Ni ratou sota volekati Pecani o Jisu, Marica kei Meri, eratou gole sara ena ibulubulu i Lasarusa. Qo e dua na qara e kena isogo na vatu. E tukuna o Jisu: “Ni kauta tani na vatu.” Ni sega ni kila o Marica na inaki i Jisu, e kaya: “Turaga sa na boi na yagona ni sa ikava ni siga qo.” E tukuna vua o Jisu: “Au a sega ni tukuna vei iko, ke o vakabauta o na raica na lagilagi ni Kalou?”​—Joni 11:39, 40.

E kau laivi na vatu, e tacake o Jisu qai masu: “Tamaqu, au vakavinavinakataki kemuni ni oni rogoci au. Au kila ni oni dau rogoci au, ia au tukuna qo mera vakabauta kina na ilala levu era tu qo ni oni talai au mai.” Nona masu e matanalevu o Jisu e vakaraitaka vei ira na tu e kea ni veika e vakarau cakava e rawa ga  ena kaukaua ni Kalou. Sa qai kaci vakadomoilevu: “Lasarusa, lako mai tuba!” E lako sara mai tuba o Lasarusa, se viviraki tu na ligana kei na yavana ena isolenimate qai viviraki tu na matana ena isulu. E tukuna o Jisu: “Sereki koya me lako.”​—Joni 11:41-44.

Levu na Jiu era mai vakacegui Meri kei Marica era raica na cakamana i Jisu ra qai vakabauti koya. Ia eso tale era lai tukuna vei ira na Farisi na ka e cakava o Jisu. Era mani bose na Farisi kei na iliuliu ni bete era lewe ni Sanadrini, na nodra mataveilewai levu na Jiu. E lewe tale ga ni Sanadrini o Kaiafa na bete levu. Era kaya eso: “Sa levu nona cakamana na tamata qo, cava meda cakava? Ke da laivi koya tiko ga va qo, era na vakabauti koya kece. Era na lako mai na kai Roma ra qai taura noda vanua kei na noda matanitu.” (Joni 11:47, 48) Era mai tukuna vei ira na tagane qori na ‘levu ni cakamana’ i Jisu o ira na raica na ka e yaco, ia era sega ni marautaka na ka e cakava tiko na Kalou ena vukuna. Era kauaitaka ga na nodra itutu kei na lewa e tu vei ira.

Na vakaturi i Lasarusa e vakamadualaki ira sara ga na Setoki, nira sega ni vakabauta na veivakaturi. E kaya o Kaiafa e dua na Setoki: “Oni sega sara ga ni kila e dua na ka, oni sega tale ga ni vakasamataka ni yaga vei kemuni me mate e dua na tamata ena vukudra na lewenivanua, me kua kina ni rusa na matanitu taucoko.”​—Joni 11:49, 50; Cakacaka 5:17; 23:8.

E lesi o Kaiafa ena dua na itavi lagilagi, ia e “sega ni cavuta vakataki koya” na vosa ya, e uqeti sara ga vakalou. E tukuna tiko o Kaiafa ni dodonu me vakamatei o Jisu me kua kina ni beca na nodra lewa kei na nodra veivakamuai na iliuliu ni lotu vakaJiu. Ia na ka e cavuta o Kaiafa e vakaibalebaletaka ni mate i Jisu ena kedra ivoli kece “na luve ni Kalou era talabusese tu,” sega ni o ira ga na Jiu.​—Joni 11:51, 52.

E yaco na loma i Kaiafa nira duavata na Sanadrini me vakamatei o Jisu.. Erau sa veikilai rawa tiko o Jisu kei Nikotimo e lewe tale ga ni Sanadrini. De dua ena lai tukuna vei Jisu nodra bukivere na Sanadrini. Se mani cava e yaco, e biubiu mai na yasayasa o Jerusalemi o Jisu, e sega ni vakamatei ni se sega ni gauna lokuci ni Kalou me yaco kina qori.