarau ni bula na noqu sa mai papitaiso. Au vakila niu marau vakalevu, lomavakacegu, au sega ni beci au, au nuidei tale ga ni sa tiko e dua na Tamaqu e lomani au. Au maliwai ira tale ga na mataveitacini era lomani au dina.

 Au via dolea lesu vei Jiova na ka sa cakava vei au. Au mani vakasamataka meu painia tudei, ia au sega ni vakadeitaka niu na rawa ni cakava. (Same 116:12) Au masulaka, oti au nanuma meu tovolea mada. Ena imatai ni Janueri 1988, au tekivu painia me yacova mai qo. Au vakila na veivakalougatataki i Jiova! Era tokoni au na mataveitacini meu rawata noqu isausau e veivula. Au raica ni tokoni au o Jiova ni vakayagataka na yalona tabu.—Same 89:21.

 Me vaka niu dua na painia au dau veitosoyaki vakalevu, e yaga tale ga qori ina yavaqu me vaka ni sa malumalumu. Oti toka e dua na gauna, au gole i valenibula niu vinakata me laurai na yavaqu, me dua tale ga noqu ituvatuva ni vakaukauayago. Ia e kaya vei au dua na nasi meu ni lesu tale i vale meu sa lai wawa mate ga. Qori tale ga na ka e tukuna e dua tale na nasi, dua na ka noqu yalolailai. Au gole i vale au masulaka vei Jiova me vukei au meu vosota na yalolailai, me vakarautaka tale ga e dua na sala meu lomavakacegu kina.

 E vukei au vakalevu na cakacaka vakaitalatala, au vakila kina ni vinaka e yagoqu. Oti e vica na yabaki, a pasi ena Vale ni Soqoni na nasi a kaya niu na voleka ni mate. E kurabui ni raica niu se bula ga!

 E dredre na kequ ituvaki, ia au ogaoga tiko ga ena noqu veiqaravi vei Jiova. Era dau vakavinavinakataki au na mataveitacini ena noqu gugumatua, kei na noqu dau yaco totolo ena soqoni. Au cakava qori me rawa niu veimaliwai kina vakalevu, au vakaraitaka tale ga noqu kauaitaki ira.

 Au sa vakila na vinaka i Jiova, au raica tale ga e levu na veivakalougatataki ena noqu bula. Au marau ni rawa niu vukei ratou e le tolu me ratou papitaiso. Dua vei ratou o Amelia, a tiko ena ika137 ni kalasi e Kiliati. Au tiko ena Koronivuli ni Cakacaka Vakapainia, qori e dua na isolisoli talei mai vei Jiova. E levu tale na ka vinaka e vakarautaka vei au! E solia vei au o Jiova na marau dina, au kila ni tiko na kequ yaga, au nuidei tale ga. E levu era sa dokai au, au sega tale ga ni maduataka na kequ ituvaki. E levu na noqu itokani e Freetown na vanua au tiko kina, ena ivavakoso, era tu tale ga e veiyasa i vuravura.

 Sa sivia qo e 40 vakacaca na yabaki noqu mai kila na yalayala ni Kalou me baleta na vuravura vou ena sega tale ni vakaleqai kina na ituvaki ni yago. E dau vakayaloqaqataki au tu ga na yalayala qori, au rai vakanamata tale ga ena kena vakayacori. Au na waraka tiko ga na noqu Kalou o Jiova ni na sega ni berabera me vakayacora nona yalayala. (Maika 7:7) Au vakalougatataki niu sega vakadua ni soro. E vukei au o Jiova meu vosota e levu na leqa kei na ituvaki dredre. Io e vukei au tu ga ena kena gauna donu. Au marau vakalevu niu sa vueti mai ena vanua au dau qasi tu kina ina dua na vanua au sega vakadua ni tadra.