E VIA kila o Josefa se ratou sa veisau na tuakana se sega. E qai kaya: ‘Dou sa mai vakararai lo ga. Mo dou mai raica na ka keimami leqa tu kina.’

‘Sega, e sega ni dina oqori,’ eratou kaya. ‘Keitou tamata daudina. Keitou veitacini kece. Keitou a lewe 12. E dua sa sega, ia o koya e gone e tiko vata kei tama i keitou mai vale.’

E vakalecalecava o Josefa me kua ni vakabauti iratou. A biuti Simioni ena valeniveivesu qai vakasukai iratou na kena vo ni sa solia oti na kakana me ratou kauta tale i vale. Sa qai kaya: ‘Ni dou sa lesu mai, dou kauta mai na tacimudou gone.’

Ratou lai tukuna vei tamadratou i Kenani na ka kece a yaco. E rarawa sara kina vakalevu o Jekope. E tagicaka: ‘Sa yali o Josefa, sa baci yali tale o Simioni. Au na sega ni solia na luvequ gone o Penijamini mo dou kauta.’ Ia ni sa lailai mai na kedratou, sa qai soli Penijamini me ratou kauta na tuakana i Ijipita me rawa ni so tale mai na kakana.

A marau dina o Josefa ni raici iratou vakaveitacini ni ratou lako tiko mai vata kei Penijamini. Ia e sega ni dua vei iratou e kila ni o koya na turaga rogo oya o Josefa. Sa qai cakava o Josefa e dua na ka me vakatovolei iratou kina na 10 na tacina vakacabecabe.

E vakarota nona dauveiqaravi me vakasinaita nodratou taga ena kakana, qai biuta lo ina taga i Penijamini na bilo siliva i Josefa. Eratou sa biubiu na veitacini, ia ni se sega ni yawa na vanua eratou lakova, sa talai ira yani na nona dauveiqaravi o Josefa vei iratou. Ra lai kaya: ‘Na cava dou sa butakoca kina na bilo siliva ni neimami turaga?’

Eratou kaya na veitacini: ‘Keitou sega ni butakoca, ia ke kunei vua e dua vei keitou, me vakamatei.’

Era vakaraica vinaka sara na taga kece na dauveiqaravi qai kune vei Penijamini, me vaka o raica tiko oqori. Ra qai kaya na dauveiqaravi: ‘Dou lako na kena vo, ia keitou na lako vata kei Penijamini.’ Na cava mada eratou na cakava na 10 na tacina vakacabecabe?

Eratou lesu vata kei Penijamini ina vale i Josefa. Sa qai kaya o Josefa: ‘Dou lesu kece i nomudou, ia o Penijamini me sa na noqu bobula.’

Sa qai vosa o Juta: ‘Kevaka keitou sega ni lesu vata kei koya, ena mate o tamaqu baleta ni dau taleitaki koya sara vakalevu. Au kerekere gona vakabibi, meu sa nomu bobula o yau, mo ni laivi koya me lako.’

Raica rawa o Josefa ni ratou sa veisau na tacina. Eratou sa veilomani. Meda raica na ka e qai vakayacora o Josefa.