NI BERA ni mate o Tevita, e solia vei Solomoni na peleni ni kena tara na valenisoro i Jiova. E tekivu tara na valenisoro ena ikava ni yabaki ni veiliutaki i Solomoni qai vitu veimama na yabaki na kena tara. Era lewe vica vata na udolu na tagane era tara na valenisoro. E levu tale ga na kena isau, baleta ni vakayagataki kina vakalevu na koula kei na siliva.

E tiko ena valenisoro e rua na rumu lelevu, me vaka na kena e tiko ena valeniveitavaki. Ia e vakaruataki na kedrau lelevu ke vakatauvatani kei na rumu ena valeniveitavaki. E lai biuta na kato ni veiyalayalati o Solomoni ena rumu lailai ena loma ni valenisoro. E lai biu tale ga ena ikarua ni rumu na iyaya tale e so era a maroroi tu ena valeniveitavaki.

A caka e dua na soqo levu ni sa tara oti na valenisoro. Sa qai tekiduru o Solomoni ena mata ni valenisoro me masu, vaka ga o raica toka oqori. E kaya vei Jiova: ‘Sa sega mada ga ni rauti kemuni na lomalagi kece, sa qai lailai sara na vale au tara. Ia, noqu Kalou, yalovinaka ni rogoca na nodra masu na nomuni tamata nira mai masu ena vale oqo.’

Ni masu oti o Solomoni, e lutu mai lomalagi na bukawaqa qai kania na isoro manumanu a vakacabori. E cilava na valenisoro e dua na rarama mai vei Jiova. E vakaraitaka ni a vakarorogo tiko o koya, e vakadonuya na valenisoro kei na masu i Solomoni. Sa ra qai mai sokalou ena valenisoro na Isireli, sa oti nodra dau lai sokalou tiko ena valeniveitavaki.

E ka marautaki vei ira na lewenivanua na nona veiliutaki tu vakavuku o Solomoni. Ia ni toso na veiyabaki sa vakawatitaka o koya e levu na yalewa era sega ni qaravi Jiova. Rawa ni o raica sara ga e dua vei ira ni sokaloutaka tiko na matakau. Lakolako, era vakamuai Solomoni tale ga na watina me qarava na kalou tani. E veisautaki koya vakacava oqo? E oti kina vakadua nona dau caka vinaka, sa dau cudrucudru, ra qai sega ni taleitaki koya na lewenivanua.

E cudruvi Solomoni kina o Jiova, qai kaya vua: ‘Au na kauta tani vei iko na nomu matanitu. Au na qai solia tale vua e dua ena gauna sa na veiliutaki kina na luvemu. Ia, au na sega ni kauti ira tani kece na lewe ni matanitu mai vua na luvemu.’ Meda raica mada se yaco vakacava oqo.