NA CAVA mada o raica e ke? Io, na mataivalu e vodo ose vulavula. Ia, raica mada na vanua era lako tiko mai kina. Era cici sobu tiko mai lomalagi ena veio na ose! Era tu dina kina na ose?

Sega, era sega mai lomalagi na ose? Era sega ni ose dina oqo baleta ni sega ni dau cici na ose ena dela ni o. Ia na iVolatabu e dau tukuni ira na ose e lomalagi. O kila na vuna?

Baleta ni dau vakayagataki ena ivalu na ose. O koya gona, na kena tukuni ena iVolatabu ni so era vodo ose sobu mai lomalagi e vakaraitaka ni na valuti ira na tamata e vuravura na Kalou. O kila na yaca ni vanua ena vakayacori kina na ivalu oqori? Na yacana o Amaketoni. Ena vakarusai ena ivalu oqori na veika ca kece e yaco tiko e vuravura.

Ena liutaka o Jisu na ivalu na Amaketoni. Nanuma tiko ni o Jiova sa digitaki Jisu oti me tui ni nona matanitu. Oqo na vuna e dara kina o Jisu na isala vakatui. Na iseleiwau e vakaraitaka ni na vakamatei ira kece na meca ni Kalou. Meda kua ni kurabuitaka ni sa yaco na gauna me vakarusai ira kece kina na tamata ca na Kalou.

Raica lesu na iTalanoa 10. Na cava o raica kina? Io, na nodra vakarusai na tamata ca ena Waluvu Levu. O cei a vakavuna na waluvu oya? Na Kalou o Jiova. Raica mada na iTalanoa 15. Na cava e yaco tiko kina? Na nodrau vakarusai na koro o Sotoma kei Komora ena bukawaqa mai vei Jiova.

Cega mada na iTalanoa 33. Raici ira kina na ose kei na qiqinivalu ni Ijipita. O cei e vakavuna na nodra luvuci e wai? O Jiova ga. E cakava na veika oqori mera taqomaki kina na nona tamata. Raica na iTalanoa 76. E vakatara o Jiova mera vakarusai na nona tamata nira talaidredre.

O koya gona meda kua ni kurabui ni na tala mai o Jiova na nona mataivalu vakalomalagi me vakaotia na ca e vuravura. Ia vakasamataka mada na ka ena rawati kina! Cega sara na tabana e tarava meda raica.