E dau mositi keda nona vakasivoi mai na ivavakoso e dua na wekada se itokani voleka e sega ni veivutunitaka nona cala. Noda rai me baleta na ivakasala vakaivolatabu ena tikina qo, ena laurai kina na titobu ni noda lomani Jiova kei na noda yalodina ina veika e tuvanaka. * Meda veivosakitaka mada eso na ka eda dau lomatarotarotaka.

Meda raici ira vakacava na vakasivoi? E tukuna na iVolatabu: “Moni kua ni vakailala tiko kei na dua e vakatokai me tacida e dauveiyacovi tawadodonu, se daukocokoco, se dauqaravi matakau, se dauveivakasewasewani, se daumateni, se dau kovea na ka, ni kua mada ga ni kana vata kei koya.” (1 Korinica 5:11) E tukuni tale ga me baleti koya e “sega ni dei tiko ga ena ivakavuvuli i Karisito”: “Ni kua ni vakacurumi koya ina nomuni vale se vakabula vua. O koya e vakabula vua sa vakaivotavota ena nona ivalavala ca.” (2 Joni 9-11) Eda na sega ni veimaliwai se veitalanoataka na ka vakayalo kei ira na sivo. Na Vale ni Vakatawa, 15 Seviteba, 1981, tabana e 25 e tukuni kina: “Nomu vakabula wale ga vua e rawa ni imatai ni kalawa mo drau veitalanoa kina se veitokani sara. Vakacava eda via taura na imatai ni kalawa ya meda vakabula vua?”

E dodonu beka meda vakayawaki keda sara ga mai vua? Io, e tiko na vuna meda cakava kina qori. Kena imatai, e vakaraitaka noda yalodina vua na Kalou kei na nona Vosa. Eda na talairawarawa vei Jiova ena veigauna, dina ni na dredre ena so na gauna. Noda lomana na Kalou ena uqeti keda meda muria na nona ivunau kece nida kila ni dodonu nona ivalavala, e dauloloma, qai yaga vei keda na nona lawa. (Aisea 48:17; 1 Joni 5:3) Kena ikarua, noda vakayawaki keda mai vua e sega ni veivutunitaka nona ivalavala ca ena taqomaki keda qai taqomaka tale ga vakayalo na ivavakoso me kua ni rogorogo ca. (1 Korinica 5:6, 7) Kena ikatolu, noda dei ena ivakavuvuli vakaivolatabu ena yaga vua e vakasivoi. A sega ni via ciqoma nodra veivuke na qase ni ivavakoso, ia ena rawa ni veiuqeti vua noda tokona na vakatulewa ni komiti ni veilewai. Noda tagutuva na noda veimaliwai kei na dua eda dau veivolekati ena rawa ni uqeti koya me “kilai yalona tale,” me raica na bibi ni cala e cakava, qai saga me vakadonui koya tale o Jiova.—Luke 15:17.

Vakacava ke vakasivoi e dua na wekada voleka? Ena vakatovolei ena gauna qori se bibi cake noda veilomani vakaveiwekani se noda yalodina vei Jiova kei na nona lawa. Meda raica vakacava na nona vakasivoi na wekada? Ena sega ni veivosakitaki ena ivola qo na ituvaki kece ena rairai sotavi, ia meda raica mada ga e rua.

Ena so na ituvaki, o koya e vakasivoi ena rairai tiko e vale kei ira na vo ni lewenivuvale. E sega ni tagutuva na ivau ni veiwekani na nona vakasivoi, ratou na cakava vata tiko ga na veika e vauca na bula ni vuvale e veisiga. Ia ena vuku ni cala e cakava, sa na tagutuvi na kedratou ivau vakayalo. Ni ratou lomani Jiova ratou qai yalodina vua na lewenivuvale, ratou na sega ni vakatara me vakaitavi o koya e vakasivoi ena veika e vauca na sokalou. Kena ivakaraitaki, ena sega ni vakaitavi ke tiko ena sokalou vakavuvale. Ke gone o koya e vakasivoi, se nodrau itavi tiko ga na itubutubu me rau vakavulici koya, rau vunauci koya tale ga. Erau rawa ni tuvanaka tale ga me rau vulica vata kei koya na iVolatabu. *—Vosa Vakaibalebale 6:20-22; 29:17.

Ena so tale na ituvaki, ena rairai vakasivoi e dua na wekada e sega ni tiko kei keda e vale. De na gadrevi ena so na gauna me veivosakitaki eso na ka e vauca na vuvale, ia e dodonu me yalani na veimaliwai. O ira na lewenivuvale lotu vaKarisito yalodina era na sega ni vaqara ulubale mera veimaliwai kina kei na wekadra e vakasivoi e sega ni tiko e vale. Ia na nodra yalodina vei Jiova kei na nona isoqosoqo e uqeti ira mera doka na ituvatuva vakaivolatabu me baleta na veivakasivoi. Nodra muria dei na lawa i Jiova me baleta na veivakasivoi ena uqeti koya e cala qai yaga vua nona vunauci. *—Iperiu 12:11.