SA OTI oqo e 10 na yabaki nona kauti ira na Isireli vuli vinaka o Tui Nepukanesa i Papiloni. Ia raica mada na veika sa yaco tiko oqo! Sa kama yavu o Jerusalemi. Era le levu sara na Isireli era mate kina, era sa kau vakavesu i Papiloni na kena vo.

Oqo sara ga na ka a tukuna tiko vei ira na parofita i Jiova ni na yaco ke ra sega ni veisautaka na nodra itovo ca. Ia era sega ni vakarorogo na Isireli, era qaravi kalou lasu tiko ga. Sa rauta vinaka mera totogitaki. Eda kila na veika ca era cakava tiko na Isireli ni tukuna na parofita ni Kalou o Isikeli.

O kila se o cei o Isikeli? O koya e dua vei ira na cauravou a kauta o Tui Nepukanesa i Papiloni ni bera ni rusa o Jerusalemi ena 10 na yabaki sa oti. Ena gauna vata oya a kau tale ga kina i Papiloni o Taniela kei iratou na nona itokani, o Setareki, Mesaki, kei Apetiniko.

Ni se tiko ga mai Papiloni o Isikeli, sa vakaraitaka vua o Jiova na veika ca e caka tiko ena valenisoro e Jerusalemi. E cakamana o Jiova me rawa ni sarava kina o Isikeli na veika kece e caka tiko ena valenisoro, dina ni se tiko ga mai Papiloni. E kurabuitaka vakalevu na veika e raica!

E kaya o Jiova vei Isikeli: ‘Raica na veika vakasisila era sa vakayacora tiko na tamata ena valenisoro. Sa robota tu na lalaga na iyaloyalo ni veimataqali manumanu kei na gata. Era qai sokaloutaka tiko na Isireli!’ E vola sara ga o Isikeli na veika kece e raica.

E taroga vua o Jiova: ‘O raica rawa na veika era cakava lo tiko na iliuliu e Isireli?’ Io, e raica rawa tale ga o Isikeli. Era qaravi kalou lasu tiko e 70 na tagane. Era kaya tiko: ‘Sa sega ni raici keda o Jiova. E sa biuta na vanua.’

Sa qai vakaraitaka vei Isikeli o Jiova e so na yalewa era dabe tiko ena matamata ni valenisoro ina vualiku. Era qarava tiko na kalou lasu o Tamusi. E raica tale ga o Isikeli e rauta ni 25 na tagane ena icurucuru ni valenisoro i Jiova. Era cuva tiko ina tokalau mera sokaloutaka na matanisiga!

E kaya o Jiova: ‘O ira oqo era sega ni dokai au. Era sega wale ga ni cakava na ka ca, era mai cakava sara ga ena noqu valenisoro!’ Sa qai yalataka o Jiova: ‘Era na vakila na noqu cudru, au na sega ni lomani ira nira sa vakarusai.’

Ni oti ga e tolu na yabaki na nona a vakaraitaka o Jiova vei Isikeli na veika oqo era saqati Tui Nepukanesa na Isireli. Sa qai lai vala kei ira. Oti e dua veimama na yabaki era basuka na bai kei Jerusalemi na kai Papiloni ra qai vakama na koro. E levu na Isireli era mate se ra kau vakavesu i Papiloni.

A cava e biuta kina o Jiova me rusa vaka oqo o Isireli? Io, ena vuku ga ni nodra sega ni rogoci koya mera talairawarawa ina nona lawa. E vakaraitaka ni bibi meda cakava ga na veika e kaya na Kalou.

Ni se qai rusa ga o Jerusalemi, e vica ga na tamata era a vakatarai mera tiko ena vanua o Isireli. A lesi Kitalaia o Nepukanesa me lewai ira tiko na ilawalawa oqo. Ia e so na Isireli era qai labati Kitalaia. Era rere na kena vo de ra na qai lesu mai na kai Papiloni, ra qai vakamatei kece ena vuku ni laba oqo. Era mani vakaukauataki Jeremaia mera dro vata i Ijipita.

Sa qai lala tu na vanua o Isireli. E sega ni dua e tiko kina me 70 na yabaki. E laladidi. Ia a yalataka o Jiova ni na kauti ira lesu na nona tamata ina vanua o Isireli ni oti e 70 na yabaki. Ni bera oya na cava mada e sa yacovi ira tiko na tamata ni Kalou mai Papiloni? Meda raica mada.