E se sega ni yaco i Jerusalemi o Jisu ni se rairai tiko voli ga kei ratou na nona tisaipeli ena vale i Sakiusa. Eratou vakabauta ni sa vakarau tauyavu “na Matanitu ni Kalou” qai kena Tui o Jisu. (Luke 19:11) E cala nodratou nanuma me baleta na vakasama qori, e tautauvata vinaka sara ga kei na nodratou sega ni ciqoma rawa ni na vakamatei o Jisu. Sa qai vakamacalataka o Jisu e dua na vosa vakatautauvata me vakaraitaka kina vei ratou ni se bera sara na Matanitu ni Kalou.

E kaya: “E vakarau lako ina dua na vanua yawa e dua e sucu turaga me lai vakadeitaka nona itutu vakatui, oti sa qai lesu mai.” (Luke 19:12) E sega ni ilakolako lekaleka qori. O koya e tukuni ena vosa vakatautauvata ni “sucu turaga” qai lako ina dua na “vanua yawa” e vakaibalebaletaki vei Jisu, a lako i lomalagi me lai solia vua o Tamana nona itutu vakatui.

E vakamacalataki ena vosa vakatautauvata ni bera ni biubiu o koya e “sucu turaga,” e kaciva e tini nona tamata qai solia yadua vei ratou e dua na mina, qai kaya: “Dou lai cakacakataka me yacova niu lesu mai.” (Luke 19:13) Na mina e ilavo siliva vakamareqeti. Dua na mina e tautauvata kei na isau ni dua na dauteitei ena tolu vakacaca na vula.

De dua ratou sa kila tiko na tisaipeli ni ratou vaka na tini na tamata ena vosa vakatautauvata ni a vakatokai ratou ena dua na gauna o Jisu me ratou tamata cakacaka ni tatamusuki. (Maciu 9:35-38) E sega ni tukuna o Jisu me ratou tamusuka qai kumuna mai na covuata. Ia era na kumuni ena tatamusuki eso tale na tisaipeli era rawa tale ga ni lewe ni Matanitu ni Kalou. Eratou solia na tisaipeli na nodratou gauna, igu, kei na iyau mera vukei tale kina e levu na itaukei ni Matanitu.

E tomana o Jisu ena nona vosa vakatautauvata ni o ira na lewenikoro “era cati koya [e sucu turaga] . . . ra qai tala eso na mata mera muri koya mera lai kaya vua, ‘Keimami sega ni vinakata me neimami tui na tagane qo.’” (Luke 19:14) Eratou kila tu na tisaipeli nira cati Jisu na Jiu, eso tale era via vakamatei koya. Ni sa mate o Jisu qai lako i lomalagi, era vakaraitaka na Jiu nodra cati koya ena nodra tusaqati ira nona tisaipeli. Era vakamatatataka na dauveitusaqati qori nira sega ni vinakata me Tui o Jisu.​—Joni 19:15, 16; Cakacaka 4:13-18; 5:40.

Ni ratou waraka tiko na le tini nona lesu mai o koya e “sucu turaga” e lai vakadeitaka nona “itutu vakatui,” ratou vakayagataka vakacava na mina e soli vei ratou? E kaya o Jisu: “Ni lesu mai ena nona vakadeitaka oti na nona itutu vakatui, e qai vakarota me ratou lako yani vua na nona tamata a solia vei ratou na ilavo me kila na ka eratou sa bau rawata mai na nodratou cakacaka vakabisinisi. E mani lako yani na kena imatai, e kaya, ‘Turaga, au sa rawata tale e tini na mina ena kena oni solia vei au.’ E tukuna vua, ‘Vinaka vakalevu. O iko na tamata vinaka! Ni o dina ena ka lailai sara, mo lewa e tini na koro.’ E lako tale ga yani na kena ikarua, e kaya, ‘Turaga, au sa rawata tale e lima na mina ena kena oni solia vei au.’ E tukuna vua, ‘O iko tale ga mo lewa e lima na koro.’”​—Luke 19:15-19.

Me vakataki ratou ga na tamata cakacaka, ena marau o Jisu ke ratou solia na tisaipeli nodratou gauna, igu, kei na iyau me ratou vukei ira tale kina e levu mera tisaipeli. Ena vakalougatataka tale ga nodratou gugumatua. E duidui kece na kedratou ituvaki kei na nodratou rawaka na tisaipeli i Jisu. Ia ni sa soli vei Jisu “nona itutu vakatui,” ena raica nodratou yalodina ni vukei ira eso tale mera tisaipeli qai vakalougatataki ratou kina.​—Maciu 28:19, 20.

Dua tale na ituvaki e vakamacalataka o Jisu ni tinia nona vosa vakatautauvata: “Ia e lako yani e dua tale [tamata cakacaka], e kaya, ‘Turaga, qo na nomuni mina, au a ologa toka ga ena dua na tikinisulu. Au rerevaki kemuni ni oni turaga voravora, oni dau taura na ka e sega ni nomuni, oni tamusuka  tale ga na ka oni sega ni tea.’ E kaya vua, ‘O iko na tamata ca, au na lewai iko ena ka o tukuna. O kila niu tamata voravora, au taura na ka e sega ni noqu, au tamusuka tale ga na ka au sega ni tea. Na cava ga o sega ni biuta kina ena baqe na noqu ilavo? Meu qai taura na kena tubu niu lesu mai.’ E qai kaya vei ira na tucake tu e kea, ‘Kauta tani vua na mina, solia vei koya e tini na nona.’”​—Luke 19:20-24.

E kalouca na tamata qori ni sega ni cakacaka me vakalevutaki kina na iyau ni matanitu ni nona turaga. Eratou nanamaki tu na yapositolo ina veiliutaki i Jisu ena Matanitu ni Kalou. Eratou kila gona ena ka e tukuna o Jisu me baleta na iotioti ni tamata cakacaka ni ratou na sega ni lewe ni Matanitu qori ke ratou sega ni gugumatua.

Ena uqeti ratou na tisaipeli yalodina na vosa i Jisu me ratou sasaga tiko ga. E kaya: “Au tukuna vei kemuni, o koya e tu vua na ka, ena soli vakalevu vua, ia o koya e sega vua na ka, ena kau laivi na ka mada ga e bau tu vua.” E tukuna tale ga nira na vakamatei na kena meca era sega ni vinakata me “nodra tui.” E tomana sara o Jisu nona ilakolako i Jerusalemi.​—Luke 19:26-28.