O KILAI ira na tamata oqo kei na ka era cakava tiko? Era sa lako tiko mera lai vala, ia o ira na ilawalawa sulu vulavula era lagasere tiko. Ia o na rairai taroga: ‘Na cava era sega ni vakaiseleiwau kina se tauri moto o ira na matasere?’ Meda raica mada.

E tui ni matanitu yavusa e rua e Isireli o Jiosafati. A bula donuya na veiliutaki i Tui Eapi kei Jesepeli ena 10 na yavusa mai na vualiku. E tui vinaka o Jiosafati me vakataki tamana o Esa. Era mai marautaka toka yani vakadede na yavusa e 2 na veika vinaka era sotava tiko.

Ia oqo e dua na ka e yaco e vakavuna mera rere na tamata. Era kaya vei Jiosafati na nona dau vakauitukutuku: ‘Era sa lako tiko mai na mataivalu levu ni vanua o Moapi, Amoni, kei na Ulu i Sia mera mai valuti iko.’ Era mani lai soqoni vata sara kina i Jerusalemi e levu na Isireli mera kerea na veivuke i Jiova. Era lako ina valenisoro, qai masu o Jiosafati: ‘I Jiova na neimami Kalou keimami sa sega ni rawata e dua na ka. Keimami kerea nomuni veivuke.’

E rogoca nodra kerekere o Jiova, sa qai kaya o Jiosafati vua e dua na nona dauveiqaravi me tukuna vei ira na tamata: ‘E sega ni nomuni na ivalu, e nona ga na Kalou. Ni tu ga qai raica na nona vakabulai kemuni o Jiova.’

Ena mataka ga e tarava sa tukuna o Jiosafati vei ira na tamata: ‘Dou nuitaki Jiova!’ Sa qai biuti ira na matasere mera liu tiko vei ira na sotia. Era lagasere ni vakavinavinaka vei Jiova nira taubale tiko. O kila se cava a yaco nira sa voleka yani ena vanua ni ivalu? E vakavuna o Jiova mera vala ga vakataki ira na meca. Nira qai yaco yani na Isireli, era sa mate kece tu!

E vuku o Jiosafati ni nuitaki Jiova. Ena ka vukutaki tale ga meda dau nuitaki Jiova.