E bibi mo kilai koya na Kalou mo rawa ni qai nona itokani. Vakacava, era kila na yacamu na nomu itokani, era dau vakayagataka beka? Io. E vinakata na Kalou mo kila na yacana, mo vakayagataka tale ga. Na yaca ni Kalou o Jiova. (Same 83:18; Maciu 6:9) Dodonu tale ga mo kila na ka e vinakata kei na ka e sega ni vinakata. Dodonu mo kilai ira na nona itokani kei ira na kena meca. E taura na gauna meda veikilai vinaka kei na dua. E vakaraitaka na iVolatabu ni ka vakayalomatua me tiko na gauna meda vulica kina na veika e baleti Jiova.—Efeso 5:15, 16.

O ira na itokani ni Kalou era cakava na ka e vakamarautaki koya. Vakasamataki ira mada na nomu itokani. Ke o sega ni caka vinaka vei ira o qai cakava vei ira na ka era sevaka, era na vinakata tiko beka ga mo nodra itokani? Sega sara! E vaka kina ke o vinakata mo itokani ni Kalou, e dodonu mo cakava na ka ena vakamarautaki koya.—Joni 4:24.

Sega ni lotu kece era na tuberi iko mo itokani ni Kalou. O Jisu, na itokani voleka duadua ni Kalou, a vakamacalataka e rua na sala. Dua e rabailevu qai levu era muria. Na sala oya e basika ina rusa. Na kena ikarua e qiqo qai vica wale era muri tiko kina. Na sala oya e basika ina bula tawamudu. Oqo e vakaraitaka ni kevaka o via itokani ni Kalou, e bibi mo vulica na sala e dodonu mo qaravi koya kina.—Maciu 7:13, 14.