Ni dua na noda itokani eda dau taleitaka, eda doka tale ga, eda na via ucui koya. “Sa yalovinaka ka yalododonu ko Jiova,” e kaya na iVolatabu. (Same 25:8) Me rawa nida itokani ni Kalou, e dodonu meda yalovinaka, meda yalododonu tale ga. E kaya na iVolatabu: “Dou qai vakadamurimuria na Kalou, me vakataki ira na gone ni toko; ka dou ia tikoga nai valavala ni loloma.” (Efeso 5:1, 2) Oqo e so na sala eda na rawa ni vakayacora kina:

Dau vukei ira na tani. “Me da caka vinaka vei ira na tamata kecega.”—Kalatia 6:10.

Cakacaka vakaukaua. “Me kakua ni butako tiko ko koya ka daubutako, ka me daucakacaka ga, ka kitaka e na ligana na ka sa yaga.”—Efeso 4:28.

Mo savasava tiko ga vakayago, ena nomu itovo tale ga. “Me da vakasavasavataki keda mai na dukadukali kecega ni yago kei na yalo, me da ia sara na ka savasava e na rere vua na Kalou.”—2 Korinica 7:1.

 Lomani ira, dokai ira na lewe ni nomu vuvale. “Dou dui lomana . . . na watina me vakataki koya; ia na yalewa, me vakarokorokotaka na watina. Oi kemudou na gone, dou talairawarawa vei ira na nomudou qase.”—Efeso 5:33–6:1.

Dau veilomani. “Me da veilomani; ni sa mai vua na Kalou na loloma.”—1 Joni 4:7.

Talairawarawa ena lawa ni matanitu. “Me talairawarawa na tamata kece ga vei ira era veiliutaki e na matanitu . . . Sauma kece na ka e dodonu me saumi vei ira na tamata, sauma na i vakacavacava vei ira e dodonu me saumi vei ira.”—Roma 13:1, 7, VV.