NIRA leqa na Isireli, era dau tagi ga vei Jiova. E sauma o Jiova na nodra kerekere ni solia vei ira e so na iliuliu yaloqaqa me vukei ira. E vakatokai ira na iVolatabu mera dauveilewai. Na imatai ni dauveilewai o Josua, qai taravi koya e so me vakataki Ocinieli, Eute, kei Samikari. Ia e rua na yalewa erau a vukei Isireli tale ga, o Tepora kei Jaeli.

O Tepora a dua na parofita yalewa. E dau tukuna vua e liu o Jiova na itukutuku. Oti sa qai tukuna vei ira na lewenivanua. E dauveilewai tale ga o koya. E dau lai dabe toka ena ruku ni dua na vuniniu ena delana. Era qai dau lako yani na tamata mera lai tukuna vua na nodra leqa.

Ena gauna oya e tui Kenani tiko kina o Japini. E 900 na nona qiqinivalu qai kaukaua sara na nona mataivalu. Era vakasaurarataki gona kina e levu na Isireli mera veiqaravi vua. E nona turaganivalu o Sisira.

Dua na siga a kaya o Tepora vei koya na Dauveilewai o Peraki: ‘Sa kaya o Jiova: ‘Mo kauta e 10,000 na sotia ina Ulunivanua o Tepori. Au na soli Sisira vei iko. Ena qaqa na nomu mataivalu.’

E kaya o Peraki vei Tepora: ‘Au na lako ke o lakovata kei au.’ A lako tale ga o Tepora qai kaya vei Peraki: ‘O na sega ni vakalagilagi ena ivalu oqo, ni o Jiova ena soli Sisira vua e dua na yalewa.’ A yaco sara ga na ka oqo.

E siro mai o Peraki ena Ulunivanua o Tepori me sota kei na mataivalu i Sisira. A cakava vakasauri o Jiova e dua na waluvu. Era luvu kina e levu na sotia, a mani dro o Sisira.

Sega ni dede sa yaco yani o Sisira ena valelaca i Jaeli. Sureti koya sara e loma qai solia vua e so na sucu me gunuva. E lutu sara ga kina nona moce. Taura sara mai o Jaeli na ivako levu e ivakadei ni nona valelaca qai tukia kina na ulu i Sisira. Ni qai yaco yani o Peraki sa mate tu o Sisira. E dina kina na veika a tukuna o Tepora.

Lakolako sa qai vakamatei tale ga o Tui Japini. Era mai tiko vinaka tale yani kina na Isireli.