A talai yani na agilosi o Keperieli vua na goneyalewa o Meri. E kaya vua ni na dua na luvena ena qai veiliutaki vakatui me tawamudu. Na luvena gona o Jisu, a sucu ena valenimanumanu. Era lako tale ga yani kina na ivakatawa ni sipi mera lai sikovi koya. Emuri era vakamuria yani e dua na kalokalo e so mai Natuicake mera sikova na gone. Eda na vulica se o cei a vakavuna nodra raica na kalokalo, qai vakabulai vakacava o Jisu mai vei ira era via vakamatei koya.

Tarava nona veivosaki o Jisu kei ira na ivakavuvuli ena valenisoro ni se qai yabaki 12. A papitaiso o Jisu ni oti tale e tinikawalu na yabaki qai tekivutaka na cakacaka a talai mai kina i vuravura, oya me vunautaka qai vakatavuvulitaka na Matanitu ni Kalou. Sa qai digia e 12 na tagane me ratou nona yapositolo, me ratou vukei koya tale ga ena cakacaka oqo.

E cakava tale ga e levu na cakamana o Jisu. A vakani ira na udolu na tamata ena vica wale ga na ika lalai kei na vica na ibuli madrai. E vakabulai ira na tauvimate qai vakaturi ira na mate. Kena itinitini, eda na qai vulica e levu tale na ka a yaco vei Jisu ni bera ni mate, kei na ivalavala ni nona mate. A vunau voli o koya me rauta ni tolu veimama na yabaki. Na veika e talanoataki ena IWASEWASE 6 e sivia toka e 34 na yabaki.