RAICA mada na vuvale levu oqo. Eratou lewe 12 na luve i Jekope tagane. E so tale ga na luvena yalewa. O kila beka e so na yacadratou? Meda vulica mada e so.

O Lia a vakasucumi Rupeni, Simione, Livai kei Juta. E rarawa sara vakalevu o Rejeli ni sega ni vakaluveni. A mani solia kina nona yalewa cakacaka o Pila me vakaluveni kei Jekope, qai rua kina na luvena tagane o Tani kei Nafitalai. O Lia tale ga a soli Silipa nona yalewa cakacaka vei Jekope, rau sucu kina o Kata kei Aseri. Rua tale na luve i Lia o Isakari kei Sepuloni.

Sa qai vakaluveni ena dua na gauna e muri o Rejeli. E vakayacani koya me o Josefa. Eda na qai vulica tale vakamalua e levu na ka me baleti Josefa, ni a dua na tamata rogo. Oqo na lewe 11 na luve i Jekope tagane, eratou a sucu ena gauna a tiko kina vei Lepani na tama i Rejeli.

E so tale ga na luvena yalewa, ia e dua ga e tukuni ena iVolatabu, o Taina.

Dua na gauna sa via lesu tale i Kenani o Jekope. A soqona mai na nona vuvale kei na nona qelenimanumanu vakaitamera mera sa lesu tale yani ina vanua yawa oya.

Sega ni dede nodratou lai tiko i Kenani o Jekope kei na nona vuvale sa sucu e dua tale na luve i Rejeli tagane. A sucu ena nodratou lako tiko ina dua na vanua, mani mate kina o Rejeli ni sa rui dredre vua. E bula ga na gone qai vakayacani koya o Jekope me o Penijamini.

Ena vinaka meda nanuma kece na yacadratou na 12 na luve i Jekope ni vu mai kina na matanitu taucoko o Isireli. Era vakayacani na yavusa e 12 kei Isireli vei iratou na 10 na luve i Jekope tagane kei na rua na luve i Josefa. A se bula tale tiko ga o Aisake ni ratou sucu na tagane oqo, qai rairai marautaka ni levu na makubuna. Ia meda raica mada na ka e yacovi Taina na makubuna yalewa.