RAICI ira mada na tamata era dredrevaki koya tiko na cauravou oqo. O kilai koya? Oqo o Jeremaia, e dua na parofita nuitaki ni Kalou.

Ni se qai tekivu vakarusai ira na matakau o Tui Josaia, sa lesi Jeremaia o Jiova me nona parofita. E nanuma o Jeremaia ni sega ni rawa baleta ni sa rui gone. Ia e kaya o Jiova ni na vukei koya.

E tukuna o Jeremaia vei ira na Isireli mera muduka nodra cakava tiko na ka ca: ‘Kua ni muri ira na lewe ni veimatanitu. Era qarava tiko na kalou lasu.’ Ia e levu na Isireli era vinakata mera sokalou ina matakau, era sega ni via sokalou vei Jiova na Kalou dina. Ni tukuna vei ira o Jeremaia ni na totogitaki ira na Kalou ena vuku ni nodra caka ca era dredrevaki koya ga.

Oti tale e vica vata na yabaki, sa qai mate o Josaia. E tui sara o Jioiakimi na luvena ni oti ga e tolu na vula. E tukuna tiko ga vei ira na lewenivanua o Jeremaia: ‘Ena vakarusai o Jerusalemi ke dou sega ni veisautaka na nomudou itovo ca.’ Era tauri Jeremaia na bete ra qai kailavaka: ‘E dodonu mo vakamatei ni o tukuna tiko na veika oqo.’ Era sa qai kaya vei ira na turaga ni Isireli: ‘Me vakamatei o Jeremaia ni vosa vakacacataka na noda koro.’

Na cava sa na qai cakava o Jeremaia? E sega ni bau rere qai tukuna vei ira kece: ‘Sa talai au mai o Jiova meu kaya vei kemudou na veika oqo. Ke dou sega ni veisautaka na nomudou itovo ca, ena vakarusai Jerusalemi o Jiova. Ia nanuma tiko na tikina bibi oqo: Ke dou vakamatei au, dou sa vakamatea tiko e dua e sega ni cala.’

Era vakabulai Jeremaia na turaga ni vanua, ia era sega ga ni veisautaka na Isireli na nodra ivakarau ca. Emuri sa qai mai valuti Jerusalemi o Nepukanesa na tui Papiloni. Era kau gona kina na Isireli mera lai veiqaravi i Papiloni. E kauti ira e vica vata na udolu o Nepukanesa. Vakasamataka mada me so e kauti iko tani mai na nomu koro ina dua na vanua tani!