RAICA mada na tagane e tiko e loma ni wai. E sa tu ena dua na ituvaki leqataki. Sa voleka ni tilomi koya na ika! O kila se o cei na tagane oqo? Na yacana o Jona. Meda raica mada na vu ni nona leqa.

O Jona e dua na parofita i Jiova. Sega ni dede na mate i Ilaisa na parofita, e kaya o Jiova vei Jona: ‘Lako ina koro levu o Ninive. Ni sa rui levu na nodra ivalavala ca, au vinakata mo lai vosa vei ira.’

Ia e sega ni via lako o Jona. E lai vodo ena dua na waqa me soko ina dua tani tale na vanua. E sega ni marautaka o Jiova nona dro o Jona. Sa qai vakavuna me liwa e dua na cagi kaukaua, ni voleka sara ga ni luvu kina na waqa. Era rere vakalevu na kaiwaqa, ra dui kere veivuke vua na nodra kalou.

Oti sa qai kaya o Jona: ‘Au qaravi Jiova, na Kalou e bulia na lomalagi kei na vuravura. Au drotaka mai na ka e a talai au kina.’ Era taroga: ‘Na cava me keimami cakava vei iko me ruru kina na cagi?’

E kaya o Jona: ‘Dou viritaki au i wai ena qai maravu na wasawasa.’ Era sega ni via cakava oqori na kaiwaqa, ia ni sa kaukaua mai na cagi era sa qai viritaki Jona i wai. Sega ni bera sa maravu tale yani na wasawasa.

Ni lutudromu tiko o Jona, sa qai tilomi koya e dua na ika levu. Ia e sega ga ni mate. E tolu na siga kei na tolu na bogi na nona tiko e kete ni ika. E veivutunitaka o Jona nona sega ni talairawarawa vei Jiova me lako i Ninive. Na cava e qai cakava?

Sa qai masu vei Jiova me vukei koya. A vakavuna o Jiova me luaraki Jona na ika ina vanua mamaca. Oti oya sa qai lako o Jona i Ninive. E ka ni vuli vakacava vei keda oqo? Meda dau cakava na ka kece e kaya o Jiova.