E vakadewataki na vidio Vuna mo Vulica Kina na iVolatabu ena walu na vosanivanua e Kenada, me laulau kina nodra vunau na tacida. Ena Okotova 2014, era gole na tacida ina dua na yasa i Kenada e vakatokai na Nunavik Arctic, voleka ni vuvale kece ena 14 na itikotiko era sarava na vidio ena vosa vakaInuktitut. E sivia na le 12,000 na lewenivanua ena itikotiko qori.

A vakayacori ena Seviteba 2014 na soqo ni veimatanitu ena dua na rara ni qito e Seoul, Sauca Korea. Era  marautaka na porokaramu e sivia na le 56,000. E vakavinavinakataka na manidia ni valenisarasara na nodra itovo vinaka na tacida kei na nodra veitokoni ena gauna ni soqo. E kaya: “E vinaka na nodra itovo o ira kece na tiko ena soqo. Au qoroya tale ga na nodra samaka na valenisarasara, e vinaka cake sara mai na nodra sasamaki na neitou ivakalesilesi. Au diva me va tale ga ya na nodra ivakarau ni cakacaka na neitou ivakalesilesi. Eda rawa ga ni tukuna nida daulotu dina ke da vakataki ira na iVakadinadina i Jiova.”

A sega ni vakadonuya na matanitu o Suwiteni ena Me 2012, na nodra kerekere na tacida me soli tale ga vei ira  na veivuke vakailavo me vakataki ira na matalotu tale eso. A mani vakadonuya na iLawalawa Dauvakatulewa me kau ina mataveilewai na leqa qori.

E vakatulewataka na mataveilewai me caka e dua na veitarotarogi ni bera ni tauca na lewa. Era mani veivosakitaka rawa eso na tacida na taro era nanuma ni na tarogi kei na sala mera sauma kina. Na vakatovotovo qori a vakayacori ena dua na Vale ni Soqoni e Stockholm.

Ni caka tiko na vakatovotovo, e taqiri sara na lali ni katuba ni Vale ni Soqoni. E dolava na katuba e dua na tacida tagane qai raica e rua na goneyalewa, dua e yabaki 13, dua tale e yabaki 14. Erau kaya ni tiko eso na nodrau vakatataro me baleti keda na iVakadinadina i Jiova. E nanuma lesu na tacida ya: “Au via tukuna vei rau ni keimami osooso, keimami sega ni via vakasosani, me rau qai lesu mai ena dua tale na siga.”

Ia e mani nanuma na tacida me ratou sa veivosaki mada ga. E levu na nodrau taro na goneyalewa, erau taroga vakamatailalai eso na ka me baleta na veiletitaki ni veika e vauca na bula raraba kei na veidigidigi. Ni rau lesu na goneyalewa, e vakamacalataka sara na tacida vei ira na kena vo na nodrau taro kei na nona isaunitaro.

Ni vakayacori na veilewai ena siga tarava, era kurabui na tacida ni levu na ka e taroga na mataveilewai e tautauvata sara ga kei na nodrau taro na goneyalewa. E tukuna e dua na tacida e matataka na isoqosoqo: “Au sega ni bau rere niu duri tu e matadra na loya rogo ni vanua qo. Au kila ni tokoni keimami o Jiova ena veivakavulici a vakarautaka ena vukudrau na goneyalewa.”

E tokoni keimami na mataveilewai, qai tukuni ina matanitu me veisautaka na nona vakatulewa.

E vakaitikotiko e Haiti o Ken, e dua na gonetagane yabaki ono. Dua na ka nona marau ni rogoca sa vakarau tara na nodra Vale ni Soqoni vou. E cakava sara e dua na nona kato ni cau, lai vunitaka toka ena nona rumu. Sa qai biuta tiko kina na ilavo rau solia na nona itubutubu me vakayagataka e koronivuli. E cakava toka qori me yacova na nodratou yaco yani na timi ni tarataravaki. Ni lai solia vei ratou na nona kato ni cau, na ilavo e toka e loma e rauta sara ga e dua na taga raisi. E laukana tiko ena vanua ni tarataravaki me vica na siga na raisi a cautaka o Ken.

Ena vuku ni kena veitauvi na mate na Ebola ena yabaki sa oti, e vinakati na ivolatara me qai curu kina e dua ena veivanua e Sierra Leone. Kena ivakaraitaki, e vinakati mera yadua na ivakatakilakila kei na ivolatara na ivakatawa ni tabacakacaka, vaka kina na lori e usana na ivola vakaivolatabu kei na so tale na ivola vei ira na mataveitacini ena veivanua ya. Na iyaya tale ga e via vakauta na Komiti ni Vakacoko me vaka na ivakarau ni katakata (thermometer), wainimate, kei na kakana e vinakati me vakaivolatara.

Dua na ituvaki era sotava na tacida e veivakayaloqaqataki dina. Era kerea e 34 na ivakatakilakila kei na 11 na ivolatara ni lori, ia e vakatau vua na turaganivalu na vakadonui ni nodra kerekere. Erau lai raica sara na turaganivalu e rua na tacida tagane mai na valenivolavola ni tabana. A nanumi ni sa na rawa ena siga ya na ivakatakilakila kei na ivolatara. E ka ni rarawa ni yali nodra ivola ni kerekere na mataveitacini. A tukuni vei rau na tacida me rau lai vaqaqara ena ibinibini ivola ni kerekere e tu e kea, ia erau sega ni kunea. E tukuna sara vei vunivola o turaganivalu  ni sa na sogo na nona ofisi, ena qai laurai tale na ivola ni kerekere ni oti e rua na macawa. Erau masu lo vei Jiova na tacida me rau kerea na nona veivuke. E tarogi rau sara na tacida na turaganivalu: “E vica na ivakatakilakila kei na ivolatara drau vinakata?” Ni rogoca na kena levu, e tucake sara ga o turaganivalu qai kailavaka: “Sa rui levu tale qori!”

Erau vakamacalataka na tacida na veika e vauci ena noda cakacaka, kei na yaga ni iyaya ni vakacoko ena kena valuti na mate na Ebola. E vakasama o turaganivalu, qai tukuna vei nona vunivola: “Solia vei rau na ka kece erau vinakata.”