O KILAI koya na yalewa kei rau na tagane oqori? E itokani i Jisu na yalewa o Meri Makitalena, erau agilosi na tagane isulu vulavula. Na rumu lailai e iro tiko yani kina oqori o Meri a vakadavori tu kina na yago i Jisu. Oqori na ibulubulu. Ia sa yali na yagona! O cei beka sa kauta? Meda raica mada.

Ni sa mate o Jisu, era kaya na bete vei Pailato: ‘Ni se bula tiko o Jisu a kaya ni na vakaturi ni oti e tolu na siga ia e vakarota me yadravi na ibulubulu. Mera kua ni butakoca na yagona na nona tisaipeli, mera qai lai kaya ni sa vakaturi mai na mate!’ Sa qai kaya o Pailato vei ira na bete mera talai ira na sotia mera lai yadrava na ibulubulu.

Ia ena mataka caca ni ikatolu ni siga e mate tu kina o Jisu, a lako vakasauri mai e dua na agilosi i Jiova, qai vaqiqica tani na vatu mai na ibulubulu. Vaka ga era duru masima na sotia ena levu ni nodra domobula. Nira rai yani eloma ni bulubulu, sa yali na yago i Jisu! Era sa qai lako yani e so na sotia ina koro mera lai tukutuku vei ira na bete. O kila na ka era qai cakava na bete ivakarau ca? Era saumi ira na sotia mera lasu. Mera kaya nira lako mai ena bogi na tisaipeli i Jisu nira se moce tu ra qai butakoca na yagona.

Ni ratou qai lako yani e so na yalewa eratou tokani i Jisu ina i bulubulu, eratou kidacala ni sa lala tu! Erau rairai mai vakasauri vei iratou e rua na agilosi vakaisulu vulavula. Erau taroga: ‘A cava dou mai vakaraici Jisu kina e ke? E sa vakaturi o koya. Dou totolo ga mo dou lai tukuna vei ira na nona tisaipeli.’ Sa dua na ka na nodra vakusakusa lesu! Ni ratou lesu tiko yani, e tarovi iratou e dua na turaga. O kila se o cei? Oqori ga o Jisu qai kaya vei iratou: ‘Dou lai tukuna vei ira na noqu tisaipeli.’

E dredre me ratou vakabauta na tisaipeli ni ratou mai tukuna na yalewa ni sa bula tale o Jisu, eratou a raici koya tale ga. Erau qai cici o Pita kei Joni ina ibulubulu, ia sa lala tu! Ni rau sa biubiu mai o Pita kei Joni, a tiko yani o Meri Makitalena. Oya na gauna e raici rau kina na agilosi ena loma ni bulubulu.

O kila se kau i vei na yago i Jisu? A kauta tani na Kalou. E sega ni vakaturi Jisu na Kalou ena yago ga a mate kina. E solia vei Jisu e dua na yago vakayalo vou, me vakataki ira na agilosi ni lomalagi. Ia mera vakadinata nona tisaipeli ni sa bula dina o koya, e rairai vei ira o Jisu ena yago vakatamata, me vaka eda na qai raica.