O RAICA na kalokalo serau e dusia tiko e dua vei iratou na turaga oqo? E laurai na kalokalo oqori ni ratou sa biuti Jerusalemi. Eratou lako mai Natuicake na turaga oqori. Eratou dauraikalokalo. Eratou vakabauta ni kalokalo vou oqo e kauti iratou tiko vua e dua na tamata rogo.

Ni ratou yaco yani i Jerusalemi, eratou taroga sara: ‘E vei beka na gone ena qai nodra tui na Jiu? Keitou a raica na nona kalokalo mai Natuicake, keitou mani lako mai kina me keitou mai vakarokoroko vua.’

Ni rogoca oqo o Eroti na tui, e tiko mai Jerusalemi, e sega sara ga ni taleitaka. E cata me sosomitaki koya e dua tale na tui. Sa qai kacivi ira na iliuliu ni bete qai taroga: ‘Ena sucu e vei na tui yalataki?’ Era sauma: ‘E kaya na iVolatabu mai Peceliema.’

Sa qai kacivi iratou na tamata mai Natuicake o Eroti qai kaya: ‘Dou lai vakaraica mai na gone, dou mai tukuna tale ga vei au ni dou sa kunea. Au via lai cuva tale ga vua.’ Ia e via vakamatea tiko na gone o Eroti.

E liu tiko na kalokalo oqo vei ira na turaga me yaco i Peceliema, qai lai tu vakadua ena vanua e tiko kina na gone. Ni ratou curu yani, eratou raici Meri kei na gone, o Jisu. Eratou solia vei Jisu na nodratou iloloma. Sa qai vakasalataki iratou emuri o Jiova ena dua na tadra me ratou kua ni lesu vei Eroti. Eratou muria gona kina e duatani tale na sala ni ratou sa lesu i nodratou vanua.

E vakacudrui Eroti sara ga na nona qai rogoca e muri ni ratou sa lesu tale ina nodratou dui vale na turaga mai Natuicake. Sa qai vakarota mera vakamatei na gone tagane kece e Peceliema era yabaki rua lako sobu. Ia a sa vakasalataki Josefa oti o Jiova ena dua na tadra me kauta nona vuvale i Ijipita. Ia ni sa mate o Eroti, sa qai kauti rau lesu na nona veitinani i Nasareci o Josefa. Oqo na vanua a mai susugi kina o Jisu.

O cei mada o nanuma ni a vakavuna na serau ni kalokalo vou oya? Nanuma tiko ni ratou a liu i Jerusalemi na turaga mai Natuicake ni oti ga nodratou raica na kalokalo oya. O Setani na Tevoro a via vakamatea na Luve ni Kalou, vaka tale ga kina o Tui Eroti. E kena irairai gona ni o Setani a vakavuna na serau ni kalokalo.