O Setani kei ira nona timoni era sega ni vinakata mo qarava na Kalou. E nodra inaki me kua sara ga ni dua vei keda e qarava na Kalou. Era saga vakacava mera cakava oqo? Dua, ena nodra vakayagataka na lotu lasu. (2 Korinica 11:13-15) E okati me lotu lasu na lotu e sega ni vakavuvulitaka na ka dina mai na iVolatabu. Na lotu lasu e vaka na ilavo lasulasu—e vaka na irairai ni ilavo dina, ia e sega na kena yaga. Ena rawa ga ni vakaleqai iko.

Ena sega ni rawa vakadua vei lotu lasu me vakamarautaki Jiova, na Kalou daudina. Ni se bula e vuravura o Jisu, a tiko e dua na ilawalawa vakalotu era vinakata mera vakamatei koya. Era nanuma ni donu na ivalavala ni nodra sokalou. Era kaya: “E dua bau na tama i keimami, na Kalou.” E duavata beka kei ira o Jisu? Sega! E tukuna vei ira: “A tamamudou na tevoro.” (Joni 8:41, 44) Era nanuma e levu nikua nira qarava tiko na Kalou, ia era qaravi Setani dina tiko kei ira na nona timoni!—1 Korinica 10:20, NW.

 Na kau ca ena vuataka na vua ca, na lotu lasu tale ga ena vuataka na tamata ivakarau ca. Sa sinai o vuravura ena leqa ena vuku ni ka ca era cakava na tamata. Na veidauci, na vala, na butako, na veivakararawataki, na laba, kei na kucu. E levu era cakava tu na veika oqo e tiko na nodra lotu, ia e sega ni veisautaki ira na nodra lotu mera cakava na ka vinaka. Era na sega ni itokani ni Kalou, vaka vo ga ke ra tagutuva na veika ca era cakava tiko.—Maciu 7:17, 18.

Na lotu lasu e vakavulici ira na tamata mera masu ina matakau. E kaya na Kalou me kua ni masuti na matakau. E veiganiti vinaka oqo. O na vinakata beka me dua e sega ni vosa vei iko, ia e lai vosa tiko ga ina kemu itaba? O na kaya beka ni nomu itokani dina o koya oya? Sega, sega ni rawa. E vinakata o Jiova meda vosa vua, sega ina matakau se itaba, na ka e sega ni bula.—Lako Yani 20:4, 5.

Na lotu lasu e vakavuvulitaka ni sega ni cala na veivakamatei ena gauna ni ivalu. E kaya o Jisu ni o ira na itokani ni Kalou era na veilomani. Eda na sega ni vakamatea e dua eda lomana. (Joni 13:35) E cala sara mada ga meda vakamatea na tamata ca. Nira lako mai na meca i Jisu mera vesuki koya, a sega ni vakatarai ira nona tisaipeli mera vala mera taqomaki koya.​—Maciu 26:51, 52.

Na lotu lasu e vakavuvulitaka nira na lai kama i eli na tamata ca. Ia, na iVolatabu e vakavuvulitaka ni ivalavala ca ena tini ina mate. (Roma 6:23) E Kalou dau loloma o Jiova. Ena rawa beka ni vakararawataka tawamudu na tamata e dua na Kalou dau loloma? E macala ni na sega! Ena kune ga ena Parataisi e dua na lotu, na lotu ga e vakadonuya o Jiova. (Vakatakila 15:4) Sa ra na yali na lotu era yavutaki ena lasu i Setani.