Na veika ca e yaco tiko e vuravura e vakaraitaka ni sa voleka na Parataisi. E kaya na iVolatabu nida na sotava na gauna dredre sara ni bera toka ga na Parataisi. Eda sa vakila sara tu ga na veika oqori ena gauna oqo! Oqo e so na ka e kaya na iVolatabu ni na yaco:

iValu lelevu. “Ni na veibolebolei na veivanua eso, kei na veimatanitu eso.” (Maciu 24:7) Sa yaco sara tu ga na parofisai oqo. Tekivu mai na 1914, sa yaco oti e rua na ivalu lelevu kei vuravura kei na levu tale na ivalu lalai. Sa ra mate kina e vica vata na milioni.

Mate veitauvi. “Ena tubu . . . na mate ca.” (Luke 21:11) E sa yaco tiko beka oqo? Io. Na kenisa, mateniuto, matenigacagaca, malaria, AIDS, kei na so tale na mate e sa vakamatei ira e vicasagavulu na milioni.

Lailai na kakana. Levu ena veiyasa i vuravura e sa sega ni veirauti na kakana mera kania. Vica vata na milioni era mate ena viakana e veiyabaki. Oqo e dua tale na ivakatakilakila e vakaraitaka ni sa voleka sara na Parataisi. E kaya na iVolatabu: “Ena yaco talega na dausiga.”—Marika 13:8.

Uneune. “[E]na yaco . . . na uneune e na veivanua e vuqa.” (Maciu 24:7, VV) Sa yaco tale tiko ga oqo ena noda gauna. Me tekivu mai na 1914, sa sivia e duanamilioni era mate ena uneune.

 Tamata ca. “Era na dauvinakata nai lavo” na tamata, era na “daulomani ira walega.” Era na “lomana vakalevu na marau a ra na lomani koya na Kalou vakalailai.” O ira na gone era na “talaidredre kivei ira na nodra qase.” (2 Timoci 3:1-5) Vakacava, sega beka ni o vakadinata ni levu nikua e sa vaka sara tu ga oqo na nodra ivalavala? Sa ra sega ni doka na Kalou, ra qai dau vakavuleqa tale ga vei ira era guta mera kilai koya na Kalou.

Basulawa. Ena “tubu vakalevu na i valavala tawa dodonu.” (Maciu 24:12, VV) O na vakadinata tale beka ga ni sa qai ca ga vakalevu na ivalavala nikua ni vakatauvatani kei na veiyabaki sa oti. Sa ra leqataka na tamata ena veivanua kece ga de ra butakoci, lawakitaki, se vakamavoataki.

Na ka kece oqo e vakaraitaka ni sa voleka na Matanitu ni Kalou. E kaya na iVolatabu: “Ni dou sa raica na kena yaco na veika oqo, dou kila kina sa qai voleka na matanitu ni Kalou.” (Luke 21:31) Na cava sara mada na Matanitu ni Kalou? Oqo na matanitu vakalomalagi ni Kalou, na matanitu ena kauta mai vuravura na Parataisi. Na Matanitu ni Kalou ena mai sosomitaka na matanitu vakatamata.—Taniela 2:44.