WASE 3
Rarawa—Nida “Didivaka e Dua na Ka”
“E beitaki au e dua na taciqu niu butakoca na nona ilavo. Era kila qori eso ena ivavakoso ra qai veitovaki. Ia e kaya na taciqu qo ni tukuni vua niu galala kina. E kere veivosoti, ia mai vu ni lomaqu e dredre meu vosota na ka e cakava.”—Linda.
VAKACAVA o duavata kei Linda, ni vakararawataki iko e dua na tacimu? Ka ni rarawa ni vakaleqa na nodra ituvatuva vakayalo eso na ka era cakava na tacidra. Vakacava o sotava tiko qori?
Rawa ni Dua e “Tawasei Keda Mai na Loloma ni Kalou”?
Ena rairai dredre meda vosoti ira na tacida era vakararawataki keda. Ia e dodonu meda veilomani na lotu vaKarisito. (Joni 13:34, 35) Ni caka ca vei keda e dua na tacida, e sega ni tukuni rawa na noda rarawa kei na mosi.—Same 55:12.
E tukuni ena iVolatabu ni tiko na gauna eda na ‘veididivaki’ kina na lotu vaKarisito. (Kolosa 3:13) Nida sotava qori, e sega ni rawarawa meda vosota. Eda na vukei vakacava? Meda veivosakitaka mada e tolu na ivakavuvuli vakaivolatabu:
E kila na ka kece na Tamada vakalomalagi. O Jiova e raica na ka kece, wili kina na ka tawadodonu eda sotava kei na noda rarawa. (Iperiu 4:13) E dau rarawa tale ga ena gauna eda rarawa kina. (Aisea 63:9) Ena sega ni vakatara na “veika rarawa, na veika dredre” se dua tale na ka, oya e dua mada ga nona dauveiqaravi me ‘tawasei keda mai na nona loloma.’ (Roma 8:35, 38, 39) Vakacava meda kua tale ga ni vakatara e dua na ka me tawasei keda vua?
Nida veivosoti eda sega ni vakadonuya na cala. Nida vosoti ira era cala vei keda, e sega ni kena ibalebale nida vakamamadataka, tokona, se vakadonuya nodra ivalavala. Meda nanuma tiko ni sega ni vakadonuya o Jiova na ivalavala ca, ia ena vosota ke tiko na kena yavu. (Same 103:12, 13; Apakuki 1:13) Ni uqeti keda meda veivosoti, e kerei keda tiko meda vakatotomuri koya. E sega ni “cudru tiko me tawamudu.”—Same 103:9; Maciu 6:14.
Nida sega ni cudru tiko ga, ena vinaka vei keda. Ena sala cava? Raitayaloyalotaka mada. O taura cake e dua na vatu e vica toka na kilo na kena bi. Ena rawarawa mo taura toka vakalekaleka. Ia vakacava ke o taura tu vakabalavu? Ena vakacava na kena dede? Vica ga na miniti? Dua na aua? Se balavu sara? Macala ga ni na wawale na ligamu! E sega ni veisau na bi ni vatu. Ia na dede ga ni nomu taura tu, na kena tarabi vei iko. E va tale ga qori na cudru. Na dede ga ni nomu katona, ke ka lailai mada ga, eda sa vakaleqai keda ga. Sa rauta me uqeti keda o Jiova meda kua ni cudru tiko ga, ni na vinaka vei keda.—Vosa Vakaibalebale 11:17.
Nida sega ni cudru tiko ga, ena vinaka vei keda
“E Vaka ga e Vosa Tiko Vei Au o Jiova”
Na cava e vukei Linda me kua ni katona na ca e cakava na tacina? E vakasamataka vakatitobu na yavu vakaivolatabu me veivosoti kina. (Same 130:3, 4) E uqeti koya sara ga na nona kila ni na veivosoti wale ga o Jiova ke da veivosoti. (Efeso 4:32–5:2) Ni vakasamataka na tikina qori, e kaya: “E vaka ga e vosa tiko vei au o Jiova.”
Toso na gauna, sa seavu na cudru nei Linda. E yalorawarawa me vosota na tacina, rau sa veitokani dredre. E tomana tiko ga nona qaravi Jiova. Nanuma tiko, e via vukei iko tale ga o Jiova mo cakava qori.
