1, 2. Na cava o lomani Jiova kina?

O LOMANA na Kalou? De dua na levu ni nomu loloma o yalataka kina nomu bula vua. De o nanuma ni nomu itokani vinaka duadua. Ni bera mada ga ni o lomani Jiova, e lomani iko e liu o koya. Eda wilika ena iVolatabu: “Eda veilomani baleta ni a liu sara ga na nona lomani keda na Kalou.”—1 Joni 4:19.

² Vakasamataka mada na sala e lomani keda kina o Jiova. E vakarautaka na vuravura totoka meda bula kina kei na veika kece meda marautaka. (Maciu 5:43-48; Vakatakila 4:11) E vinakata meda veiwekani voleka kei koya, e vakarawarawataka tale ga na sala meda kilai koya kina. Nida wilika na iVolatabu, eda sa vakarorogo sara tiko ga vei Jiova. E rogoci keda tale ga nida masu. (Same 65:2) E veidusimaki qai veivakayaloqaqataki ena kaukaua ni yalona tabu. (Luke 11:13) E tala mada ga mai vuravura na Luvena talei me sereki keda ena ivalavala ca kei na mate.—Wilika Joni 3:16; Roma 5:8.

3. Ena vinaka tiko ga vakacava na noda veiwekani kei Jiova?

 ³ Vakasamataka mada e dua na nomu itokani voleka, drau veivolekati ena gauna vinaka kei na gauna ca. E ka ni sasaga me dei va qori na noda veitokani. E vinakati tale ga qori ena noda veitokani kei Jiova, na noda itokani voleka duadua. E rawa ni tawamudu na noda veitokani. E uqeti keda gona kina na iVolatabu: “Tiko ga ena loloma ni Kalou.” (Juta 21) Eda na cakava vakacava qori? E sauma na iVolatabu: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.”—1 Joni 5:3.

4, 5. (a) Na cava na ibalebale ni “lomana na Kalou”? (b) Na sala cava o tekivu lomani Jiova kina?

⁴ Na cava na ibalebale ni “lomana na Kalou” ena iVolatabu? E kena ibalebale noda lomani koya, sega ni nona lomani keda. O se nanuma na imatai ni gauna o vulica kina mo lomani Jiova?

⁵ Vakasamataka na imatai ni gauna o vulica kina ni vinakata o Jiova mo bula tawamudu ena vuravura vou. O qai kila na ka kece e vakarautaka me rawa kina qori, o kila tale ga na iloloma uasivi e vakarautaka vei keda o Jiova ni tala mai vuravura na Luvena e duabau ga. (Maciu 20:28; Joni 8:29; Roma 5:12, 18) Ni toso tiko nomu vulica na levu ni loloma i Jiova, e uqeti iko qori mo vakaraitaka tale ga na nomu lomani koya.—Wilika 1 Joni 4:9, 10.

6. Na cava e okati ena noda loloma? E uqeti iko vakacava nomu lomana na Kalou?

 ⁶ Qori se qai itekitekivu ga ni nomu lomana na Kalou. Me kena ivakaraitaki ke da lomana e dua eda na sega ni tukuna tu ga: “Au lomani iko.” Na loloma ena uqeti keda meda cakava na ka ena vakamarautaki koya. Qori tale ga na ka o na cakava ni o lomani Jiova, o na muria na ivakarau ni bula ena vakamarautaki koya. Ena uqeti iko na levu ni nomu loloma mo yalataki iko vua qai papitaiso. Nomu cakava qori, o sa yalataka kina mo qaravi koya me tawamudu. (Wilika Roma 14:7, 8.) O na dei tiko ga vakacava ena nomu yalayala?

7. Na cava eda na cakava nida lomani Jiova? Na cava eso na nona ivakaro?

⁷ “Meda muria na nona ivunau” o Jiova nida lomani koya. Eda na cakava vakacava? Meda talairawarawa vua. Eda vulica ena iVolatabu na sala e vinakata o Jiova meda bula kina. Me kena ivakaraitaki, e tukuna ni cala na mateni, na butako se lasu, na veiyacovi kei na dua e sega ni watida, na sokaloutaki ni dua tale na ka, sega ni o Jiova.—1 Korinica 5:11; 6:18; 10:14; Efeso 4:28; Kolosa 3:9.

8, 9. Eda na kila vakacava na ka e vinakata o Jiova ena ituvaki e sega ni matata na kena lawa ena iVolatabu? Tukuna na kena ivakaraitaki.

⁸ E levu na ka e okati ena noda vakamarautaki Jiova, sega ni noda talairawarawa ga ina nona ivakaro. E sega ni vakarautaka e dua na lisi balavu ni lawa me baleta na ivakarau ni noda bula. Ena so na gauna ena sega ni vakamatailalaitaki sara ena iVolatabu na  ka meda cakava. Eda na vakatulewa vinaka vakacava? (Efeso 5:17) Eda na kunea ena iVolatabu na yavu ni ivakavuvuli ni ka dina me baleta na nona rai o Jiova. Nida wilika eda na qai kilai Jiova kina vakavinaka. Eda na vulica na ivakarau ni nona vakasama, wili kina na ka e taleitaka kei na ka e cata.—Wilika Same 97:10; Vosa Vakaibalebale 6:16-19; raica na iKuri ni iVakamacala 1.

⁹ Me kena ivakaraitaki, eda na vakatulewataka vakacava na ka meda sarava ena tivi se noda vakayagataka na Internet? E sega ni tukuna vakadodonu o Jiova na ka meda cakava. Na ivakavuvuli e vakarautaka ena vukei keda meda vakatulewa kina vakavinaka. E levu na ka ni veivakamarautaki ena gauna qo e tu kina na itovo kaukaua kei na veiyacovi. Ia e tukuna o Jiova ena iVolatabu ni “cati ira kece era taleitaka na itovo kaukaua” ena qai “lewai ira na dau veiyacovi tawadodonu.” (Same 11:5; Iperiu 13:4) E vukei keda vakacava na ivakavuvuli e rua qo meda vakatulewa kina vakavinaka? Nida kila ga ni cata o Jiova e dua na ka se okata me ivalavala dukadukali, meda levea sara.

10, 11. Na cava eda talairawarawa kina vei Jiova?

¹⁰ Na cava eda talairawarawa kina vei Jiova? Sega ni baleta ga nida via drotaka na itotogi se na leqa eda na sotava nida vakatulewa cala. (Kalatia 6:7) Eda talairawarawa vei Jiova nida lomani koya. Me vaka ga nodra via vakamarautaki tamadra na gone, eda vinakata meda vakamarautaka na Tamada vakalomalagi. E sega ni dua na ka e vakatauvatani rawa ina noda kila ni marautaki keda o Jiova!—Same 5:12; Vosa Vakaibalebale 12:2; raica na iKuri ni iVakamacala 2.

 ¹¹ Eda sega ni muria na ivakaro i Jiova baleta ga ni rawarawa se sa sega tale ni dua na ka eda lewa kina. Eda na sega tale ga ni digia na lawa se ivakatagedegede e vakarautaka me muri se sega. (Vakarua 12:32) Meda talairawarawa ga mai vu ni lomada me vaka e kaya na daunisame: “Au taleitaka na nomuni ivakaro, io, au dau lomana.” (Same 119:47; Roma 6:17) Eda vinakata meda vakataki Noa, ni vakaraitaka na nona lomani Jiova ni cakava na ka kece e vakaroti vua. E tukuna na iVolatabu ni o Noa “e cakava sara ga na ka e tukuni vua.” (Vakatekivu 6:22) Vakacava o vinakata me cavuta tale ga qori vei iko o Jiova?

12. Eda na vakamarautaki Jiova vakacava?

¹² Na cava na rai i Jiova nida talairawarawa vua? Eda ‘vakamarautaka na lomana.’ (Vosa Vakaibalebale 11:20; 27:11) Vakasamataka mada ya! Eda vakamarautaka na Dauveibuli ni lomalagi kei na vuravura nida talairawarawa vua. E sega ni vakasaurarataki keda, e solia ga na galala ni vakatulewa. Kena ibalebale ni tu vei keda na galala meda digia na ka dodonu se cala. O Jiova e vinakata na noda lomani koya me uqeti keda meda vakatulewa vinaka meda rawata kina na bula e vinaka duadua.—Vakarua 30:15, 16, 19, 20; raica na iKuri ni iVakamacala 3.

13, 14. Eda kila vakacava ni sega ni dredre na kena muri na ivakaro ni Kalou? Vakamacalataka.

¹³ Vakacava ke da nanuma ni rui dredre na muri ni ivakaro i Jiova se sega kina noda galala? E tukuni vakamatata ena iVolatabu: “E sega ni icolacola bibi na  nona ivunau.” (1 Joni 5:3) Na vosa vaKirisi ni “icolacola bibi” e kena ibalebale na “tarabi.” Ena so tale na vakadewa ni iVolatabu, e vakayagataki na vosa qo me vakamacalataka na lawa e muri ena voraki se o ira na vakacolasau ra qai dau veivakaleqai. (Maciu 23:4; Cakacaka 20:29, 30) E tukuna na New English Translation: “E sega ni bikai keda na nona ivakaro.” E sega ni “tarabi” na ivakaro i Jiova me dredre na noda muria. E sega ni dau sivia na ka e kerea vei keda.

¹⁴ Me kena ivakaraitaki, kaya mada ni o vukea tiko e dua na nomu itokani sa vakarau toki. Sa tawana kece na nona iyaya ena kateni. Eso e mamada e rawarawa ni laveti, eso tale e bibi ena vinakati kina e le rua me rau laveta. Vakacava ena tukuna na nomu itokani mo laveta duadua ga na kateni bibi? Macala ga ni na sega ni cakava qori! Na vuna? E sega ni vinakata mo mavoa. Vaka ga na itokani qori, e sega vakadua ni na tukuna o Jiova meda cakava na ka e dredre meda muria. (Vakarua 30:11-14) E kilai keda vinaka. “Ni kila vinaka o koya na keda ibulibuli, e nanuma tiko nida kuvuniqele.”—Same 103:14.

15. Eda vakadeitaka vakacava ni na vinaka vei keda na ivakaro i Jiova?

¹⁵ E tukuna o Mosese ina matanitu o Isireli ni ivakaro i Jiova e vakarautaki mera “vinaka kina,” ena rawa tale ga nira “bula tiko” ke ra muria. (Vakarua 5:28-33; 6:24) E dina tale ga qori nikua. Na ka kece e kerea vei keda o Jiova eda na vinaka kina. (Wilika Aisea 48:17.) Na Tamada o Jiova e dau kila vinaka na ka ena yaga vei keda. (Roma 11:33) E tukuna na iVolatabu ni: “Kalou ga na loloma.” (1 Joni 4:8) Kena ibalebale  ni loloma e uqeti Jiova ena ka kece e tukuna se cakava.

16. Eda ivalavala ca da qai bula tu ena vuravura ca, eda kila ga vakacava nida rawa ni talairawarawa?

¹⁶ E sega ni dau rawarawa meda talairawarawa vua na Kalou. Eda bula tu ena vuravura ca e liutaka na Tevoro. E dau veiuqeti ina caka ca. (1 Joni 5:19) E vinakati meda vorata na noda vakanananu kei na lomada ivalavala ca, ni qo ena rawa ni uqeti keda meda talaidredre vua na Kalou. (Roma 7:21-25) Na noda lomani Jiova ga ena uqeti keda meda cakava na ka dodonu. E kila na noda sasaga meda talairawarawa vua, e vukei keda tale ga ni solia na kaukaua ni yalona tabu. (1 Samuela 15:22, 23; Cakacaka 5:32) E dau vukei keda na yalo tabu meda bucina eso na itovo e vakarawarawataka noda talairawarawa vua na Kalou.—Kalatia 5:22, 23.

17, 18. (a) Na cava eda na vulica ena ivola qo? (b) Na cava eda na veivosakitaka ena wase tarava?

¹⁷ Eda na vulica ena ivola qo na ivakarau ni bula e vakamarautaki Jiova. Eda na vulica na sala meda muria kina na nona ivakavuvuli kei na nona ivakatagedegede savasava. Nanuma tiko ni sega ni vakasaurarataki keda o Jiova meda talairawarawa. Nida digia meda talairawarawa, ena vinaka cake noda bula, ena totoka noda veigauna se bera mai. Koya e bibi duadua, ena kila kina na Kalou nida lomani koya vakalevu.—Raica na iKuri ni iVakamacala 4.

¹⁸ Sa solia vei keda o Jiova na lewaeloma meda rawa ni kila na ka e dodonu kei na ka e cala. Ke da vakavulica noda lewaeloma, ena rawa ni vukei keda meda “muria na nona ivunau.” Na cava gona na lewaeloma, eda na vakavulica vakacava? Meda raica mada.