E sega wale ga ni tukuna na iVolatabu na veika sa yaco oti, e tukuna tale ga na veika e se bera ni yaco. Ia, na tamata e sega ni rawata oqori. Oya na vuna eda kila kina ni Kalou ga e vakavuna na iVolatabu. Na cava e kaya na iVolatabu me baleta na gauna se bera mai?

E tukuna na veika me baleta na ivalu levu ni Kalou. Na ivalu oqo ena vakasavasavataka na vuravura mai na veika ca kece ga kei ira na tamata ca, ia ena taqomaki ira ga na qarava tiko na Kalou. Ena raica tale ga na tui lumuti ni Kalou, o Jisu Karisito, mera marautaka kece na dauveiqaravi ni Kalou na bula sautu kei na mamarau, mera na kua tale ga ni tauvimate se mate.

Sa dua na ka marautaki nida raica ni na vukica na vuravura na Kalou me dua na parataisi vou. Ia e tiko tale ga na ka e dodonu meda cakava meda na bula rawa kina ena parataisi. Ena iotioti ni italanoa ena ivola oqo eda na vulica kina na ka meda cakava, meda na marautaka kina na veika sa yalataka tu na Kalou mera na taukena o ira na qaravi koya. Wilika na iWasewase WALU mo raica kina na veika sa tukuna rawa tu na iVolatabu me baleta na gauna se bera mai.