E kaya o Agostinho mai Brazil, “Au susu ena dua na vuvale dauteitei qai susu manumanu. Ni keitou dravudravua, au sega ni vakacavara kina na noqu vuli. Au cakacaka meu rawa ni veivuke e vale.” E qai mai kila o Agostinho na wilivola kei na volavola ni sa yabaki 33. E tomana o koya, “Ni bera niu mai kila na volavola kei na wilivola au madua qai beci au, ia e mai oti qori ena gauna au vulica kina.”

 E sa oti qo e sivia e 70 na yabaki na nodra vulica e sivia e 250, 000 na iVakadinadina i Jiova na wilivola kei na volavola, e dua vei ira o Agostinho. Na cava na vuna era cakava kina qori na iVakadinadina i Jiova? E yaga vakacava?

 Ena 1935, era sa vunautaka na itukutuku vinaka na iVakadinadina i Jiova ena 115 na vanua. Mera vunau na daukaulotu vei ira na vosataka e dua tale na vosa, era vakatagitaka vei ira na ivunau vakaivolatabu e sa vakadewataki qai katoni oti tu. Eso na gauna era solia tale ga na ivola ena nodra vosa ni sucu. E levu era taleitaka na itukutuku vakaivolatabu, ia e vakadredretaka qori nira sega ni kila na wilivola.

 Nira sega ni rawa ni wilika na iVolatabu, ena dredre tale ga mera muria na kena ivakavuvuli. (Josua 1:8; Same 1:2, 3) Era sega tale ga ni rawa ni qarava vinaka na nodra itavi vakarisito. Kena ivakaraitaki, ena ka ni sasaga vua e dua na itubutubu me vakavulici luvena ke sega ni kila vinaka na wilivola. (Vakarua 6:6, 7) Ke ra sega tale ga ni kila na wilivola na lako vou mai ena dina, ena dredre mera veivakavulici ena iVolatabu.

 Ena veiyabaki ni 1940 kei na 1950, erau gole ena so na vanua o Nathan H. Knorr kei Milton G. Henschel, rau liutaka tiko na nodra cakacaka na Vakadinadina i Jiova, me rau tuvanaka na cakacaka vakavunau. Rau uqeta na valenivolavola ni tabana e veiqaravi ena vanua e sega ni kilai kina vakalevu na wilivola, me tuvanaka na kena vuli ena ivavakoso.

 Sa qai vakauta na valenivolavola ni tabana ina ivavakoso na idusidusi ni kena vakayacori na vuli qori. Ena so na vanua, era sa vakarautaka oti tu na vakailesilesi ni matanitu na porokaramu ni vuli qori. Kena ivakaraitaki mai Brazil, e vakauta na matanitu ina valenivolavola ni tabana eso na ivola ni vuli, sa qai vakau qori ina ivavakoso. Ena so tale na vanua, e vinakati vei ira na tacida mera tuvanaka vakataki ira na nodra ituvatuva ni vuli wilivola kei na volavola.

 E rawa nira tiko ena vuli na tagane kei na yalewa, qase kei na gone. E kena inaki mera vakavulici mera wilika na nodra vosa ni sucu, e rawa mada ga ni caka na veivakavulici ena vicavata na vosa ena dua ga na ivavakoso.

 E yaga vakacava na porokaramu ni veivakavulici qo vei ira na tacida? E kaya e dua na iVakadinadina i Jiova mai Mexico: “Ena gauna qo au sa qai kila na ka e tukuni ena iVolatabu, e tara sara ga na lomaqu. Niu sa kila qo na wilivola, au sa doudou ni vosa vei ira keimami tiko veitikivi, au sa rawa tale ga ni vunautaka na itukutuku vinaka vei ira e levu.”

 Na porokaramu ni vuli qo e sega ga ni yaga ena nodra mai kila eso tale na ka e kaya na iVolatabu. E kaya o Isaac mai Burundi: “Niu mai kila na wilivola kei na volavola, e lai yaga tale ga ena noqu vulica na taravale. Au cakacaka kina ena tarataravaki, ena gauna qo au sa liutaka tu eso na tarataravaki lelevu.”

 E tekivu vulica na wilivola kei na volavola e dua na marama mai Peru o Jesusa ena gauna e yabaki 49 kina, e kaya: “Niu dua na radinivale, ena vinakati meu kila na yaca ni yaya au volia kei na kena isau, e sega ni rawarawa qori ena veigauna sa oti. Ia sa rawarawa sara ga qo na noqu lai volivoli niu sa kila na wilivola kei na volavola.”

 Ena veiyabaki sa sivi era vakacaucautaki ira na iVakadinadina i Jiova na vakailesilesi ni matanitu ena veivuke levu era cakava ena kena toroi cake na ivakarau ni wilivola kei na volavola. Nikua, era se veivakavulici tiko ga na iVakadinadina i Jiova ena wilivola kei na volavola, qai vakavinakataki tiko ga na veivakavulici ena veiyabaki. Era vakarautaka kina qai tabaka e voleka ni 224 na milioni na ivola ena 720 na vosa mera vukei kina na lewenivanua era sega ni vuli vinaka mera kila na wilivola. a