1. Na cava o na rairai vakasamataka me baleta na veika o sa vulica ena ivola qo?

E LEVU na ka dina ena iVolatabu o sa vulica ena ivola qo. Kena ivakaraitaki, na yalayala ni Kalou me baleta na bula tawamudu, na kedra ituvaki na mate, kei na inuinui ni veivakaturi. (Dauvunau 9:5; Luke 23:43; Joni 5:28, 29; Vakatakila 21:3, 4) De dua o sa dau tiko ena nodra soqoni na iVakadinadina i Jiova, o vakabauta tale ga nira lewena na lotu dina. (Joni 13:35) Ke o sa bucina e dua na veiwekani voleka kei Jiova qai  vakatulewataka mo qaravi koya, o na rairai vakasamataka, ‘Na cava meu cakava ena gauna qo meu qarava kina na Kalou?’

2. Na cava e via papitaiso kina na turaga ni Iciopea?

² Qori na ka e vakasamataka tale ga e dua na turaga ni Iciopea a bula ena gauna i Jisu. Oti vakalailai na nona vakaturi o Jisu, a vunau vua na turaga ni Iciopea o Filipi e dua vei ira na tisaipeli. A vakadinadinataka vua o Filipi ni o Jisu na Mesaia. Ni uqeti koya dina na turaga ni Iciopea na veika e vulica, e sega tale ni wawa ni sa kaya sara ga: “Raica! Sa tu qo na wai. Na cava e tarova na noqu papitaiso?”—Cakacaka 8:26-36.

3. (a) Na cava e vakarota o Jisu vei ira na nona imuri? (b) Ena papitaisotaki vakacava e dua na lotu vaKarisito?

³ E vakamatatataka na iVolatabu ni dodonu mo papitaiso ke o via qaravi Jiova. A kaya o Jisu vei ira na nona imuri: “Vakavulici ira na lewe ni veivanua kece ga mera tisaipeli, ni papitaisotaki ira.” (Maciu 28:19) E ivakaraitaki sara ga o Jisu ena nona papitaiso. A sega ni vakamiriki e uluna na wai, ia e tabadromuci ena wai. (Maciu 3:16) Ni papitaiso tale ga nikua e dua na lotu vaKarisito, ena tabadromuci se toni sara ga e wai.

4. Na cava e vakaraitaka na nomu papitaiso?

⁴ Na nomu papitaiso e vakaraitaka raraba ni o vinakata dina mo itokani ni Kalou, mo qaravi koya tale ga. (Same 40:7, 8) O na rairai veinanuyaka, ‘Na cava meu cakava meu papitaiso kina?’

5. (a) Na cava mo cakava mo rawa ni papitaiso? (b) Na cava e bibi kina na soqoni vaKarisito?

⁵ E dodonu mo kilai Jiova kei Jisu mo rawa ni papitaiso. O tekivu cakava qori ena nomu vulica na iVola tabu. (Wilika Joni 17:3.) Ia e sega ni rauta ga mo vuli. E kaya na iVolatabu ni dodonu mo “vakasinaiti ena kilaka dodonu” me baleta na inaki i Jiova. (Kolosa 1:9) O rawa ni veiwekani voleka kei Jiova ke o dau tiko ena nodra soqoni na iVakadinadina i Jiova. Io, e bibi mo tiko wasoma ena soqoni qori.—Iperiu 10:24, 25.

6. Me vakacava na levu ni ka mo kila ena iVolatabu mo qai rawa ni papitaiso?

⁶ E sega ni namaka o Jiova mo kila na ka kece ena iVolatabu mo qai rawa ni papitaiso. A sega ni namaka tale ga qori vua na turaga ni Iciopea. (Cakacaka 8:30, 31) Ena sega ni mudu na noda vulica na veika me baleta na Kalou. (Dauvunau 3:11) Ia ni bera ni o papitaiso, e bibi mo kila, mo vakabauta tale ga na yavu ni ivakavuvuli ena iVolatabu.—Iperiu 5:12.

7. Sa yaga vakacava vei iko na nomu vulica na iVolatabu?

⁷ E kaya na iVolatabu: “Ke sega na vakabauta eda na sega ni vakamarautaka rawa na Kalou.” (Iperiu 11:6) Kena ibalebale e bibi tale ga na vakabauta mo qai rawa ni papitaiso. Era vakamacalataki ena iVolatabu eso na lewe ni koro makawa o Korinica, era rogoca na itukutuku eratou kacivaka na imuri i Jisu, ‘era vakabauta ra qai papitaiso.’ (Cakacaka 18:8) Sa yaga tale ga nomu vulica na iVolatabu, ni o mai vakabauta kina na yalayala ni Kalou, kei na yaga ni isoro i Jisu, ena noda vakabulai mai na ivalavala ca kei na mate.—Josua 23:14; Cakacaka 4:12; 2 Timoci 3:16, 17.

8. Na cava ena uqeti iko mo tukuna vei ira eso tale na ka o sa vulica?

⁸ Ni o vakalevutaka na ka o kila ena iVolatabu o qai raica na kena yaga ena nomu bula, ena dei na nomu  vakabauta. O na via tukuna sara ga na veika o sa vulica. (Jeremaia 20:9; 2 Korinica 4:13) Ia mo tukuna vei cei na veika qori?

9, 10. (a) O cei o rawa ni tekivu tukuna kina na ka dina o sa vulica? (b) Na cava mo cakava ke o via vakaitavi ena cakacaka vakavunau vakaivavakoso?

⁹ Ni o via tukuna na ka o sa vulica, de dua o na tekivu sara ga vei ira na wekamu, nomu itokani, ira oni tiko veitikivi, kei ira nomu itokani vakacakacaka. Ia e bibi mo yalovinaka, mo yalololoma tale ga ni o vosa vei ira. Ni toso na gauna, o sa rawa ni vakaitavi ena cakacaka vakavunau vakaivavakoso. Ke o nanuma ni o sa rawata qori, veivosaki sara kei na iVakadinadina e vakavulici iko tiko ena iVolatabu. Vakaraitaka vua ni o sa via vakataivi ena cakacaka vakavunau vakaivavakoso. Ke nanuma o koya ni sa veiganiti qori, o sa muria tale tiko ga na ivakatagedegede vakaivolatabu, drau na qai veivosaki kei na rua na qase ni ivavakoso.

¹⁰ Ena nomudou veivosaki qori, erau na via raica na qase ke o kila qai vakabauta na yavu ni ivakavuvuli ena iVolatabu, o muria tiko na ka e kaya na iVolatabu ena nomu bula e veisiga, o qai vinakata dina mo iVakadinadina i Jiova. Nanuma tiko, o ira na qase era vakatawani ira kece na lewe ni ivavakoso, kua gona ni rere na vosa vei ira. (Cakacaka 20:28; 1 Pita 5:2, 3) Oti na nomudou veivosaki, erau na qai vakaraitaka vei iko na qase ke o sa rawa ni vakaitavi ena cakacaka vakavunau vakaivavakoso.

11. Na cava mo kua ni vakawalena kina na veiveisau e gadrevi mo cakava?

¹¹ De dua rau na raica na qase ni gadrevi mo cakava eso tale na veiveisau, ni bera ni o vakaitavi ena  cakacaka vakavunau vakaivavakoso. Na cava e bibi kina mo cakava na veiveisau qori? Baleta eda matataki Jiova nida lai tukuna vei ira eso tale na veika me baleti koya, e dodonu gona meda rokovi koya ena noda ivakarau ni bula.—1 Korinica 6:9, 10; Kalatia 5:19-21.

12. Na cava e bibi kina meda veivutuni kece?

¹² E vakamacalataka na yapositolo o Pita e dua tale na ka mo cakava mo qai rawa ni papitaiso: “Ni veivutuni gona, ni veisau me bokoci kina nomuni ivalavala ca.” (Cakacaka 3:19) Na veivutuni e vakaibalebaletaka na noda rarawataka dina na cala eda cakava. Kena ivakaraitaki, ena vinakati mo veivutuni ke o dau veiyacovi tawadodonu e liu. Ena yasana kadua, ke o dau saga mada ga ena nomu bula taucoko mo cakava na ka e dodonu, e se bibi ga mo veivutuni nida ivalavala ca kece qai gadrevi meda kerea na veivosoti ni Kalou.​—Roma 3:23; 5:1.

13. Na cava na ibalebale ni “veisau”?

¹³ E sega ni veirauti mo rarawataka ga na nomu cala. E kaya o Pita ni bibi tale ga mo “veisau.” Kena ibalebale mo cata nomu ivakarau ni bula makawa, mo sa cakava na ka e dodonu. Me kena ivakatautauvata, kaya mada e se qai imatai ni gauna mo lako ina dua na vanua. Ke o kila ni cala na gaunisala o muria tiko, na cava o na cakava? Io, o na sega ni tosoya tale nomu ilakolako qori, o na saumaki mo muria na gaunisala donu. O na rairai liaca tale ga ena nomu vulica na iVolatabu ni dodonu mo veisautaka eso na nomu itovo. Mo yalorawarawa sara ni “veisau,” se cakava na veiveisau e gadrevi qai cakava na ka e dodonu.

14. O na yalataki iko vakacava vua na Kalou?

¹⁴ Dua tale na ka bibi mo cakava ni bera ni o papitaiso, mo yalataki iko vei Jiova. O na yalataka vei Jiova ena masu ni o na qaravi koya duadua ga, o na vakaliuca tale ga na lomana ena nomu bula.—Vakarua 6:15.

15, 16. Na cava ena uqeta e dua me yalataki koya vua na Kalou?

¹⁵ Na nomu yalataka mo qaravi Jiova duadua ga, e vaka na nomu yalayala mo lai tiko kei koya o domona ena nomu bula taucoko. Vakasamataka mada e rua erau sa veibuku tiko. Ni toso tiko na nona kilai yalewa o tagane, ena lomani koya, ena via vakawatitaki koya sara. Dua na vakatulewa bibi qori, ia ena bolea o tagane na kena icolacola kece ni lomani yalewa.

¹⁶ Ni o vulica tiko na veika me baleti Jiova, o na lomani koya, o na via qaravi koya tale ga ena nomu vinaka taucoko. Qori ena uqeti iko mo yalataka vua ena masu ni o na qaravi koya. E kaya na iVolatabu ni o koya e via muri Jisu me “kua tale ni muria na lomana.” (Marika 8:34) Kena ibalebale o na vakaliuca ena nomu bula na nomu talairawarawa vei Jiova. E bibi cake na veika e vinakata o Jiova, sega ni ka o vinakata se na nomu isausau.—Wilika 1 Pita 4:2.

17. Na cava era sega kina ni yalataki ira vei Jiova eso?

¹⁷ Eso era sega ni yalataki ira vei Jiova nira leqataka de ra sega ni dina ena nodra yalayala mera qaravi koya. Era sega ni via vakararawataki Jiova. Era nanuma tale ga nira na sega ni saumitaro vei Jiova ena ka era cakava ke ra sega ni yalataka vua na nodra bula.

18. Na cava o na sega ni leqataka kina na nomu vakararawataki Jiova?

 ¹⁸ De dua o lomaleqataka ni o na vakararawataki Jiova. Na nomu lomani Jiova ena biuta laivi na lomaleqa qori. Ena uqeti iko tale ga mo saga ena nomu vinaka taucoko mo dina ena nomu yalayala vua. (Dauvunau 5:4; Kolosa 1:10) O na sega ni nanuma ni sa rui dredre mo cakava na lomana. E vola na yapositolo o Joni: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.”​—1 Joni 5:3.

19. Na cava mo kua kina ni leqataka na nomu yalataki iko vua na Kalou?

¹⁹ E sega ni tukuni mo uasivi mo qai yalataki iko vei Jiova. E sega ni dau namaka vakasivia vei keda na ka. (Same 103:14) Ena vukei iko mo cakava na ka e dodonu. (Aisea 41:10) Vakararavi vei Jiova mai vu ni lomamu, “ena vakadodonutaka na nomu ilakolako o koya.”—Vosa Vakaibalebale 3:5, 6.

20. Na cava e dodonu mo cakava ni o sa yalataki iko oti vua na Kalou?

²⁰ Vakacava o nanuma ni o sa rawa ni yalataki iko vei Jiova? Ni o yalataka oti vua na nomu bula, e dodonu mo papitaiso.

21, 22. Na sala cava o “tusanaka raraba” kina na nomu vakabauta?

²¹ Mo tukuna vua na kodineita ni ilawalawa qase ena nomu ivavakoso ni o sa yalataki iko vei Jiova, o sa vinakata mo papitaiso. Ena qai raica o koya e vica na qase me ratou railesuva kei iko eso na yavu ni ivakavuvuli vakaivolatabu. Ke ratou raica na qase ni veiganiti mo sa papitaiso, eratou na vakaraitaka vei iko ni o rawa ni papitaiso ena nodra soqo tarava na iVakadinadina i Jiova. Dua na ivunau ena soqo qori ena vakamacalataki kina na ibalebale ni papitaiso. Sa qai dau tarogi e rua na taro rawarawa vei ira na vakarau papitaiso. Ni o sauma na taro qori, o na “tusanaka raraba” kina na nomu vakabauta.​—Roma 10:10.

²² O na tabadromuci sara e wai ena gauna o papitaiso kina. Na nomu papitaiso ena vakaraitaka e matanalevu ni o sa yalataki iko vei Jiova, o sa dua tale ga na iVakadinadina i Jiova.

23. Na cava na ibalebale ni papitaiso “ena yaca i Tamada kei na Luvena kei na yalo tabu”?

²³ E kaya o Jisu ni o ira na nona tisaipeli era na papitaiso “ena yaca i Tamada kei na Luvena kei na yalo tabu.” (Wilika Maciu 28:19.) Kena ibalebale ya ni o doka na veiliutaki i Jiova, na itavi i Jisu ena kena vakayacori na inaki ni Kalou, kei na sala e vakayagataka kina na Kalou na yalona tabu me vakayacora na lomana.—Same 83:18; Maciu 28:18; Kalatia 5:22, 23; 2 Pita 1:21.

24, 25. (a) Na cava e vakaibalebaletaka na nomu papitaiso? (b) Na cava ena veivosakitaki ena iotioti ni wase?

²⁴ Na nomu papitaiso e vakaibalebaletaka e dua na ka bibi. Ni o tabadromuci e wai, o sa mate vata kei na nomu ivakarau ni bula makawa se o sa vakanadakuya. Ni o lamata mai wai, sa dua na itekitekivu vou oya ena nomu cakava na loma ni Kalou. E vakaraitaka tale ga ni tekivu qo lako yani o sa na qaravi Jiova. Nanuma tiko o sega ni yalataki iko vua e dua na tamata, dua na isoqosoqo, se cakacaka. O yalataka sara ga na nomu bula vei Jiova.

²⁵ Na nomu yalayala ena rawa ni vakavolekati iko vua na Kalou. (Same 25:14) Sega ni kena ibalebale qori ni na vakabulai ga e dua ena vuku ni nona papitaiso. E vola na yapositolo o Paula: “Ni sasagataka tiko ga na nomuni bula ena rere kei na sautaninini.” (Filipai 2:12) Na papitaiso e itekitekivu wale ga. Na cava mo cakava mo kabiti Jiova tiko ga kina? Ena veivosakitaki qori ena iotioti ni wase.