RAICA mada na ka vakaloloma oqo! Sa vakamatei tiko o Jisu. Era sa vakota na ligana kei na yavana ina dua na kau. Na cava era cakava kina oqori vei Jisu?

Baleta e so era cati koya. O kilai ira? E dua sara ga vei ira na agilosi ca, o Setani na Tevoro. A vakavuna mada ga o koya na nodrau talaidredre vei Jiova o Atama kei Ivi. Ia o Setani sara ga a uqeti ira tiko na meca i Jisu mera cakava na veika oqo.

Ni se bera mada ga ni vakoti ina kau o Jisu, era cakava vua na veika ca na kena meca. O se nanuma tiko na ivalavala ni nodra lai kauti Jisu laivi mai na were o Kecisemani? O cei o ira na meca oya. Io, o ira na iliuliu ni lotu. Ia meda raica mada na veika e yaco tarava.

E ratou dui dro na yapositolo i Jisu nira sa kauti Jisu yani na iliuliu ni lotu. E ratou biuti Jisu laivi tu yani kei ira na kena meca ni ratou sa rere. Ia erau sega ni lako sara vakayawa na yapositolo o Pita kei Joni. Erau muri ira voli ga na meca i Jisu me rau raica na veika ena yacovi koya.

Era kauti Jisu vua e dua na kena turaga o Anasa, a bete levu tu eliu. E lekaleka wale sara na nodra tiko e ke. Oti sa ra qai kauti koya tale ina vale i Kaiafa, e bete levu tiko ena gauna oya. Era soqoni yani ina nona vale e levu na iliuliu ni lotu.

E caka na veilewai ena vale i Kaiafa. Era kau mai kina e so mera beitaki Jisu ena ka lasu. Era kaya kece na iliuliu ni lotu: ‘Me mate o Jisu.’ Era kasivita na matana ra qai vacuki koya.

Ena gauna e yaco tiko kina na veika oqo, a tiko e tautuba o Pita. Era waqara na buka o ira na tu e kea ni sa rui batabata na bogi. Nira tatalai tiko, a raici Pita sara e dua na yalewa dauveiqaravi, qai kaya: ‘O koya oqo erau dau tiko kei Jisu.’

E sauma o Pita: ‘Sega, e sega ni o yau!’

Era tukuna vakatolu vei Pita ni dau tiko vata kei Jisu, ia e ba ga o koya. Ena ikatolu ni gauna e kaya kina na sega o Pita, e vuki mai o Jisu qai raici koya. Sa dua na ka na mosi ni yalo i Pita ni a lasu. E gole tani yani qai tabaka na tagi.

Ni sa cadra na siga ena mataka ni Vakaraubuka, era kauti Jisu na bete ina vale ni bose levu e vakatokai na vale ni Sanadrini, me lai veivosakitaki kina na veika me caka vua. Era kauti koya vua na iliuliu ni yasana o Jutia, o Ponitio Pailato.

Era kaya na bete vei Pailato: ‘Oqo na tamata ca e dodonu me vakamatei.’ Ni sa vakatarogi Jisu oti, sa qai kaya o Pailato: ‘Au sega ni kunea vua e dua na cala.’ Sa qai vakatalai Jisu o Pailato vei Eroti Anitipasa. E iliuliu kei Kalili o Eroti, ia e vakaitikotiko mai Jerusalemi. E sega tale ga ni kunea vua o Eroti e dua na cala, sa qai vakatalai koya lesu vei Pailato.

E via sereki Jisu o Pailato, ia era vinakata na meca i Jisu me sereki e dua tale na kaivesu. Oqori na dau butako o Parapa. A kauti Jisu mai tuba o Pailato ni rauta toka na siga levu, qai kaya vei ira na tamata: ‘Raica! Na nomuni tui!’ Era qai kaya na bete levu: ‘Kauti koya tani! Vakamatei koya! Vakamatei koya!’ Sa qai sereki Parapa o Pailato, qai kau o Jisu me vakamatei.

A vakoti ena kau o Jisu ena yakavi ni Vakaraubuka. O na sega beka ni raici rau, ia erau a vako tale ga ena yasa ruarua i Jisu e rua na dau basulawa. Ni bera ni mate o Jisu, e kaya vua e dua vei rau: ‘Nanumi au ni oni sa yaco ina nomu matanitu.’ E qai sauma o Jisu: ‘Au yalataka vei iko ni daru na tiko vata mai Parataisi.’

Sa dua na vosa ni yalayala totoka, se vakaevei? O kila se parataisi cava e tukuna tiko e keri o Jisu? A tiko beka e vei na parataisi a vakarautaka na Kalou mai na ivakatekivu? Io, ena vuravura ga oqo. Ni sa na veiliutaki vakatui mai lomalagi o Jisu, ena qai vakaturi koya tale na tamata oqo mai na mate, me marautaka na Parataisi vou e vuravura. Sa dua dina na ka rekitaki!