RAICI koya mada na gone tagane lailai e vosa tiko oqo vei ira na qase. O ira oqo era ivakavuvuli ena valenisoro ni Kalou e Jerusalemi. Ia na gone tagane oqo o Jisu. E se qai yabaki 12.

Era kurabui dina na ivakavuvuli ena levu ni ka e kila o Jisu me baleta na Kalou kei na veika e volai tu ena iVolatabu. Ia na cava erau sega ni tiko kina e ke o Meri kei Josefa? Meda raica mada.

Ena veiyabaki e dau kauti ratou na nona vuvale i Jerusalemi o Josefa ina dua na soqo bibi e vakatokai na Lakosivia. E bau yawa toka na ilakolako mai Nasareci i Jerusalemi. Ena gauna oya e sega ni dua e vakamotoka qai sega tale ga na sitimanivanua. E levu era taubale ga qai tolu na siga na nodra ilakolako mera qai yaco i Jerusalemi.

Ia oqo sa levu sara na lewe ni vuvale i Josefa. E so tale na taci Jisu kei na ganena. Ena yabaki oqo eratou lesu tiko kina i Nasareci o Josefa, o Meri, kei iratou tale ga na luvedrau. Erau nanuma ni lako tale tiko ga kei iratou o Jisu! Erau qai sega ga ni raici Jisu ni ratou sa lai cegu toka ni oti e dua na siga. Erau mani lesu i Jerusalemi me rau lai vaqarai koya.

Erau qai kunei koya ena valenisoro ni tiko vata kei ira na ivakavuvuli. E vakarorogo tiko vei ira qai vakatarogi ira. Era kurabui kece ga ena vuku e tiko vua. Sa qai kaya o Meri: ‘Luvequ, na cava o cakava kina na ka oqo? Keirau sa oca dina na vaqarai iko.’

E kaya o Jisu: ‘Na cava drau vaqarai au kina? Drau sega beka ni kila ni dodonu meu tiko ena vale nei Tamaqu?’

Io, e dau via tiko o Jisu ena vanua e rawa ni vulici kina na veika me baleta na Kalou. E dau lako o Jisu ina soqoni e veimacawa mai Nasareci. Ni dau vakarorogo vinaka, e vulica kina e levu na ka mai na iVolatabu. Meda muria mada ga na ivakaraitaki Jisu.