A VAKAWATI o Noa, e tolu na luvena tagane. Na yacadratou o Semi, Ame, kei Jefeca, qai tiko tale ga na dui watidratou. E walu taucoko na lewenivuvale i Noa.

E dua na ka vou a tukuna na Kalou me cakava o Noa, oya me taya e dua na waqa vakaitamera. Na irairai ni waqa oqo e vaka e dua na kisi balavu levu. A kaya na Kalou,‘Cakava me tabatolu, me vakarumu tale ga.’ Na veirumu oqo me ratou na tiko kina o Noa kei na nona vuvale, o ira na manumanu, kei na kakana mera na bula tiko kina.

A kaya tale ga na Kalou vei Noa me cakava sara vakavinaka na waqa me kua ni turu. E kaya na Kalou: ‘Au na vakarusa na ka kece ga e vuravura ena dua na waluvu levu. Ena mate o koya e sega ni tiko e waqa.’

Eratou talairawarawa vei Jiova o Noa kei iratou na luvena, ratou qai tekivu ta waqa. Ia era dredrevaki iratou na lewenivanua ra qai cakava tiko ga na ka ca. E sega ni dua e vakabauta na itukutuku i Noa me baleta na ka sa na vakarau cakava na Kalou.

E dede sara na ta tiko ni waqa baleta ni sa rui waqa levu. Ni sa oti sa qai kaya na Kalou vei Noa mera vakavodoki e yarua na manumanu ena so na kena mataqali, na ka tagane kei na ka yalewa. Ia e so tale na kena mataqali me yavitu. E kaya tale ga na Kalou mera vodo na veimataqali manumanu vuka. A cakava kece na ka oqori o Noa.

Oti oya sa qai vodo o Noa kei na nona vuvale. Sa qai sogota na katuba na Kalou. Eratou mai wawa toka vakavuvale ena lomaniwaqa. Raitayaloyalotaki iko mada mo tiko e lomaniwaqa, mo dou qai wawa toka. Ena yaco dina na waluvu me vaka e kaya na Kalou?