O KILA beka se cava e tukuna tiko na yalewa lailai oqo? E tukuna tiko na veika e baleti Ilaisa na parofita i Jiova kei na veika veivakurabuitaki e vukei koya kina o Jiova me cakava. E sega ni kilai Jiova na marama oqo ni sega ni Isireli, e marama ni Siria. Na cava mada e cakava tiko ena nona vale na goneyalewa lailai oqo?

Na marama e wati Neamani na turaganivalu ni Siria. Era a vesuki koya mai na goneyalewa lailai ni Isireli na kai Siria ra qai kauti koya yani vei wati Neamani me lai nona dauveiqaravi.

E tauvi Neamani tu na vukavuka. Na vukavuka e dau rawa ni tavoci sara ga mai kina na kuli ni yago. Ia oqo na ka e tukuna tiko na goneyalewa lailai vei wati Neamani: ‘Au diva ke rawa ni lako na noqu turaga vei Ilaisa na parofita i Jiova e Isireli. Ena vakabulai koya mai na nona vukavuka.’ Sa qai lai tukuni vei Neamani e muri.

E vinakata vakalevu o Neamani me vakabulai, mani nanuma kina me lako i Isireli. Ni yaco yani e lako sara ina vale i Ilaisa. Sa qai tala e dua nona dauveiqaravi o Ilaisa me lai tukuna vei Neamani me sili vakavitu ena Uciwai na Joritani. E cudru vakalevu o Neamani, qai kaya: ‘E vinaka sara na uciwai mai noqu vanua mai na veiuciwai e Isireli.’ Ni tukuna oti ga na vosa oya sa lesu tale o Neamani.

Ia e kaya vua e dua nona dauveiqaravi: ‘Ke kaya saka vei kemuni o Ilaisa mo ni cakava e dua na ka dredre, au kila ni o ni na vakayacora ga. Na cava o ni sega ga ni lai sili kina, me vaka e kaya?’ E rogoci koya nona dauveiqaravi o Neamani qai lai sili vakavitu ena uciwai na Joritani. E oti sara ga kina vakadua na nona vukavuka qai mai bulabula tale tu yani na yagona.

E marau sara vakalevu o Neamani mani lesu tale vei Ilaisa qai kaya: ‘Au sa qai kila oqo ni Kalou ni Isireli e Kalou dina duadua ga ena vuravura taucoko. Mo ni taura mada na noqu isolisoli.’ Sa qai kaya o Ilaisa: ‘Sega, au na sega ni taura.’ E kila o Ilaisa ni sega ni dodonu me taura na isolisoli baleta ni o Jiova ga a vakabulai Neamani. Ia o Kiesai na dauveiqaravi i Ilaisa e vinakata na isolisoli.

Oqo na ka e qai cakava o Kiesai. Ni sa lako o Neamani, sa qai cici muri koya yani qai kaya vua: ‘Sa talai au mai o Ilaisa ni vinakata e so na nomu isolisoli me nodra na nona itokani era se qai yaco ga mai.’ E lasu o koya. Ia ni sega ni kila o Neamani, sa qai solia vei Kiesai e so na isolisoli.

Ni lesu yani o Kiesai, e kila o Ilaisa na ka a cakava ni sa tukuna oti vua o Jiova. E kaya vei Kiesai: ‘Ena vuku ni ka ca o cakava, ena tauvi iko na vukavuka i Neamani.’ Mani tauvi koya sara ga vakasauri na vukavuka!

Na cava eda vulica rawa e ke? Na imatai, meda vakataki koya na goneyalewa lailai ni dau tukuna na veika baleti Jiova. Na ikarua, meda kua ni dokadoka vakataki Neamani ni se qai yaco ga yani i Isireli, ia meda talairawarawa vei ira na dauveiqaravi ni Kalou. Kena ikatolu, meda kua ni cavuta na vosa lasu me vaka e cakava o Kiesai. Eda vulica gona e levu na ka nida wili iVolatabu.