OQO na iyaloyalo ni dua na parataisi, me vaka a rairai vakaraitaka na Kalou vei Aisea na nona parofita. A sega ni dede na nona bula o Aisea ni mate oti o Jona.

Na parataisi e kena ibalebale na “were basenikau” se “rara rairai vinaka.” O na nanuma lesu kina e dua na vanua o sa raica oti ena ivola oqo. Na kena irairai e vaka sara ga na were totoka a bulia na Kalou o Jiova vei Atama kei Ivi. Ena rawa beka ni parataisi na vuravura taucoko?

A kaya o Jiova vei Aisea na nona parofita me vola na veika e baleta na parataisi vou me nodra na tamata ni Kalou. E kaya: ‘Na olifa kei na sipi era na bula veimaliwai. Era na kana vata na bulumakau gone kei na laione gone, ena qaravi ira na gone lalai. Ena sega mada ga ni mavoa na gone ke qito volekata na gata.’

E levu era na kaya: ‘Ena sega ni rawa oqori baleta ni sega ni oti rawa na leqa e vuravura.’ Ia vakasamataka mada: A vakacava tu na itikotiko a vakarautaka vei Atama kei Ivi na Kalou?

A biuti rau ena dua na parataisi na Kalou. Rau a sega ni dei ena itikotiko totoka oya, rau qase qai mate yani baleta ni rau talaidredre vua. Ia e yalataka na Kalou ni na solia vei ira era lomani koya na veika vata ga a nakita vei Atama kei Ivi.

Ena parataisi oya e sa na sega tale kina ni dua na ka me vakatubuleqa se rarawa. Ena yaco na sautu dina. Era na bulabula qai mamarau na tamata. Ena vaka sara ga na ka a vinakata na Kalou ena ivakatekivu. Ia eda na qai vulica se na cakava vakacava oqo na Kalou.