E se tiko voli ga o Jisu mai Samaria se Kalili. Era tarogi koya sara na Farisi se gauna cava ena yaco mai kina na Matanitu ni Kalou nira vakabauta ena yaco kina na ka vakairogorogo. Ia e kaya o Jisu: “Ena sega ni laurai levu sara na yaco mai ni Matanitu ni Kalou, era na sega tale ga ni kaya, ‘Raica i ke!’ se ‘Raica i kea!’ Ni sa tiko maliwai kemudou na Matanitu ni Kalou.”​—Luke 17:20, 21.

Era rairai nanuma eso ni tukuna o Jisu ni veiliutaki tiko na Matanitu ni Kalou ena lomadra na dauveiqaravi ni Kalou. Ia e sega ni dina qori ni sega ni tiko na Matanitu ni Kalou e lomadra na Farisi e vosa tiko kina o Jisu. Ia e tiko ena kedra maliwa ni tiko sara ga kei ira e kea o Jisu na Tui ni Matanitu ni Kalou.​—Maciu 21:5.

De dua era sa biubiu na Farisi sa qai vakamacalataka vei ratou na nona tisaipeli o Jisu eso tale na ka me baleta na yaco mai ni Matanitu ni Kalou. E veivakasalataki e liu me baleta na nona veiliutaki ena Matanitu qori, ena nona kaya: “Ena yaco na gauna dou na via raica kina e dua na siga ni Luve ni tamata, ia dou na sega ni raica.” (Luke 17:22) E vakaraitaka tiko e keri o Jisu ni na veiliutaki na Luve ni tamata ena Matanitu ni Kalou ena gauna se bera mai. Se mani vakacava na levu ni nodra vinakata eso na tisaipeli me yaco mai na gauna qori, era na waraka ga na gauna lokuci ni Kalou me lako mai kina na Luve ni tamata.

E tomana o Jisu: “Era na kaya vei kemudou, ‘Raica i kea!’ se ‘Raica i ke!’ Dou kua ni lako se cicimuri ira. Ni na vaka ga na tibi ni liva e laurai ena dua na yasa i lomalagi ina dua tale, ena vaka tale ga kina na Luve ni tamata ena nona siga.” (Luke 17:23, 24) Eratou na taqomaki vakacava na tisaipeli i Jisu me ratou kua ni cicimuri ira na mesaia vakailasu? E kaya o Jisu ni na vaka na laurai levu ni tibi ni liva ena dua na vanua na nona lako mai na Mesaia dina. O ira na dau kauaitaka na veika e yaco wavoliti ira era na kila vinaka ni sa veiliutaki na Mesaia ena Matanitu ni Kalou.

Sa qai vakatauvatana o Jisu na veika a yaco ena gauna makawa ina nodra itovo na lewenivanua ena veisiga mai muri: “Na nona siga na Luve ni tamata ena vaka ga na siga i Noa . . . E vaka tale ga kina na ka e yaco ena siga i Loti: era kana tiko, era gunu, era volivoli, era volivolitaki, era teitei, era taravale. Ia ena siga e biuti Sotoma kina o Loti, e tau mai lomalagi na bukawaqa kei na sulifure qai vakarusai ira kece. Ena va tale ga qo na siga ena vakatakilai kina na Luve ni tamata.”​—Luke 17:26-30.

E sega ni kaya o Jisu nira vakarusai na lewenivanua ena siga i Noa kei na siga i Loti nira ogataka na bula ni veisiga, mera kana, gunu, volivoli, volivolitaki, teitei, kei na tara vale. Eratou cakava tale ga eso na ka qori na vuvale i Noa kei Loti. Ia o ira na vo ni lewenivanua era sega ni kauaitaka na loma ni Kalou kei na gauna era sa donuya  tu. E vakasalataki ratou kina nona tisaipeli o Jisu me ratou kauaitaka na loma ni Kalou, qai vakaogai ratou kina. Sa dusimaki ratou sara tiko ga e keri o Jisu ena sala me ratou vakabulai kina ni veivakarusai na Kalou ena gauna se bera mai.

E bibi me ratou kua ni vakawelei na tisaipeli ena veika vakavuravura, “na ka e sa biu tu yani.” E kaya o Jisu: “Ena siga ya, me kua ni suka tale i vale o koya e tiko e delanivale me lai kauta na nona iyaya, o koya tale ga e tiko ena iteitei me kua ni lesuva na ka e sa biu tu yani. Dou nanuma na wati Loti.” (Luke 17:31, 32) A durumasima na wati Loti.

E tomana o Jisu nona vakamacalataka vei ratou na nona tisaipeli na veika ena yaco ni sa veiliutaki vakatui na Luve ni tamata: “Ena bogi ya, erau na moce tu e le rua ena dua na idavodavo, e dua ena kau, dua ena biu tu mai.” (Luke 17:34) Kena ibalebale eso era na vakabulai, eso tale era na biu tu mai se vakarusai.

Eratou taroga na tisaipeli: “I vei Turaga?” E sauma o Jisu: “Na vanua e tiko kina na yago mate era na soqoni vata kina na ikeli.” (Luke 17:37) Io, eso era na raiyawa me vaka na ikeli. O ira qori era na kumuni yani vua e Karisito dina, na Luve ni tamata. Ena qai vakarautaka ena gauna qori o Jisu vei ratou na nona tisaipeli na ka dina mera vakabulai kina o ira era vakabauta.