Ena 1917, era tekivu vunau na iVakadinadina i Jiova (kilai ena gauna ya me International Bible Student) vei ira na lewenivanua dau veikauaitaki e Mexico. E levu vei ira qori era mai qaravi Jiova ena vica tale na yabaki e tarava. Ia ena iKarua ni iValu Levu, e sega ni duavata na matanitu o Mexico ena vanua e caka kina na soqoni kei na cakacaka vakavunau.

 Ena gauna ya, e vakaroti ena dua na lawa e Mexico me caka na sokalou e matanalevu ena vale e taukena na matanitu. E sega ni rawarawa qori vei ira na tacida, baleta ni dau caka na soqo lelevu ena valenisoqo se rara ni qito. Na soqoni e lomanimacawa e dau caka ena nodra vale na mataveitacini, era vunau tale ga e veivale kei na gaunisala.

 Me rawa ni muri na lawa, era okati na tacida e Mexico ena 1943 me dua na isoqosoqo e sega ni rawa tubu qai vakavulici ira na lewenivanua me vinaka na nodra ivakarau ni bula. Kena ibalebale, sa tiko na dodonu mera lewena na isoqosoqo na dui matatamata, e sega ni vaka me dua na lotu. E rawa kina vei ira na tacida mera sokalou qai vunau ena vanua cava ga.

 E okati ena nodra cakacaka na tacida na veivakavulici ena ivakarau vakavanua, kei na veivakatorocaketaki ena vuli. Era muria kina na lawa ni matanitu e vinakati ena noda isoqosoqo. (Roma 13:1) Ia na inaki levu duadua ni nodra vukei ira eso tale mera kila na ka dina ena iVolatabu. (Aisea 48:17, 18) Toso na gauna, e laurai ni vakalougatataka o Jiova na ituvatuva vou qori. E levu era mai vulica kina na dina, ra qai vakadinadinataka qori e levu na tacida ena gauna qo.

 Na inaki bibi ni cakacaka e Mexico me vunautaki na itukutuku vinaka ni Matanitu ni Kalou. Ia me vaka na yapositolo o Paula, era veisautaka na tacida na iwalewale ni vunau me ganita na ituvaki. (1 Korinica 9:20-23) Kena ivakaraitaki, ni vunau o Paula vei ira na kai Aceni e Areopakasi e sega ni vakamacala dodonu sara ga mai na iVolatabu. (Cakacaka 17:22-31) Nira vunau tale ga na tacida era sega ni kauta na iVolatabu, se tauyavutaka kina na veivosaki vei ira na lewenivanua.

 E nanuma lesu o Isabel: “Keimami na tukuna vei ira ni keimami matataka tiko na isoqosoqo e veivakavulici ena ivakarau vakavanua. Au dau vakamacalataka sara e dua na ulutaga ena Awake! e sega ni vakamacalataki kina na veika mai na iVolatabu.” Ia vakacava ke via kila o itaukeinivale e levu na ka me baleta na Kalou? Era na qai wasea vei ira na ka dina ena iVolatabu. E kaya o Aurora: “Keimami na sega ni kauta na iVolatabu, e vinakati gona me keimami kila vinaka e levu na tikinivolatabu.” Era taleitaka tale ga nira vakayagataka na tacida na nodra vakadewa ni iVolatabu.

 Era kila na tacida na ka mera tukuna ke dua e taroga na nodra cakacaka e vakalawataki. (Filipai 1:7) E yaga tale ga vakalevu na veivakadonui ni matanitu. a E kaya o María: “Keimami na kauta tiko na neimami kad e saini kina na Vunivola ni Veika e Vanuatani (Secretary of Foreign Affairs). E kaya o Samuel: “Ke ra tarovi keimami na vakailesilesi ra qai via kila na ka keimami cakava, keimami na vakaraitaka ga na kad.”

 E yaga vakalevu na kad ena gauna era tusaqati kina. Kena ivakaraitaki o Jesús e veiqaravi tiko e Jalisco State. E kaya: “Ena 1974, e liutaka e dua na bete eso na dauvakacaca ra qai kauti au kei na dua na veiwatini vei ira na vakailesilesi nira via tarova neitou cakacaka. Keitou mani vakaraitaka vei ira na neitou kad e seavu vakadua na nodra cudru. Oti neitou vukei vakalawa, keitou tomana neitou vunau ena yasayasa qori. Nikua, sa tauyavu ena siti qori e levu na ivavakoso.”

 E tokona na noda isoqosoqo na veivakavulici, era vakavulici gona na lewenivanua mera kila na wilivola qai sega ni saumi. b E kaya o Ariel: “E yaco donu mai na ituvatuva qo. E levu era sega ni vuli, ia era vinakata mera wilika na iVolatabu. Keimami vakavulici ira ena wiliwili kei na volavola. E levu era tekivu vulica sara ga kina na iVolatabu.”

 E nanuma lesu o Ruth: “Gauna ga era kila vinaka kina na wiliwili, e totolo sara ga nodra toso vakayalo. E dua na ka bibi vei ira nodra sa kila na wilivola, era marautaka tale ga. Keimami raica sara ga na nodra sasaga mera volekati Jiova.”

 Donuya na 1943 kei na 1993, era rejisitataki na tacida e Mexico me dua na isoqosoqo e vakavulici ira eso tale ena ivakarau vakavanua. Gauna qori, era sa vakavulici e sivia e le 127,000 mera kila na wilivola. Era vukei ira tale ga e sivia e le 37,000 mera vakavinakataka nodra wiliwili kei na volavola. Era vakavinavinakataka na vakailesilesi ni matanitu na nodra vukei ira na lewenivanua mera kila na wilivola kei na volavola. (Roma 13:3) Kena ivakaraitaki ena 2010, era vakavinavinakataka na vakailesilesi na “neimami sasaga me vicasagavulu na yabaki mera kila eso tale na wilivola. Keimami vukei ira tale ga e vica vata na udolu na lewenivanua e Mexico mera vakavinakataka na nodra ivakarau ni bula.”

 Me salavata kei na ka era rejisitataki kina, e tuvanaki na vanua ni soqoni me vaka na koronivuli qai vakatokai na Halls for Cultural Studies. E dau caka kina na soqoni kei na veivakavulici.

 E kaya o Ángel: “E caka vakalevu qori ena nodra vale na tacida. Levu vei ira era dravudravua vakayago, ia dua na ka noqu qoroya na nodra yalorawarawa. Era na solia e dua na yasa ni nodra lomanivale me caka kina na soqoni, ra qai tawana e dua tale na yasana.”

 E vinakati mera vakuai ira ena veika qori. E kaya o Ángel me baleta na soqoni: “Ke levu era gole mai, eso vei keimami ena duri i tuba. Keimami na rai mai e katubaleka me keimami vakamacala. Ia keimami marautaka vakalevu na soqoni.”

 Me kua ni basika na leqa, era na lagasere se masu toka e ra na tacida ena gauna ni soqoni. E nanuma lesu o Edmundo: “Ni caka na vunau (kilai ena gauna ya me Cultural Talk), ena vakabibitaka o koya e vunau na ivakavuvuli vakaivolatabu me vukei ira na vakarorogo mera vakavinakataka na nodra itovo, ra marautaka tale ga na bula.” Toso na gauna, era sega ni cavuta na yaca ni ivola ena iVolatabu. Ia era na qai kila vakacava na tikinivolatabu e cavuti? Kena ivakaraitaki e kaya o Manuel: “Keimami na sega ni tukuna Vakatakila wase 21, tikina e 3 kei na 4. Ia ena tukuni ga, ‘iVola 66, 21, 3 kei na 4.’” E kaya e dua tale na tacida o Moises: “E bibi me keimami kila vinaka na naba ni ivola ena iVolatabu me rawa ni keimami raica na tikinivolatabu.”

 Na itavi e qarava na noda isoqosoqo e Mexico e tautauvata tale ga kei na kena e veiyasa i vuravura. Dina e vakatabui na nodra sokalou na tacida, ia e vakalougatataka tiko o Jiova na nodra cakacaka. E rauta ni le 1,565 na dautukutuku e Mexico ena gauna e rejisitataki kina na isoqosoqo ena 1943. Ena 1993, sa kilai vakalawa me dua na isoqosoqo lotu. Na yabaki qori na vakatautauvata ni kedra iwiliwili na dautukutuku e le 366,177. E tubu tiko ga na kedra iwiliwili, ena 2021 e tubu ena le 864,633 na vakatautauvata ni kedra iwiliwili na dautukutuku e Mexico. Cava eda vulica rawa ena itukutuku qori?

 Veisau ni yaco na ituvaki dredre. E rawa kina ni vakadonui vakalawa na cakacaka e Mexico me 50 na yabaki. E kaya o Mario: “Eso na gauna au dau vaqaqa na vuna keimami sega ni rawa ni sokaloutaki Jiova kina vakai ira na vo ni mataveitacini e veiyasa i vuravura. Ia au sega ni bau rogoca e dua me lomatarotarotaka na veidusimaki ni isoqosoqo. Keimami nuitaki Jiova tu ga ni dusimaki keimami tiko. Qori e uqeti keimami me keimami talairawarawa vua.”

 Raica vakabibi na cakacaka i Jiova. E kaya o Guadalupe: “Keimami sega ni leqataka eso tale na ka ni keimami sa ogaoga tiko ga ena veivakatisaipelitaki. Keimami marau ni keimami qaravi Jiova. Qori e dua na ka e bibi duadua vei keimami.”

 Kabiti ira na mataveitacini. E kaya o Anita: “Keimami cakava e neimami vale na ka keimami sega ni dau cakava ena Hall for Cultural Studies, me vaka na lagasere ni soqoni. Keimami duavata qai veimaliwai vakalevu. Keimami marautaka me keimami dau veivakayaloqaqataki.”

 E kaya o Florentino ena ka e sotava: “Niu railesu, au kila ni vakainaki na ka kece e yaco e tiko, keimami vuli tale ga kina. Dina ni tusaqati na neimami cakacaka, ia au raica ni dusimaki keimami tu ga o Jiova.”