E BACI saga tale o Saula me vesuki Tevita. E kauti ira yani e 3,000 na sotia mera lai vaqarai koya. Ni sa kila oqo o Tevita, sa qai tala yani e so na yamata mera lai raica mai na vanua e keba tiko kina o Saula kei na nona mataivalu ena bogi oya. Sa qai taroga e rua na nona tamata o Tevita: ‘O cei vei kemudrau ena lako vata kei au ina keba i Saula?’

E sauma o Apisai na luve i Seruaia na gane i Tevita: ‘O yau.’ Ni se moce tu ga o Saula kei ira na nona tamata, erau lako lo yani i loma ni keba o Tevita kei Apisai. Erau taura na moto kei na tavaya ni wai i Saula a koto volekata na uluna. E sega ni dua e bau vakila se rogoci rau nira moce lutu kece.

Raici rau tale mada o Tevita kei Apisai. Erau sa tu ena dua na delana. E kaci tiko o Tevita vua na turaganivalu ni Isireli: ‘I Apineri, na cava o sega ni taqomaka kina na nomu turaga na tui? Raica! Sa e vei na nona moto kei na tavaya ni wai?’

E yadra mai o Saula qai kila sara ni domo i Tevita. Raici koya mada kei Apineri ni rau rai cake tiko i delana. E taroga: ‘O iko beka qori Tevita?’

E sauma o Tevita: ‘Io, noqu turaga na tui.’ Sa qai taroga yani o Tevita: ‘Na cava o via vesuki au tiko kina? Na ka ca cava beka au a cakava vei kemuni? Oqo na nomuni moto kemuni na tui. Tala mai e dua nomuni tamata me kauta yani.’

E kaya o Saula: ‘Vosota, sa ca dina na ka au cakava oqori, e ka lialia sara ga.’ Rau sa qai veitalatala, lesu tale o Saula ina nona vale. E kaya lo ga o Tevita: ‘Dua na siga ena vakamatei au o Saula. Meu sa dro mada ina nodra vanua na kai Filisitia.’ Oqori na ka a qai cakava. A vakaisini ira na kai Filisitia mera vakabauta ni sa mai tovata kei ira.

Ena dua na gauna emuri ra qai lako na kai Filisitia mera vala kei ira na Isireli. Ena ivalu oqo rau mate ruarua kina o Saula kei Jonacani. Oqo e rarawa kina vakalevu o Tevita. E mani bulia kina e dua na sere totoka qai lagata: ‘Au sa rarawa ena vukumu, taciqu Jonacani. O dau vinaka vei au!’

Oti oqori sa qai lesu tale o Tevita ina koro o Epironi e Isireli. E kea era veileti tiko kina na lewenivanua, e so era vinakati Isiposeci na luve i Saula me tui, e so tale era vinakati Tevita. Ia era qai qaqa na tamata i Tevita. E buli me tui o Tevita ni sa yabaki 30. E vitu veimama na yabaki nona veiliutaki e Epironi. Eratou a sucu e kea e so na luvena tagane, o Aminoni, Apisalomi kei Atonaija.

Lakolako, sa ra qai valuta na koro totoka o Jerusalemi, o Tevita kei ira na nona tamata. A liutaka na mataivalu o Joapi, e dua tale na luve i Seruaia na gane i Tevita. Sa qai digitaki Joapi o Tevita me turaganivalu. Oqo sa qai tekivu veiliutaki o Tevita ena korolevu o Jerusalemi.