RAICA mada na iyaloyalo oqo. Oqori na kuita yadudua a tauca o Jiova vei Ijipita. O rawa ni raici Eroni ena imatai ni yaloyalo ni biuta tiko na nona ititoko ina Uciwai na Naile? E vuki na uciwai me dra, ra mate kina na ika qai boica na uciwai.

Na kena ikarua, e cakava o Jiova mera lade cake mai na boto ena Uciwai na Naile. Era sinai ena veivanua nira curuma na vale, na imocemoce, na ovani, na kava ni vavavi, kei na levu tale. Ia, nira sa mate na boto era kumuni ira vata kece ga ena dua na yasana na kai Ijipita, ra qai vakaboicataka na vanua.

Sa qai mokuta o Eroni na qele ena nona ititoko, qai vuki na kuvuniqele me kutu, oya na manumanu vuka lalai era dau veikati. Oqo na ikatolu ni kuita e Ijipita.

Na vo ni kuita e sega ni tarai ira na Isireli, na kai Ijipita ga. Na ikava ni kuita na lago lelevu, era curuma na nodra vale kece na kai Ijipita. Na ikalima ni kuita e yaco vei ira na manumanu nira mate kina na me, na sipi, kei na bulumakau ni Ijipita.

Tarava na nodrau kaburaka i macawa o Eroni kei Mosese na dravusa. Oqori na ikaono ni kuita, era tauvi bo kina na tamata kei na manumanu.

Oti oya, sa qai dodoka cake na ligana i lomalagi o Mosese, qai vakatauca mai na uca cevata o Jiova, kei na kurukuru. E se sega vakadua ni bau kune e Ijipita na mataqali draki ca vaka oqo.

Na ikawalu ni kuita na yavusa vodre. E se sega vakadua nira bau levu vaka oqo e Ijipita na vodre. Era kania na ka kece ga e se bula tu ni oti na uca cevata.

Na butobuto loaloa e ikaciwa ni kuita, qai siga tolu taucoko na kena butobuto tu na vanua, vakavo wale ga na nodra itikotiko na Isireli.

Sa qai kaya vei ira na nona tamata na Kalou mera boroya ena nodra katuba na dra ni dua na luve ni me se sipi. Sa qai lako yani ina vanua taucoko o Ijipita na agilosi ni Kalou. Ni raica ga na dra ena katuba e sega ni vakamatea e dua. Ia, na katuba e sega ni kune kina na dra, ena vakamatei na ulumatua ena vuvale oya vaka tale ga kina na ulumatua ni nodra manumanu. Oqo na ikatini ni kuita.

Ni oti vinaka sara ga na ikatini ni kuita sa qai kaya vei ira na Isireli o Fero mera lako. Nira sa vakavakarau rawa tu na tamata ni Kalou, na bogi tiko ga oya era biuti Ijipita kina.