OTI tale e rua na yabaki, se kaivesu tiko ga o Josefa. A guilecavi koya sara tu ga na dautalowaini. Dua na bogi a rua na tadra i Fero, qai via kila na kedrau ibalebale. O raici koya ni moce tiko? Na siga ga a tarava e kacivi ira mai nona tamata vuku qai tukuna vei ira nona tadra, ia e sega ni dua e kila rawa na kena ibalebale.

Sa qai nanumi Josefa mai na dautalowaini. E kaya vei Fero: ‘Na gauna au a curu tiko kina e valeniveivesu, a tiko e kea e dua na turaga e rawa ni tukuna na ibalebale ni tadra.’ Sa qai tukuna o Fero me sereki mai o Josefa.

Ni tu e matana o Josefa e vakamacalataka vaka oqo o Fero na nona tadra: ‘Au a raica e vitu na bulumakau sa rairai vinaka qai yago vinaka, kei na vitu era suivotu sara. Ia, era kania na bulumakau yago vinaka na bulumakau suivotu.

‘Ena ikarua ni noqu tadra au a raica kina e vitu na sola sila matua ena dua ga na tolona. Oti, au qai raica e vitu tale na sola sila malai era ka lila. Ra qai tekivu tilomi ira na sila lelevu na sola sila lila.’

Sa kaya o Josefa vei Fero: ‘E tautauvata na kedrau ibalebale na tadra e rua oqori. Na vitu na bulumakau vinaka kei na vitu na sila matua e kena ibalebale na vitu na yabaki, kei na vitu na bulumakau suivotu kei na sila lila e vitu tale ga na yabaki. Ena vitu na yabaki ena levu kina e Ijipita na kakana qai vitu tale na yabaki ena dausiga.’

Sa qai tukuna o Josefa vei Fero: ‘Me lesi e dua na tamata vuku me raica na kumuni ni kakana ena vitu na yabaki vinaka. Era na qai sega kina ni viakana na tamata ena vitu na yabaki e tarava, ni sa na lailai kina na kakana.’

E taleitaka sara o Fero na vakasama oya, mani lesi Josefa me kumuna qai maroroya na kakana. Ena itutu oqo i Josefa e taravi Fero ga ena veiliutaki e Ijipita.

Ni oti e walu na yabaki ena gauna ni dausiga, sa raica o Josefa ni ratou lako tiko yani e so na tagane. O kilai iratou beka? O iratou na 10 na tuakana. E talai iratou tiko yani o Jekope na tamadratou i Ijipita, ni sa lailai na kakana mai Kenani. E kilai iratou rawa na tuakana o Josefa, ia eratou sega ga ni kilai koya. O kila na vuna? Ni sa qase o Josefa, qai sulumaka tu e dua tani na mataqali isulu.

Nanuma lesu tale o Josefa na nona tadra ni a se gone, ni ratou na mai cuva vua na tuakana. O se nanuma tiko na nomu a sa wilika oti oqori? Sa qai raica rawa o Josefa ni sa loma ni Kalou nona tiko e Ijipita, e tiko tale ga na vuna vinaka a talai koya kina na Kalou. Na cava o nanuma ni na cakava o koya? Da raica mada.