E ka ni sasaga me dua na nomu itokani; e ka ni sasaga tale ga me dei vei iko o nomu itokani. Ena vakalougatataki sara vakalevu na nomu saga mo itokani ni Kalou kei na nomu saga me dei tiko ga na nomudrau veitokani. E kaya o Jisu vei ira na vakabauti koya: “Na ka dina ena sereki kemudou.” (Joni 8:32) Na cava e kena ibalebale oya?

O na sereki ena gauna mada ga oqo. Sa rawa ni o sereki mai na ivakavuvuli cala qai lasu e vakatetea voli o Setani. Sa rawa ni o sereki mai na yalolailai era vakila tu na sagavulu na milioni era sega ni kilai Jiova. (Roma 8:22) Era sereki sara mada ga na itokani ni Kalou mai na “rerevaka na mate.”—Iperiu 2:14, 15.

O na qai sereki vakadua ena vuravura vou ni Kalou. Sa na qai sega vakadua ni vesuki tu na noda bula ena dua na gauna sa tu oqo e liu! Ena vuravura Parataisi, sa na sega na ivalu, na tauvimate, kei na basulawa. Sa na sega na dravudravua kei na bula waloloi. Sa na sega ni dua e qase se mate. Sa na sega na rere, veivakararawataki, kei na lewa ca. E kaya na iVolatabu me baleti koya na Kalou: “O ni sa dedeka na ligamuni, ka vakamamautaka na ka bula kecega e na ka era gadreva.”—Same 145:16.

 Era na bula tawamudu na itokani ni Kalou. Na bula tawamudu e iloloma talei ena solia na Kalou vei ira kece era vinakata mera nona itokani. (Roma 6:23) Vakasamataka mada na ka o rawa ni cakava ni o sa na bula tawamudu!

Ena levu na gauna mo cakava kina e levu na ka. De dua o na via vulica beka na ivakavakayagataki ni dua na iyaya ni vakatagi. Se o na via vuli droini, se mo dua na matai. O na via vulica beka na ka e baleti ira na manumanu se kau. Se o na via lako wavoki mo sarava na veivanua e vuravura kei na kena tamata. Na veika kece oqo ena rawa nida sa na bula tawamudu!

Ena levu na gauna mo qara kina e levu nomu itokani. Ni o bula tawamudu, ena levu na gauna mo kilai ira kina e levu tale era sa mai itokani ni Kalou. O na kila na nodra taledi kei na veika vinaka era kilai tani kina, era na nomu itokani tale ga. O na lomani ira, era na lomani iko tale ga. (1 Korinica 13:8) Ni o sa na bula tawamudu, sa na levu sara na gauna mo veitokani kina kei ira kece ena dela i vuravura! Kena e uasivi duadua ni sa na qai qaqaco ga na nomudrau veitokani kei Jiova ni toso tiko na veitabagauna. Mo itokani mada ga ni Kalou me tawamudu!