O Jiova ena sega ni vakatara mera vakacacani Parataisi na tamata ca. Era na bula ga e kea na nona itokani. Vakaevei o ira na tamata ca? Mo kila na isaunitaro, vakasamataka mada na italanoa dina me baleti Noa. A bula o Noa ena vica na udolu na yabaki sa oti. E tamata vinaka, e dau saga e veigauna kece me cakava na loma i Jiova. Ia, o ira na vo ni tamata e vuravura era cakava ga na ka ca. Tukuna kina vei Noa o Jiova ni na vakatauca na uca levu mera luvuci kina na tamata ca. E tukuni vei Noa me taya e dua na waqa me ratou bula kina nona vuvale ni sa na coka mai na waluvu.—Vakatekivu 6:9-18.

Taya na waqa o Noa kei na nona vuvale. E vakasalataki ira na tamata o Noa ni sa voleka na Waluvu, ia era sega ni rogoci koya. Era cakava tiko ga na ka ca. Ni sa ta oti na waqa, sa qai vakavodoka na manumanu i waqa, vodo tale ga o koya kei na nona vuvale. Sa qai vakavuna o Jiova e dua na draki ca vakaitamera. E bisa tu na uca me 40 na siga, 40 na bogi. Luvuci vuravura taucoko na wai.—Vakatekivu 7:7-12.

 Ra mate kece na tamata ca, bula ga o Noa kei na nona vuvale. E vakabulai iratou o Jiova mai na Waluvu qai vakasoburi iratou ena vuravura e sa vakawabokotaki kina na ivalavala ca. (Vakatekivu 7:22, 23) E vakaraitaka na iVolatabu ni sa voleka na gauna me baci vakarusai ira kina na sega ni via cakava na ka e dodonu o Jiova. Era na sega ni vakarusai na tamata vinaka. Era na bula tawamudu ena Parataisi e vuravura.—2 Pita 2:5, 6, 9.

Levu nikua era cakava na ka ca. Sa sinai ena ca o vuravura. E talai ira tiko ga yani na nona iVakadinadina o Jiova mera vakasalataki ira na tamata, ia e levu era sega ni via rogoca na vosa i Jiova. Era sega ni via veisautaka na nodra ivalavala. Era sega ni via ciqoma na ka e kaya na Kalou ni dodonu kei na ka e kaya ni cala. Na cava ena yaco vei ira oqo? Dua beka na siga era na veisau? Levu era sa na sega tu ga ni veisau. Sa voleka mai na gauna mera na rusa kina na tamata ca, mera sega ni qai bula tale.—Same 92:7.

Ena sega ni vakarusai na vuravura; ena vukici ga me parataisi. O ira era yaco mera itokani ni Kalou era na bula tawamudu ena Parataisi e vuravura.—Same 37:29.