RAICI Mosese mada e sa dro tani tiko mai Ijipita! O raici rau na tagane erau cemuri koya tiko? O kila na vuna erau via vakamatei koya kina? Meda raica mada.

A susugi o Mosese ena vale i Fero, na iliuliu kei Ijipita. E tamata vuku qai rogo na yacana. Ia, e kila vinaka tu o koya ni sega ni kai Ijipita, ni rau Isireli na nona itubutubu rau qai bobula tale ga.

Ni sa yabaki 40 o Mosese, a via lai raici ira na wekana se ra sa vakacava tiko. Era bula vakaloloma dina nira dau mokulaki. Dua na siga e raica sara ga kina o Mosese na nona veimoku tiko e dua na kai Ijipita. Ni sega ni raica e dua tale me voleka tu, a mokuta me mate na kai Ijipita oya qai buluti koya ena nuku.

Na siga ga e tarava a baci lai raici ira tale na wekana. E nanuma o koya ni rawa ni vukei ira mera kua tale ni qai bobula tiko. Ni sa lako tiko yani, e raica ni rau veivala tiko e rua na Isireli, qai kaya vei koya e cala: ‘Na cava o mokuti tacimu tiko kina?’

E qai kaya mai: ‘O cei e kaya vei iko mo lewai keirau? O via vakamatei au me vaka o cakava vua na kai Ijipita?’

E rere o Mosese nira sa kila na lewenivanua na ka a cakava. A rogoca tale ga o Fero, qai tala yani e so na tamata me ra vakamatei koya. Oqori na vuna e dro tiko kina mai Ijipita o Mosese.

Ni biuti Ijipita mai o Mosese, a lako sara vakayawa ina vanua o Mitiani. E sotavi iratou kina na vuvale i Jecoro, qai vakawatitaka na luvena o Sipora. Sa qai dau vakatawani ira tu na sipi i Jecoro o Mosese. E 40 na yabaki na nona tiko ena vanua oqo. Sa mai yabaki 80 kina. Ni vakatawasipi tiko ena dua na siga, a yaco e dua na ka e se sega vakadua ni bau raica qai veisautaka sara ga na nona bula. Cega na tabana e tarava meda raica mada.