E gole o Jisu ina korolevu o Kapenaumi ni oti nona iVunau ena Ulunivanua. Era lai raici koya sara e keri eso nodra qase na Jiu. A talai ira yani e dua na turaga e sega ni Jiu, e turaganivalu ni Roma.

E tiko e dua nona dauveiqaravi na turaganivalu qori e dau lomana vakalevu. E tauvimate bibi, sa voleka sara ni mate. E sega ni Jiu na turaganivalu, ia e kere veivuke vei Jisu. Era tukuna vei Jisu na Jiu ni ‘davo tiko mai vale na dauveiqaravi e paralasi, dua na ka nona rarawa voli,’ de dua ena vuku ni mosi. (Maciu 8:6) Era nanuma nodra qase na Jiu ni dodonu me vukei turaganivalu o Jisu nira kaya: “E yaga moni cakava vua na ka keimami kerea qo, ni dau yaga vakalevu ina neimami matanitu, e tara tale ga na neimami valenilotu.”​—Luke 7:4, 5.

E gole sara o Jisu kei ira na qase ina nona vale na turaganivalu. Ni bera ni yaco i vale sa talai ira yani eso nona itokani na turaganivalu mera kaya vei Jisu: “Turaga, moni kua ga ni lako mai, e sega ni veiganiti moni curu ina noqu vale. Oya na vuna au sega ni lako yani kina vei kemuni.” (Luke 7:6, 7) Sa bau ivakaraitaki vinaka dina ni yalomalumalumu, ni nona ivakarau na turaga qori me dau veivakaroti. E sega ni vakataki ira na kai Roma era dau vakalolomataki ira nodra dauveiqaravi.​—Maciu 8:9.

E kila vinaka tu na turaganivalu nira sega ni dau veimaliwai na Jiu kei ira na sega ni Jiu. (Cakacaka 10:28) Qori na vuna e rairai talai ira kina nona itokani mera kaya vei Jisu: “Ke oni vosa ga, ena qai bula na noqu dauveiqaravi.”​—Luke 7:7.

E kurabuitaka qori o Jisu qai kaya: “Au tukuna vei kemuni, au sega mada ga ni raica e Isireli e dua me va qo na levu ni nona vakabauta.” (Luke 7:9) Nira lesu i vale nona itokani na turaganivalu, sa bula vinaka tale na dauveiqaravi a tauvimate bibi tu.

Na veivakabulai e cakava ya o Jisu e vakadeitaka kina nira na vakalougatataki na sega ni Jiu ke ra vakabauta, e kaya: “Le levu mai na tokalau kei na ra era na dabe vata kei Eparama kei Aisake kei Jekope ena Matanitu vakalomalagi.” Vakacava o ira na Jiu era sega ni vakabauta? E tukuna o Jisu nira “na biu ena butobuto e tuba. Era na tagi ra qai katibati e kea ena levu ni nodra rarawa.”​—Maciu 8:11, 12.

Kena ibalebale era na sega ni vakadonui na Jiu vakayago era sega ni ciqoma na veisureti a soli vei ira e liu, oya mera veiliutaki vata kei Karisito ena Matanitu ni Kalou. Sa na vagolei na veisureti vei ira na sega ni Jiu mera dabe vata kei Jisu, se ra lewe ni “Matanitu vakalomalagi.”