1-3. (a) Era raica vakacava e levu na nodra cakacaka? (b) Na taro cava eda na veivosakitaka ena wase qo?

LEVU e veiyasa i vuravura era cakacaka vakaukaua mera qaravi ira kei na nodra vuvale. E levu tale era sega ni taleitaka na nodra cakacaka, eso mada ga era voraki na lai cakacaka e veisiga. Ke o va tale ga qori, cava mo cakava mo marautaka kina nomu cakacaka? O na taleitaka vakacava?

² E tukuna o Jiova: “Mera kana . . . mera gunu na tamata yadua, me marautaka na nona cakacaka kaukaua kece. Qo na isolisoli ni Kalou.” (Dauvunau 3:13) Ni buli keda o Jiova e biuta vei keda na gagadre ni cakacaka. E vinakata meda taleitaka na ka eda cakava.—Wilika Dauvunau 2:24; 5:18.

³ Na cava gona ena vukei keda meda marautaka noda cakacaka? Na cakacaka cava mera cata na lotu vaKarisito? Ena donu vakacava noda rai me baleta na cakacaka kei na noda sokaloutaki Jiova? Na cava na cakacaka bibi duadua?

4, 5. Na cava na rai i Jiova me baleta na cakacaka?

⁴ E dau taleitaka o Jiova na cakacaka. E tukuni ena  Vakatekivu 1:1: “Ena ivakatekivu, e bulia na lomalagi kei na vuravura na Kalou.” Ni bulia oti na vuravura kei na veika era tu kina, e qai kaya ni sa bau “totoka dina.” (Vakatekivu 1:31) E marautaka na noda Dauveibuli na veika e cakava.—1 Timoci 1:11.

⁵ E sega ni cegu ena cakacaka o Jiova. E kaya o Jisu: “E cakacaka tiko ga o Tamaqu me yacova mai qo.” (Joni 5:17) Eso ga na ka eda kila mai na ka vakatubuqoroqoro kece sa cakava tiko mai o Jiova. Sa digitaki ira na lai veiliutaki kei na Luvena o Jisu Karisito ena nona Matanitu. (2 Korinica 5:17) E dusimaki keda qai karoni keda tiko. Era sa mai kilai Jiova e milioni vakacaca na tamata ena vuku ni cakacaka vakavunau e veiyasa i vuravura ra qai nuitaka na bula tawamudu ena vuravura parataisi.—Joni 6:44; Roma 6:23.

6, 7. E vakacava na ivakarau ni cakacaka i Jisu?

⁶ E ucui Tamana vinaka o Jisu ni dau taleitaka tale ga na cakacaka. Ni bera ni mai bula e vuravura a “matai ligamaqosa” ni Kalou, e vakaitavi tale ga ena buli ni veika e lomalagi kei na vuravura. (Vosa Vakaibalebale 8:22-31; Kolosa 1:15-17) E dau gumatua ena cakacaka ni se bula voli e vuravura. E vulica me dua na matai maqosa ni se cauravou, a rairai taravale kei na kena iyaya. Na vinaka ni nona cakacaka e kilai kina me dua “na matai.”—Marika 6:3.

⁷ Ia na cakacaka bibi duadua e cakava e vuravura oya na nona vunautaka na itukutuku vinaka kei na nona vakavulici ira na lewenivanua me baleti Jiova. E tolu veimama na yabaki me vakacavara kina nona cakacaka vakaitalatala, e cakacaka vakaukaua ena matakacaca me yaco ena bogi levu. (Luke 21:37, 38; Joni  3:2) E taubaletaka e drau vakacaca na maile ena gaunisala kuvu ni vunautaka na itukutuku vinaka vei ira na lewenivanua.—Luke 8:1.

8, 9. Na cava e marautaka kina o Jisu na nona cakacaka?

⁸ E raica o Jisu me vaka na kakana na cakacaka ni Kalou. E solia vei koya na igu kei na kaukaua. So na siga e sega ni dau kana, ni levu na gauna e cakacaka tiko ga kina. (Joni 4:31-38) E vakayagataka vinaka e levu na gauna me vakavulica kina na veika me baleti Tamana. E tukuna kina vei Jiova: “Au sa vakalagilagi kemuni e vuravura ena noqu vakaotia na cakacaka oni lesia meu cakava.”—Joni 17:4.

⁹ E matata vinaka ni o Jiova kei Jisu erau dau cakacaka vakaukaua, rau qai marautaka na nodrau cakacaka. Eda vinakata meda “vakatotomuria na Kalou,” da qai ‘muria voleka na weniyavai Jisu.’ (Efeso 5:1; 1 Pita 2:21) Oya na vuna eda cakacaka kina vakaukaua da qai solia noda vinaka taucoko ena ka eda cakava.

10, 11. Cava ena vukei keda me donu tiko ga kina noda rai me baleta na cakacaka?

¹⁰ Nida tamata i Jiova eda cakacaka vakaukaua meda qaravi keda kei ira na noda vuvale. Eda na via marautaka na noda cakacaka, ia ena via dredre toka qori. Cava gona meda cakava ke da sega ni marautaka na noda cakacaka?

¹¹ Me donu noda rai. Eda na rairai sega ni veisautaka rawa na vanua eda cakacaka kina se na levu ni ka me caka, eda rawa ga ni veisautaka na noda rai. Ena veivuke vakalevu ke da kila na ka e vinakata o  Jiova. Kena ivakaraitaki: E namaka o Jiova vua na ulunivuvale me vakarautaka vinaka na veika e gadreva na nona vuvale. E kaya na iVolatabu ni “vinaka cake e dua e sega ni vakabauta” ni vakatauvatani vei koya e sega ni vakarautaka na veika e gadreva na nona vuvale. (1 Timoci 5:8) Ke o dua na ulunivuvale, mo cakacaka vakaukaua mo vakarautaka na veika eratou gadreva na nomu vuvale. Ke o sega mada ga ni taleitaka na nomu cakacaka, e vakamarautaki Jiova na nomu qaravi ratou na nomu vuvale.

12. Ena yaga vakacava noda cakacaka vakaukaua kei na daudina?

¹² Mo dau cakacaka vakaukaua qai daudina. Qo o na rawa ni marautaka kina na nomu cakacaka. (Vosa Vakaibalebale 12:24; 22:29) Ena nuitaki iko tale ga na nomu boso ni cakacaka. O ira na boso era dau taleitaki ira na daudina, nira na sega ni butako ilavo, iyaya, se gauna. (Efeso 4:28) Koya e bibi sara, ni kila o Jiova nomu cakacaka kaukaua kei na nomu daudina. Ena ‘vinaka na nomu lewaeloma’ ni o vakamarautaka na Kalou o lomana.—Iperiu 13:18; Kolosa 3:22-24.

13. Na cava tale e rawa ni yaco nida daudina e valenicakacaka?

¹³ Me vakacaucautaki o Jiova ena nomu itovo e valenicakacaka. Qori e dua tale na vuna meda taleitaka kina na noda cakacaka. (Taito 2:9, 10) Ena rawa ni uqeta e dua na nomu itokani e valenicakacaka me vuli iVolatabu na nomu ivakaraitaki vinaka.—Wilika Vosa Vakaibalebale 27:11; 1 Pita 2:12.

14-16. Na cava meda vakasamataka nida digia noda cakacaka?

¹⁴ E sega ni volai ena iVolatabu na cakacaka meda  digia na lotu vaKarisito se na kena me kua. Ia e rawa ni vukei keda na ivakavuvuli era tu kina meda vakatulewataka vinaka na noda cakacaka. (Vosa Vakaibalebale 2:6) Nida dikeva na ivakavuvuli vakaivolatabu de vinaka meda taroga eso na taro e volai toka e ra.

¹⁵ Vakacava e vinakati ena cakacaka qo meu cakava na ka e cata o Jiova? Eda sa vulica eso na itovo e cata o Jiova, me vaka na butako kei na lasu. (Lako Yani 20:4; Cakacaka 15:29; Efeso 4:28; Vakatakila 21:8)  Eda na qarauna gona meda kua ni digia na cakacaka e veisaqasaqa kei na ivakatagedegede i Jiova.—Wilika 1 Joni 5:3.

¹⁶ Na cakacaka qo e tokona se uqeta na ivakarau e sega ni vakadonuya o Jiova? Kena ivakaraitaki, vakacava ke soli vei iko na cakacaka mo dau kidavaki ira na vulagi ena valenibula ni vakalutu? E sega ni cala nomu kidavaki ira na vulagi. Ia o sa kila tiko na rai i Jiova me baleta na vakalutu. De o na sega sara ni vakaitavi ena veiqaravi ni vakalutu, ia o kila mai na rai i Jiova ni cala nomu tokona.—Lako Yani 21:22-24.

17. Cava ena vukei keda me marautaka kina na Kalou na noda vakatulewa?

¹⁷ Nida muria na ivakavuvuli vakalou, eda rawa ni vakataki ira e tukuni tiko ena Iperiu 5:14, “era vakayagataka nodra vakasama, e vakavulici me vakaduiduitaka na ka e donu mai na ka e cala.” Tarogi iko mada: ‘Vakacava era na tarabe eso keu digia na cakacaka qo? Ena vinakati meu biuti watiqu kei ratou na gone meu gole i vanuatani? Ena vakaleqai ratou vakacava?’

18. Na cava ena via dredre kina me vakaliuci noda sokalou?

¹⁸ E sega ni rawarawa meda vakaliuca noda sokaloutaki Jiova nikua ni “vakilai kina e levu na ka dredre.” (2 Timoci 3:1) Ena dredre dina meda kunea e dua na cakacaka da qai dei kina. E bibi meda qarava na noda vuvale, ia eda kila tale ga ni dodonu me liu na noda sokalou. Me kua ni bibi duadua ena noda bula na ka vakayago. (1 Timoci 6:9, 10) Eda na rawa  gona vakacava ni “vakadeitaka . . . na veika era bibi sara” qai vakarautaka na veika e gadreva na vuvale?—Filipai 1:10.

19. Nida nuitaki Jiova eda na raica vakacava na noda cakacaka?

¹⁹ Nuitaki Jiova vakatabakidua. (Wilika Vosa Vakaibalebale 3:5, 6.) E kila vinaka o Jiova na veika eda gadreva qai kauaitaki keda vakalevu. (Same 37:25; 1 Pita 5:7) E kaya na nona Vosa: “Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni. Ni a kaya [na Kalou]: ‘Au na sega sara ni laivi iko, au na sega tale ga ni biuti iko.’” (Iperiu 13:5) E sega ni vinakata o Jiova meda leqataka vakasivia na qaravi ni noda vuvale. E dau vakarautaka na veika era gadreva na nona tamata. (Maciu 6:25-32) Se mani cakacaka cava eda digia, eda na sega ni vakawalena na noda dau wilika na Vosa ni Kalou, vunautaka na itukutuku vinaka kei na soqoni vaKarisito.—Maciu 24:14; Iperiu 10:24, 25.

20. Eda na bula rawarawa vakacava?

²⁰ Me vinaka na matamu. (Wilika Maciu 6:22, 23.) E kena ibalebale qori mo bula rawarawa ga, mo rawa ni qaravi Jiova vinaka kina. E ka vakalialia meda raica ni bibi cake mai na noda veitokani kei na Kalou na ilavo, na ivakarau ni bula vinaka, kei na iyaya vovou. Na cava ena vukei keda ena ka meda vakaliuca? Meda saga meda kua ni dinau. Ke o sa dinau tu, tovolea mo vakalailaitaka se vakaotia nomu sausaumi. Ke da sega ni qaqarauni, eda na rawa ni vakayagataka vakalevu noda gauna kei na noda kaukaua ena ka vakayago, qai sega na  gauna ni masu, vuli, se vunau. Eda sega ni vinakata me vakaleqa na noda bula na kauaitaki ni ka vakayago, eda vinakata meda lomavakacegu ena veika sa tu me vaka na “kakana [kei] na isulu.” (1 Timoci 6:8) Se mani ituvaki cava eda sotava, e vinaka meda dau dikevi keda, meda kila na sala eda rawa ni qaravi Jiova vakavinaka kina.

21. Na cava meda vakatulewataka kina na ka meda vakaliuca?

²¹ Me donu na ka o vakaliuca. Bibi meda vakayagataka vinaka na noda gauna, kaukaua, kei na noda iyau.  Ke da sega ni qarauna, eda na rawa ni vakalusia noda gauna ena ka e sega ni bibi me vaka na vuli se ilavo. E kaya o Jisu: “Dou vakaliuca tiko ga na Matanitu ni Kalou.” (Maciu 6:33) Na vakatulewa eda cakava, noda itovo, ka eda cakava e veisiga, kei na noda isausau ena vakaraitaka na ka eda vakaliuca e lomada.

22, 23. (a) Na cava na cakacaka bibi duadua eda cakava na lotu vaKarisito? (b) Na cava ena vukei keda meda marautaka kina na noda cakacaka?

²² Na cakacaka bibi duadua oya na noda qaravi Jiova kei na vunautaki ni itukutuku vinaka. (Maciu 24:14; 28:19, 20) Me vakataki Jisu ga eda vinakata meda solia noda vinaka taucoko ena cakacaka qo. Eso era gole ena vanua e vinakati kina vakalevu na vunau. Eso era vulica e dua tale na vosa mera vunau kina. E vinaka mo vakatarogi ira. Era na tukuna ga nira marau qai vakainaki na nodra bula.—Wilika Vosa Vakaibalebale 10:22.

²³ Levu nikua era vakayagataka e levu na gauna ena dua na cakacaka se vica vata tu nodra cakacaka. Qori mera vakarautaka ga kina na veika e gadreva na vuvale. E kila vinaka o Jiova na ituvaki qori, e marautaka na ka eda cakava tiko me baleta na noda vuvale. Koya gona meda vakatotomuri Jiova kei Jisu mada ga ena noda cakacaka vakaukaua, se mani cakacaka cava eda digia. Meda kua ni guilecava ni noda cakacaka bibi duadua oya na noda qaravi Jiova kei na vunautaki ni itukutuku vinaka ni Matanitu ni Kalou. Qo ena vakamarautaki keda dina.