NA CAVA e yaco tiko oqo? E vakayacori tiko e dua na kana magiti levu. A sureti ira e duanaudolu na tamata rogo o tui Papiloni. Era vakayagataka tiko na bilo koula, na bilo siliva, kei na dari a kau mai na valenisoro i Jiova mai Jerusalemi. Ia vakasauri ga nodra raica ni sa volavola ena lalaga e dua na liga ni tamata. Era rere kece.

E tui tiko ena gauna oqo o Pelisasari na makubu i Nepukanesa. A kailavaka mera kau mai na nona tamata vuku. E kaya na tui: ‘Ke dua e wilika rawa na volavola qai tukuna vei au na kena ibalebale, au na solia vua e levu na iyau, au na lesi koya tale ga me ikatolu vei keitou na liutaka tiko na matanitu.’ Ia e sega ni dua vei ira na tamata vuku e wilika rawa se kila na kena ibalebale.

E curu yani ina valenikana na tina i koya na tui ni rogoca na vosavosa. E kaya vua na tui: ‘Yalovinaka dou kua so ni taqaya. E tiko e dua ena nomu matanitu e kila na Kalou tabu. Ena gauna a tui tiko kina na tukamu o Nepukanesa, a lesi koya me turaga vei ira na tamata vuku kece. Na yacana o Taniela. Mo lai kauti koya mai me tukuna na kena ibalebale.’

A lai kau sara mai o Taniela. A sega ni via taura e dua na ka ni loloma. E vakamacalataka ga vei Pelisasari na vuna a kauta laivi kina o Jiova na itutu vakatui i tukana o Nepukanesa. ‘Ni rui qaciqacia qai totogitaki koya o Jiova.’

E kaya tale o Taniela: ‘Oni kila vinaka na ka a yacovi tukamuni, ia oni qai qaciqacia tiko ga me vakataki koya. Oni gunu mai na bilo kei na dari a kau mai na vale i Jiova. Oni vakalagilagia na kalou era caka mai na kau kei na vatu qai sega ni dokai koya na Dauveibuli Levu. E vakavuna gona na Kalou na volavola oqori ena lalaga.’

E tomana o Taniela: ‘Oqo na ka sa volai, MINI, MINI, TIKELI, UFASINI.’

‘E ibalebale ni MINI ni sa lewa na Kalou me mai cava na nomuni matanitu. Na TIKELI ni oni sega ni vinaka ena gauna oni vakarautaki kina ena ivakarau. Na UFASINI e kena ibalebale ni sa soli vei ira na kai Mitia kei Perisia na nomuni matanitu.’

Ni se vosa tiko ga o Taniela, era sa kabakoro mai na kai Mitia kei Perisia. Era vakamatei Pelisasari ra qai taura vakaukaua na koro! E yaco dina ena bogi ga oya na veika a volai ena lalaga. Ia na cava sa na qai yacovi ira na Isireli? Eda na qai vulica vakamalua na tikina oqori, ia meda raica mada oqo se cava sa yacovi Taniela tiko.