Na tubu ni isau ni yaya ena levu na vanua e vakavuleqa vei ira na lewenivanua, wili kina o ira na mataveitacini. Ia era sega ni lomaleqataka qori baleta nira kila ni o Jiova ena ‘sega ni biuti’ ira na nona dauveiqaravi. (Iperiu 13:5) E levu na gauna sa dau vakayacora o Jiova nona vosa ni yalayala qori. Qori sara ga na ka e cakava ena Yatu Filipaini era tu kina e levu era dravudravua. Ia dua na ka na ituvaki dredre e vakilai ena vanua qori ena veiyabaki ni 1970 kei na 1980.

 Dua na tacida yalewa o Vicky, a e kaya: “Eso na gauna au dau tagi ni lailai na kakana. Eso tale na gauna e sega sara ga na ka, vaka vo ga na raisi, masima kei na wai.” Dua na tacida tagane o Florencio e sega ni kunea rawa e dua na cakacaka. E kaya: “E tolu ga noqu pea na sote, tolu tale ga noqu pea na tarausese balavu. Au sa qai vuki dara tiko qori niu gole ena soqoni, kei na soqo ni tabacakacaka.” Ia na sala cava era vosota kina na mataveitacini? Cava e vukei ira mera yalodina tiko ga vei Jiova? Cava eda rawa ni vulica ena nodra ivakaraitaki nida sotava na ituvaki dredre?

 Era nuidei na mataveitacini ena Yatu Filipaini ni o Jiova ena vukei ira tu ga ena gauna dredre qori. (Iperiu 13:6) Io, a cakava dina qori ena sala era sega ni namaka. Kena ivakaraitaki, e dua na tacida yalewa o Cecille, e kaya: “E vica ga na keitou raisi a vo tiko, keitou mani vakasaqara me keitou katalau kina na le va ena neitou vuvale. Sa sega tale ni qai dua na kakana e tu me keitou kania. Keitou mani masuti Jiova me vukei keitou ena siga ya. Ni keitou se katalau tiko, sa yaco mai e dua na tacida tagane e kauta mai e lima na kilo na raisi. Keitou luluvu ena marau qai vakavinavinakataki Jiova ena veivakalougatataki qo. E levu tale na ituvaki va qori keitou sotava.”

 Era dau muria tale ga na tamata ni Kalou na ivakasala yaga ena iVolatabu. (Vosa Vakaibalebale 2:​6, 7) Kena ivakaraitaki, na tacida yalewa o Arcelita se qai papitaiso ga, a se goneyalewa tiko ena gauna ya. Dua na ka nona sasaga me vaqara na ka me bula kina, e mani talaucaka vei Jiova na ka e leqataka tiko. E vakasamataka sara na ka e tukuna na Vosa Vakaibalebale 10:4: “Na vakasavuliga ena vakavuna na dravudravua, ia na liga gugumatua ena rawati kina na iyau.” E uqeti Arcelita vakacava na tikinivolatabu qori? E mani vakatulewataka me cakava e dua nona iteitei. E kaya: “E vakalougatataka dina o Jiova na noqu sasaga. E rauti au vinaka na kakana au tea, au volitaka tale ga eso me rawa kina noqu ivodovodo.”

 E sega tale ga ni levu na ilavo vei ira na mataveitacini mera volia na qele, qai tara kina na Vale ni Soqoni. Ia qori e sega ni tarova nodra muria na ivakaro mera sosoqoni vata qai veivakayaloqaqataki. (Iperiu 10:​24, 25) Era cakava na ka era rawata. Kena ivakaraitaki, e kaya na tacida yalewa o Deborah: “Keirau tara kei na noqu itokani vakapainia e dua na vale lailai me caka kina na soqoni. E rauta ni le ono keitou dau tiko kina. Keirau cakava na delavuvu ena dua na mataqali drauniniu (nipa), na lalaga keirau cakava ena drauniniu, qai caka ena tolo ni vuniniusawa na idabedabe.”

 Ia e levu na gauna e dau caka na soqoni ena nodra vale. E kaya e dua na tacida yalewa o Virginia: “E ka lailai neitou vale, e tara ena co kei na bitu. Na siga Vakarauwai kece keitou na tuvanaka na neitou iyaya me rawa ni lala na lomanivale ena soqoni ena siga e tarava.” E dua tale na tacida tagane o Noel, e dau turu tiko na nona vale. E kaya: “Ni tau na uca, keitou na vakayagataka na vokete me tawa kina na wai. Ia keitou na sega ni leqataka sara qori baleta ni keitou sokalou tiko vei Jiova kei ira na mataveitacini.”

 E sega ni levu na ka era taukena na tacida, ia era gumatua tiko ga ena cakacaka vakavunau. Dua na tacida yalewa o Lindina, e tiko ena yanuyanu o Negros. E kaya: “Keitou vuvale levu qai cakacaka duadua ga o Ta. E sega ni dau veirauti na neitou ivodovodo, keitou sa qai dau taubale ga ena yalava. Ia keitou marautaka ni keitou lako vata vakavuvale, keitou kila ni marautaka tale ga o Jiova na neitou sasaga.”

 Dua na ka dredre duadua na vunau ena vanua tu yawa, ni lailai se sega sara ga kina na sala ni veitosoyaki. Na tacida yalewa o Esther e tiko ena yanuyanu o Luzon, e kaya: “Eso vei keimami sa dau biubiu vakamataka lailai ni yawa na vanua me taubaletaki. Keimami na vakabutara rawa tale ga na kakana me keimami lai kania. Keimami na vunau ena siga taucoko, oti keimami sa qai dau dabe e ruku ni vunikau me keimami kana. Eso na tacida e sega na kakana mera kania, ia era lako ga mai. Keimami dau kaya vei ira, ‘kua ni leqa, e levu tu na kakana.’ ”

 E vakalougatataka dina o Jiova na nodra vakuai ira na mataveitacini. Kena ivakaraitaki, e 54,789 na dautukutuku ena Yatu Filipaini ena 1970. Ena 1989, e tubu na iwiliwili me 102,487. Me yacova mai na 2023, sa 253,876 na dautukutuku ena Yatu Filipaini.

 E dredre sara ga na kedra ituvaki vakailavo na tacida, ia era toso tiko ga vakayalo. E kaya o Antonio e dua na tacida tagane: “Na dravudravua e sega ni vakaleqa neimami lomani Jiova.” E kaya e dua na tacida yalewa o Fe Abad: “Ni keirau sotava vakaveiwatini na leqa vakailavo, keirau kabiti Jiova tu ga. Keirau vakila tale ga na marau ni keirau bula rawarawa ga. Qori e vukei ratou na gone me ratou nuitaki Jiova tiko ga.”

 Dua na tacida yalewa o Lucila e tiko ena yanuyanu o Samar. E kaya: “Sega ni dodonu me tarova noda qaravi Jiova na bula dravudravua. Nida vakaliuca na Kalou eda na lomavakacegu, qai donu tiko ga na noda rai. Au marau nira sa mai kilai Jiova eso noqu vuli iVolatabu, toso na gauna era mai tomani au tale ga ena painia.”

 Eda rawa ni sotava na veika dredre ena gauna se bera mai. Ia meda nanuma dei na ka e tukuna e dua na qase ni ivavakoso o Rodolfo. E vola: “Au vakila tu ga nona veitokoni kei na nona loloma o Jiova, ena ituvaki dredre e sotavi ena veiyabaki ni 1970 kei na 1980. Dina ni lailai noqu ilavo, ia au sega vakadua ni lomaleqa ni karoni au tu ga o Jiova. Au marautaka tu na bula ena gauna qo, au rai vakanamata tu ena “bula dina” ena Parataisi se bera mai.”​—1 Timoci 6:19.