ERA sa vakarau lai valuti ira tiko na Isireli na veikoro mai Kenani. Era nanuma nira na qaqa. Ia e sega ni vaka oqori na nodra nanuma na lewe ni dua na koro e toka volekata na vanua era tiko kina na Isireli. Oqo o ira na kai Kipioni. Era vakabauta ni Kalou e vukei ira tiko na Isireli. Era sega gona ni via veivala kei na Kalou. O kila se cava era qai cakava na kai Kipioni?

Era qai cakava na veika me nanumi kina nira lako sara mai vakayawa. E so era dara tu yani na ivava makawa kei na isulu kadresu. Era vakavodoka ena nodra asa e so na taga makawa, kei na madrai bulagi. Ra qai lai kaya vei Josua: ‘Keitou lako sara tiko mai vakayawa ni keitou rogoca na veika kece e cakava vei kemuni mai Ijipita na nomuni Kalou o Jiova. Era mani tukuna na neimami iliuliu me keimami vakarautaka na keimami ivaqa. Me mai tukuni kina vei kemuni na itukutuku oqo: “Ni keimami sa nomuni tamata. Mo ni yalataka ni oni na sega ni valuti keimami.” Raica mada ni sa madra na neimami isulu ena neimami lako mai vakayawa, sa bulagi tale ga na keimami madrai.’

E vakabauti ira o Josua kei ira na iliuliu tale e so. Era sa qai yalataka nira na sega ni valuti ira. Ia sa qai kilai ni oti tale e tolu na siga nira tiko voleka ga ekea.

E taroga o Josua: ‘Na cava dou a kaya kina ni dou lako mai vakayawa?’

Era kaya na kai Kipioni: ‘Keimami rogoca ni sa yalataka na nomuni Kalou o Jiova me solia vei kemuni na vanua kece o Kenani. Keimami rere gona de oni na vakamatei keimami.’ Era dina tiko ga na Isireli ena nodra yalayala, ra qai sega ni valuti ira na kai Kipioni. Era mai dauveiqaravi ga vei ira na Isireli.

E cudru na tui kei Jerusalemi ni rau sa mai tovata o Isireli kei Kipioni. Sa qai kaya vei iratou e va tale na tui: ‘Dou mai tokoni au meu valuti ira na kai Kipioni.’ Eratou sa mai tuvaivalu sara ga oqo na tui me vala kei ira na kai Kipioni. E ka vakavuku beka na nona mai tovata kei Isireli o Kipioni? Eda na qai raica.