1, 2. Na cava era dau lomatarotarotaka e levu?

E VAKACACA ena dua na koro na ualoka. E vanavana ena loma ni valenilotu e dua, era mavoa qai mate kina e levu. E mate ena kenisa e dua na tina ratou qai biu tu mai e lima na luvena.

² E levu era dau lomatarotarotaka se cava e yaco kina na leqa se ituvaki vakaloloma va qori. Eso tale era lomatarotarotaka na vuna sa rui levu kina e vuravura na veicati kei na rarawa. O bau vaqaqa tale ga qori?

3, 4. (a) Na cava e taroga o Apakuki? (b) E sauma vakacava o Jiova na nona taro?

³ E tukuni ena iVolatabu nira lomatarotarotaka tale ga qori eso e dei nodra vakabauta na Kalou. Kena ivakaraitaki, a tarogi Jiova na parofita o Apakuki: “Na cava oni vakatara kina meu raica na ka ca? Na cava oni vakatara kina na veivakasaurarataki? Na cava e yaco tiko kina na veivakarusai kei na ivalavala voravora e mataqu? Na cava e levu kina na veiba kei na veivala?”—Apakuki 1:3.

⁴ E sauma na Kalou na taro qori ena Apakuki 2:2, 3, qai yalataka ni na vakavinakataka na ituvaki. E lomani keda vakalevu o Jiova, ni kaya na iVolatabu: “[E] kauaitaki kemuni o koya.” (1 Pita 5:7) Io, e lailai tale noda cata na veika ca ni vakatauvatani kei na nona cata o Jiova. (Aisea 55:8, 9) Meda raica mada se cava sa rui levu kina na rarawa e vuravura.

5. Na cava era dau kaya e levu na italatala me baleta na rarawa? Na cava e kaya na iVolatabu?

⁵ Era dau kaya na italatala, bete, kei na so tale era veituberi ena lotu ni loma ni Kalou meda rarawa. Era rairai kaya eso ni sa lewa oti tu na Kalou na veika ena yaco ena nona bula e dua, wili kina na leqa ena sotava. Era nanuma nida na sega tale ga ni kila na vuna e cakava kina ya na Kalou. Eso tale era na rairai kaya nida na mate meda lai tiko kei na Kalou e lomalagi. Ia e lasu qori ni o Jiova e sega ni vakavuna na veika ca. E kaya na iVolatabu: “E sega ni rawa vua na Kalou dina me caka ca, me cala o koya e Kaukaua Duadua!”—Jope 34:10.

6. Na cava era beitaka kina na Kalou e levu ni vakavuna tiko na rarawa e vuravura?

⁶ E levu era beitaka na Kalou ni vakavuna na veika rarawa nira nanuma ni lewa tu o koya na vuravura. Ia e vakamacalataki ena Wase 3, ni lewa tu na vuravura o Setani na Tevoro.

7, 8. Na cava sa rui levu kina na rarawa e vuravura?

⁷ E tukuna na iVolatabu ni “lewa tiko na vunica na vuravura taucoko.” (1 Joni 5:19) E dau vakatubu ca qai veivakalolomataki na iliuliu ni vuravura qo o Setani. E “vakacala tiko na vuravura taucoko.” (Vakatakila 12:9) Era sa vakatotomuria tu e levu nona itovo, qori na vuna e sa levu kina e vuravura na lasu, veicati, kei na veivakalolomataki.

⁸ E tiko eso tale na vuna sa rui levu kina na rarawa e vuravura. Ni rau talaidredre oti o Atama kei Ivi, erau vakadewa vei ira nodrau kawa na ivalavala ca. Ena vuku gona ni ivalavala ca, era cakava kina na tamata na ka e vakararawataki ira eso tale. Era vinakata mera uasivi ira  eso tale, era veivala, veivaluvaluti, qai veivakasaurarataki. (Dauvunau 4:1; 8:9) Eso tale era rarawa ena vuku ni “gauna kei na ka e sega ni namaki.” (Dauvunau 9:11) Ke cala na vanua era tu kina kei na gauna era tu kina e kea, era na rawa ni sotava na vakacalaka kei na so tale na leqa.

9. Na cava eda vakadeitaka kina ni tiko na vuna vinaka e se vakatara voli kina o Jiova na veika rarawa?

⁹ E sega ni vakavuna o Jiova na rarawa. E sega ni dodonu me beitaki ena ivalu, basulawa, kei na veivakalolomataki e yaco tu nikua. E sega tale ga ni vakavuna na leqa tubukoso me vaka na uneune, cagilaba, kei na waluvu. De dua o na veinanuyaka, ‘Ke kaukaua duadua o Jiova e lomalagi kei vuravura, na cava ga e sega ni muduka kina na veika ca?’ Eda vakadeitaka ni kauaitaki keda vakalevu na Kalou. Kena ibalebale e tiko na vuna vinaka e se vakatara tiko kina me yaco na veika rarawa.—1 Joni 4:8.

10. E saqati Jiova vakacava o Setani?

¹⁰ A vakacalai rau o Atama kei Ivi na Tevoro ena were o Iteni qai beitaka na Kalou ni iLiuliu ca. E kaya o Setani ni bureitaka vei rau o Atama kei Ivi na Kalou e dua na ka vinaka. E vinakata me rau vakabauta na veiwatini ni iliuliu vinaka cake o koya, e sega tale ga ni dodonu me lewai rau na Kalou.—Vakatekivu 3:2-5; raica na iKuri ni iVakamacala 27.

11. Na taro cava e bibi meda kila na kena isau?

¹¹ Erau talaidredre vei Jiova o Atama kei Ivi, rau saqata tale ga nona veiliutaki. Erau nanuma ni tu vei rau na dodonu me rau lewa ga na ka e donu kei na ka e cala. Ena vakadinadinataka vakacava o Jiova ni o koya ga e kila na veika ena vinaka vei keda, ni ratou lasu tale ga na dauveivorati?

12, 13. (a) Na cava e sega ni vakarusai rau totolo kina o Atama kei Ivi o Jiova? (b) Na cava e vakalaiva kina o Jiova me liutaka na vuravura qo o Setani, me lewai koya tale ga na tamata?

 ¹² A sega ni vakarusai rau totolo o Atama kei Ivi o Jiova. Ia e vakatara me rau vakaluveni, me qai soli na galala vei ira na nodrau kawa mera digia na nodra iliuliu. Se mani cava e saga na Tevoro, ena yaco dina na inaki i Jiova mera tawana na vuravura na kawatamata uasivi.—Vakatekivu 1:28; Aisea 55:10, 11.

¹³ E saqati Jiova o Setani nira vakararai tu e vica vata na milioni na agilosi. (Jope 38:7; Taniela 7:10) E mani solia na gauna o Jiova vei Setani me vakaraitaka na dina ni nona veibeitaki. E vakalaiva tale ga me tauyavutaka na tamata nona matanitu ena veidusimaki i Setani, me macala kina ke rawa ni liutaki koya ga na tamata se sega.

14. Na cava sa vakadinadinataki ena veiyabaki sa sivi?

¹⁴ Sa vica vata na udolu na yabaki nona saga na tamata me liutaki koya ga, ia e guce na nona sasaga. E vakadinadinataki e keri ni lasulasu o Setani. E dodonu ga me liutaki keda na Kalou. Sa rauta me kaya na parofita o Jeremaia: “Au kila vinaka, kemuni Jiova, ni sega ni vu vua na tamata na nona sala. E sega ni vu vua na tamata e lako tu me lewa na nona ilakolako.”—Jeremaia 10:23.

15, 16. (a) Na cava sa rui vakalaiva tale kina vakadede o Jiova me yaco tiko na veika rarawa? (b) Na cava e se sega ni walia kina o Jiova na leqa e vakavuna o Setani?

¹⁵ Na cava sa rui vakalaiva tale kina vakadede o Jiova me yaco tiko na veika rarawa? Na cava e sega ni tarova kina na veika ca? Baleta e veiganiti me soli na gauna me  vakadinadinataki kina ni guce na veiliutaki i Setani. Sa tovolea na tamata na veimataqali veiliutaki, e ca ga na kena itinitini. Sa toka sara e cake na ivakatagedegede ni veika vakasaenisi kei na iyaya vovou. Ia sa qai levu ga na veika tawadodonu, dravudravua, basulawa, kei na ivalu ni vakatauvatani kei na veigauna sa oti. E vakadinadinataka qori nida sega ni rawa ni lewai keda ga.

¹⁶ Na cava e se sega ni walia kina o Jiova na leqa e vakavuna o Setani? Ke cakava qori o Jiova, sa na tokona tiko na veiliutaki i Setani. Ena sega vakadua ni cakava ya o Jiova. Ena nanuma tale ga kina na tamata ni rawa ni lewai koya ga. Ia e lasu qori, e sega gona ni veitokoni o Jiova ni sega ni lasu rawa o koya.—Iperiu 6:18.

17, 18. Na cava ena cakava o Jiova ena leqa kece e vakavuna o Setani?

¹⁷ Vakacava e rawa ni vakaotia o Jiova na revurevu ni talaidredre i Setani kei na kawatamata? Io, e sega ni dua na ka e dredre vua na Kalou. Ni raica o Jiova ni sa vakalasui kece na veibeitaki i Setani, ena qai vukica na vuravura me parataisi me vaka ga e nakita taumada. Era na vakaturi o ira kece na tu ena “ibulubulu nanumi.” (Joni 5:28, 29) Sa na sega tale na tauvimate kei na mate. Ena vakayagataki Jisu o Jiova me vakaotia na leqa kece e vakavuna o Setani, me “vaqeavutaka na cakacaka ni Tevoro.” (1 Joni 3:8) Eda kalougata ni se vosoti keda voli o Jiova, qori eda mai kilai koya kina qai digi koya me noda iLiuliu. (Wilika 2 Pita 3:9, 10.) E dau vukei keda tale ga meda vosota na veika rarawa eda sotava.—Joni 4:23; wilika 1 Korinica 10:13.

 ¹⁸ E sega ni vakasaurarataki keda o Jiova meda digi koya me noda iLiuliu. E solia vei keda na galala ni vakatulewa. Meda raica mada na sala meda vakayagataka kina na isolisoli talei qori.

19. Na cava e isolisoli talei i Jiova vei keda? Na cava meda vakamareqeta kina na isolisoli ya?

¹⁹ E isolisoli talei i Jiova vei keda na galala ni vakatulewa, e vakaduiduitaki keda tale ga mai na manumanu. Eda rawa ni digia na ivakarau ni bula meda muria, eda rawa tale ga ni vakatulewataka meda vakamarautaki Jiova se sega. Ia e lewai ira na manumanu na kila era sucukaya mai. (Vosa Vakaibalebale 30:24) Eda sega ni vaka na misini e porokaramutaki na ka me cakava. E soli vei keda na galala meda digi ira noda itokani, meda vakatulewataka tale ga na veika meda cakava me baleta na noda bula ena gauna qo kei na gauna se bera mai. Io, e vinakata o Jiova meda marautaka noda bula.

20, 21. Na cava na vakatulewa vinaka duadua o rawa ni cakava ena gauna qo?

²⁰ E vinakata o Jiova meda lomani koya. (Maciu 22:37, 38) O Jiova e vaka na tama e marautaka nona kaya vua o luvena mai vu ni lomana “Au lomani iko,” qai sega ni vakasaurarataki o gone me cakava ya. E solia vei keda o Jiova na galala meda vakatulewataka meda qaravi koya se sega. Eratou vakatulewataka o Setani, Atama, kei Ivi, me ratou vakanadakui Jiova. Vakacava o iko, o na vakayagataka vakacava na nomu galala ni vakatulewa?

²¹ Vakayagataka na nomu galala ni vakatulewa mo qaravi Jiova kina. E vica vata na milioni era sa vakatulewataka mera vakanadakui Setani ra qai vakamarautaka na Kalou. (Vosa Vakaibalebale 27:11) Na cava mo cakava ena gauna qo mo raica kina na kena vakaoti vakadua na rarawa ena vuravura vou? Ena saumi na taro qori ena wase tarava.