RAICA mada na vuata rairai totoka erau cola tiko mai na tagane oqo. Raica na lelevu ni vaini. E rua sara ga na tamata me rau colata. Raica mada na lolo kei na pomekaraneti. Era kau mai na vanua o Kenani. O se nanuma tiko ni vanua o Kenani na vanua eratou a tiko kina o Eparama, Aisake, kei Jekope? Ni sa sega na kakana, eratou toki i Ijipita o Jekope kei na nona vuvale. Ni oti tale e 216 na yabaki, sa liutaki ira lesu na Isireli o Mosese i Kenani. Ra sa mai tiko oqo ena vanua liwa, na yacana o Ketesa.

Era tamata ca na lewe i Kenani. Mani tala sara kina o Mosese e 12 na yamata, qai kaya vei iratou: ‘Dou lai raica se vica na tamata era tiko kina, e vakacava na levu ni nodra kaukaua. Ke qele vinaka ni teitei dou kauta mai kina e so na kena vuata.’

Ni ratou lesu mai na yamata eratou kaya vei Mosese: ‘E vanua vinaka dina.’ Eratou qai vakaraitaka vei Mosese e so na vuata me kena ivakadinadina. Ia eratou kaya e 10 na yamata: ‘Era tiko e kea na tamata lelevu ra qai kaukaua. Eda na mate ke da via lai taukena na vanua.’

Era rere na Isireli nira rogoca na ka oqo. Era qai kaya: ‘E vinaka cake meda a mate ga mai Ijipita se na vanua oqo. Eda na vakamatei ena ivalu, era na kau vakavesu na luveda kei na watida. Meda digia tale e dua na iliuliu vou me isosomi kei Mosese, meda lesu kina i Ijipita.’

Ia erau nuitaki Jiova e rua na yamata, rau qai saga me rau vakacegui ira na tamata. Na yacadrau o Josua kei Kelepi. Erau kaya: ‘Mo ni kua ni rere. Ni tiko vata kei keda o Jiova. Ena rawarawa sara noda taukena na vanua.’ Ia era sega ni vakarorogo na tamata. Era via vakamatei Josua kei Kelepi.

E cudru kina vakalevu o Jiova qai kaya vei Mosese: ‘Era na sega ni butuka na vanua o Kenani na tamata e 20 nona yabaki se sivia. Era a raica na noqu cakamana mai Ijipita kei na vanua liwa, era se sega tiko ga ni vakabauti au. Era na veilakoyaki voli ena vanua liwa me 40 na yabaki me yacova ni mate na iotioti ni tamata. Erau na lako ga o Josua kei Kelepi ina vanua o Kenani.’