WASE 2
Nuiqawaqawa—“Sogolati ena Sala Kece”
“Keirau veisere ni oti e 25 na yabaki neirau vakawati. Ratou biuta na dina na luvequ. E vica na mate lelevu e tauvi au. Au lomabibi sara ga. Dua na ka noqu rarawa, sa oti tale ga na noqu vakanuinui. Au sa sega ni tiko ena soqoni, au malumalumu vakayalo.”—June.
E BIKAI keda kece na nuiqawaqawa, wili kina o ira na tamata ni Kalou. E vola na daunisame: E “bikai au na nuiqawaqawa.” (Same 94:19) E tukuna tale ga o Jisu ni na rawa ni vakadredretaka noda qaravi Jiova na “lomaocaocataki ni bula.” (Luke 21:34) Vakacava, o vakila tale tiko ga qori? O vakila na leqa vakailavo, leqa vakavuvale, se tauvimate? Ena vukei iko vakacava o Jiova mo vosota?
“Kaukaua e Uasivia na Kaukaua ni Tamata”
Eda na sega ni valuta duadua na nuiqawaqawa. E vola na yapositolo o Paula, “Keitou sogolati ena sala kece. . . Keitou veilecayaki . . . , keitou vakabalei.” E kaya tale ga ni “keitou se veitosoyaki rawa ga,” “keitou se dro rawa ga,” “keitou sega ga ni vakarusai.” Na cava ena vukei keda meda vosota? Na “kaukaua e uasivia na kaukaua ni tamata,” e solia na Kalou kaukaua duadua, o Jiova.—2 Korinica 4:7-9.
Vakasamataka mada na nomu vakila na “kaukaua e uasivia na kaukaua ni tamata” ena gauna sa oti. O nanuma e dua na ivunau e uqeti iko mo vakavinavinakataka na dei ni loloma i Jiova? Vakacava, e vaqaqacotaka nomu vakabauta na yalayala i Jiova ni o vakavulica eso ena inuinui ni bula ena Parataisi? Nida tiko ena soqoni da qai vakaitavi kina, eda vakayaloqaqataki meda vosota na lomaocaocataki ni bula qai vakacegu noda vakasama nida qarava na Kalou ena marau.
“Tovolea Mada Qai Raica ni Vinaka o Jiova”
E levu sara na ka o via cakava ena dua ga na gauna. Kena ivakaraitaki, e kerei keda o Jiova meda vakaliuca na Matanitu ni Kalou da qai dei ena noda ituvatuva vakayalo. (Maciu 6:33; Luke 13:24) Ia vakacava ke vakaocai iko na veitusaqati, tauvimate, se leqa vakavuvale? Se levu na gauna kei na igu o vakayagataka ena nomu cakacaka qai lailai ena ivavakoso? Ena rawa ni vakaocai iko ni levu na ka o qarava qai lailai na gauna kei na igu mo cakava kece kina. De o na veinanuyaka ni sa levu na ka e namaka vei iko o Jiova.
E kilai keda vinaka o Jiova. E sega ni namaka vakasivia vei keda na ka. E kila tale ga ni na taura na gauna me oti kina na wawale ni yagoda kei na lomabibi.—Same 103:13, 14.
Raica mada na ivakaraitaki ni nona karoni Ilaija o Jiova. Ni yalolailai qai rere e dro kina ina vanua talasiga. Vakacava, e vunauca na parofita qai vakaroti koya me lesu tale ina nona ilesilesi? Sega. A tala vakarua o Jiova na agilosi me vakayadrati Ilaija vakamalua qai solia vua na kena. Oti tale e 40 na siga se lomaleqa ga qai rere o Ilaija. Na cava tale e vukei koya kina o Jiova? Dua, e vakaraitaka ni rawa ni taqomaki koya. Kena ikarua, e vakacegui Ilaija ena “domo malumu, e rogo lailai.” Kena iotioti, e tukuna o Jiova ni tiko e vica na udolu era qarava tiko na Kalou ena yalodina. Qori e vakayaloqaqataki Ilaija me gumatua tale ena nona cakacaka vakaparofita. (1 Tui 19:1-19) Na cava eda vulica? Ni nuiqawaqawa o Ilaija, e vosoti koya qai lomani koya o Jiova. Se duadua tu ga o koya. E kauaitaki keda tale ga.
Me donu na nomu rai ena ka mo solia vei Jiova. Kua ni vakatauvatana na ka o rawata ena gauna qo kei na gauna sa oti. Kena ivakaraitaki: Na daucici e cegu tu vakabalavu nona vakaukauayago, ena sega ni muria nona ituvatuva e liu. Ia ena tekivu vakalalai, me rawa ni kaukaua qai vosota. O keda na lotu vaKarisito eda vakataki ira na daucici. Era vakaukauayago ni dei ena nodra vakasama na nodra isausau. (1 Korinica 9:24-27) Vakacava mo tekia na isausau vakayalo o na rawa ni sauva ena gauna qo? Kena ivakaraitaki, e rawa ni nomu isausau mo tiko ena soqoni ni ivavakoso. Masuti Jiova me vukei iko ena nomu isausau. Ni o sa kaukaua tale vakayalo, o na “tovolea qai raica ni vinaka o Jiova.” (Same 34:8) Mo nanuma tiko ni talei vei Jiova na nomu sasaga mo vakaraitaka na nomu lomani koya se mani lailai mada ga.—Luke 21:1-4.
O Jiova e sega ni namaka vakasivia vei keda na ka
“Na iCegucegu Au Waraka Tiko”
E vakaukauataki June vakacava o Jiova me lesu vua? E kaya: “Au dau masuti Jiova me vukei au. E qai tukuna o wati luvequ tagane ni na caka tiko e dua na nodra soqo na iVakadinadina i Jiova ena tauni au tiko kina. Au vakatulewataka meu tiko ena dua na siga. Dua na ka noqu marau meu maliwai ira tale na tamata i Jiova! Na soqo qori na icegucegu au waraka tiko. Ena gauna qo, au sa marau tale niu qaravi Jiova. Sa qai vakainaki noqu bula. Au vakadinata ni sega ni dodonu ga meu yawaki ira na taciqu. Au marau ni se soli tu na gauna meu lesu mai.”
