E rogoca o Jisu nira via vakamatei koya na Farisi kei na ito i Eroti, e mani gole kei ratou na nona tisaipeli ina Wasa o Kalili. Era tabili yani vua e dua na ilala levu mai na veivanua​—mai Kalili, na veikoro ena baravi e Taia kei Saitoni, na tokalau ni Uciwai na Joritani, Jerusalemi, kei ira na gole vakayawa mai Itumia ena ceva. E vakabulai ira e levu o Jisu, era mani veidrigidrigi yani o ira kece e tauvi ira na mate lelevu. Era sega tale ni waraka me tarai ira, era sa via tarai koya ga.​—Marika 3:9, 10.

E tukuna o Jisu vei ratou na nona tisaipeli me ratou vakarautaka vua e dua na waqa nira sa rui le levu na lewenivanua. E via vodo ena waqa me toso vakalailai yani i wai, mera kua ni drigiti koya kina na ilala levu. E rawa ni veivakavulici mai waqa se toso ina dua tale na yasa ni baravi me vukei ira e levu tale.

E kila na tisaipeli o Maciu ni cakacaka i Jisu e vakayacori kina “na ka e tukuna na parofita o Aisea.” (Maciu 12:17) Na parofisai cava e vakayacori e keri vei Jisu?

“Raica! Na noqu dauveiqaravi au digitaka, au dau lomana, au vakadonuya! Au na solia vua na yaloqu, ena vakamatatataka na lewadodonu ina veimatanitu. Ena sega ni veileti se me vosa tu i cake me rogoci na domona ena gaunisala levu. Ena sega ni musuka na gasau sa voleka ni ramusu, ena sega tale ga ni bokoca na vauvau ni cina e kubou wale ga, me yacova ni sa vakatauca na lewadodonu. Era na vakanuinui dina ina yacana na veimatanitu.”​—Maciu 12:18-21; Aisea 42:1-4.

Na Kalou e lomani Jisu, e vakadonui koya tale ga. E vakamatatataka o Jisu na cava na lewadodonu dina, sa vakabuawataki tu ena ivakavuvuli lasu vakalotu. Nira vakatanitaka na Farisi na lawa ni Kalou me salavata ga kei na lomadra, era sega mada ga ni vukea kina e dua e tauvimate ena Siga ni Vakacecegu! E vakatotomuria o Jisu na lewadodonu ni Kalou qai sobuti koya na yalona tabu, e vakacegui ira kina na lewenivanua mai na ivakavuvuli tawadodonu e veivakaocai. Era via vakamatei Jisu na iliuliu ni lotu ena ka e cakava qori. Sa vakaloloma dina!

Ni tukuni “ena sega ni veileti se me vosa tu i cake me rogoci na domona ena gaunisala levu,” cava kena ibalebale? Ni veivakabulai o Jisu, e dau vakaroti ira na lewenivanua kei na timoni mera kua ni “vakatakilai koya.” (Marika 3:12) E sega ni vinakata mera kilai koya na lewenivanua ni lai  kacivaki tu e gaunisala levu na kena irogorogo se na itukutuku lasu era vakatetea eso.

E veivakacegui tale ga na itukutuku i Jisu vei ira era vaka tu na gasau sa voleka ni ramusu. Era vaka na vauvau ni cina e kubou wale ga. Ena sega ni musuka o Jisu na gasau sa voleka ni ramusu se bokoca na vauvau ni cina e kubou wale ga. Ia e vukei ira vakamaqosa, vakayalololoma tale ga na yalomalua. O Jisu duadua ga era rawa ni vakanuinui kina na veimatanitu!