Ni tiko voli o Jisu e Jerusalemi donuya na Lakosivia ni 30 G.V., e vakayacora na veika veivakurabuitaki se cakamana. Era vakabauti koya kina e levu. E qoroqoro o Nikotimo, e dua na Farisi e lewe ni nodra mataveilewai levu na Jiu na Sanadrini. Ni via kila e levu tale na ka, e sikovi Jisu kina ni sa buto. De dua e leqataka ni na kilai na ka e cakava qai vakacacana na kena irogorogo vei ira na nodra iliuliu na Jiu.

“Rapai,” e kaya o Nikotimo, “keimami kila ni oni qasenivuli e talai kemuni mai na Kalou, ni sega ni dua e cakamana me vakataki kemuni ke sega ni tiko vata kei koya na Kalou.” Sa qai kaya vei Nikotimo o Jisu ni dodonu me “sucu tale” e dua me rawa ni curu ina Matanitu ni Kalou.​—Joni 3:2, 3.

Ia ena sucu tale vakacava e dua? E taroga o Nikotimo: “Me curu vakarua ina katonigone i tinana me qai sucu tale mai?”​—Joni 3:4.

E sega ni ibalebale ni sucu tale qori. E kaya o Jisu: “Ke dua e sega ni sucu ena wai kei na yalo tabu ena sega ni curu ina Matanitu ni Kalou.” (Joni 3:5) Ni papitaiso o Jisu qai lako sobu mai vua na yalo tabu, sa sucu sara ga e keri “ena wai kei na yalo tabu.” A rogo tale ga mai lomalagi e dua na domo e kaya: “Qo na Luvequ lomani, au vakadonuya.” (Maciu 3:16, 17) Qori na sala e vakaraitaka kina na Kalou ni sa luvena vakayalo o Jisu, sa rawa tale ga ni curu ina Matanitu vakalomalagi. Ni sobuti ira eso tale era papitaiso na yalo tabu ena Penitiko 33 G.V., era sucu tale kina mera luvena vakayalo na Kalou.​—Cakacaka 2:1-4.

E sega ni taura rawa o Nikotimo na ka e vakavulica o Jisu me baleta na Matanitu ni Kalou. E mani vakamacalataka vua o Jisu eso tale na ka e vauca nona itavi lavotaki na Luve ni Kalou ni mai bula vakatamata. E kaya o Jisu: “Me vaka nona laveta cake na gata o Mosese mai na vanua talasiga, e dodonu gona me laveti cake na Luve ni tamata, mera bula tawamudu kina o ira kece na vakabauti koya.”​—Joni 3:14, 15.

Ena gauna makawa, na Isireli e kati koya na gata batigaga e dodonu me raica na gata kopa ke via bula. (Tiko Voli Mai na Lekutu 21:9) E bibi tale ga meda vakabauta kece na Luve ni Kalou meda sereki kina mai na mate da qai bula tawamudu. Me vakavotui na loloma i Jiova ena ituvatuva qori, e tukuna tale vei Nikotimo o Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa kina o ira na vakaraitaka nodra vakabauti koya, mera rawata ga na bula tawamudu.” (Joni 3:16) Oti gona e ono na vula nona tekivuna o Jisu e Jerusalemi nona cakacaka vakaitalatala, a vakamatatataka nira na vakabulai na kawatamata ena vukuna.

E tukuna o Jisu vei Nikotimo: “E sega ni talai Luvena mai vuravura na Kalou me mai veilewaitaki vuravura.” Kena ibalebale e sega ni talai mai me totogitaka kece na kawatamata mera vakarusai. Ia e kaya o Jisu ni talai mai “me vakabulai ga o vuravura ena vukuna.”​—Joni 3:17.

Ni mai raici Jisu o Nikotimo ni sa buto ena vuku ni nona rere, e vakavure vakasama kina nona tinia nodrau veivosaki o Jisu ni kaya: “Qo na yavu ni veilewai: ni sa lako mai vuravura na rarama, [vakaraitaka o Jisu ena nona bula kei na nona ivakavuvuli] e taleitaka ga na tamata na butobuto sega ni rarama, ni torosobu na nodra ivalavala. O koya e ca na nona ivalavala e cata na rarama qai sega ni lako mai ina rarama,  me kua ni vunauci kina ena ka e cakava. Ia o koya e cakava na ka dodonu e lako mai ina rarama, me laurai kina ni salavata na nona ivalavala kei na ka e vinakata na Kalou.”​—Joni 3:19-21.

Sa qai vo ga vua na Farisi o Nikotimo e qasenivuli tale ga e Isireli, me vakasamataka na ka se qai rogoca me baleta na itavi i Jisu ena inaki ni Kalou.